ނަހުލާ އާއި އޭނާގެ މަންމަ ޕީޕީއެމުން ވަކިކޮށްފި
ކޮމިޓީގެ ފަރާތުން އެންގުމުން އެ ނިންމުން ތަންފީޒުކޮށް، އެ ދެމީހުންނަށް ވެސް އެކަން އަންގާފައިވޭ
ވިލިމާލެ ކައުންސިލް މެމްބަރު ނަހުލާ އަލީ
މާލޭ ސިޓީ ވިލިމާލޭ ދާއިރާގެ ކައުންސިލް މެމްބަރު ނަހުލާ އަލީ ޕީޕީއެމުން ވަކިކޮށްފިއެވެ.
ޕީޕީއެމުން ބުނީ ނަހުލާ އަލީ އަދި އޭނާގެ މަންމަ އައިމިނަތު ލީލާ ޕާޓީން ވަކިކުރަން ސުލޫކީ ކޮމިޓީން ނިންމާ، އެކަން ކޮމިޓީގެ ފަރާތުން އެންގުމުން އެ ނިންމުން ތަންފީޒުކޮށް، އެ ދެމީހުންނަށް ވެސް އެކަން އަންގާފައިވާ ކަމަށެވެ.
ޕީޕީއެމްގެ ސުލޫކީ ކޮމިޓީން ނަހުލާގެ މައްސަލަ ބަލަން ފަށާފައިވަނީ ޕީޕީއެމްއާއި އެ ޕާޓީގެ ލީޑަރޝިޕް ބަދުނާމުކޮށް ނަޙުލާ ހަޤީޤަތާއި ޚިލާފު ދޮގު ވާހަކަތަކެއް ދައްކަވަމުން ގެންދަވާކަމަށް ބުނެއެވެ. މިހެން މިކަން ހާމަކޮށް އެޕާޓީގެ ފަރާތުން މިމައްސަލައިގައި ބަޔާނެއްވެސް ނެރެފައިވެއެވެ.
އެގޮތުން ޕާޓީގެ އާންމު މެންބަރުންނާއި، ސޯޝަލް މީޑިއާގައި ޕާޓީއާއި ޕާޓީގެ ލީޑަރޝިޕް ބަދުނާމުކޮށް ހަޤީޤަތާއި ޚިލާފު ދޮގު ވާހަކަތައް ފަތުރަން ފަށާފައިވަނީ، ވިލިމާލޭ ދާއިރާގެ، މާލޭ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ބައި-އިލެކްޝަންގައި ޕީޕީއެމްގެ ޓިކެޓްގައި ވާދަ ކުރާ ކެންޑިޑޭޓަށް އެންޓި ކެމްޕެއިންކޮށް، އިދިކޮޅުން ވާދަ ކުރަމުންގެންދާ ކެންޑިޑޭޓަށް ވޯޓު ހޯދުމުގެ މަސައްކަތްތަކެއް ކުރާކަމުގެ މައުލޫމާތު ލިބިފައިވަނިކޮށް ކަމުގައި ޕީޕީއެމުން ބުނެއެވެ. އަދި މިކަމުގެ މައުލޫމާތު ލިބިފައިވަނީ ހެއްކާއެކުގައި ކަމަށްވެސް ޕީޕީއެމުން ބުނެއެވެ. ޕާޓީގެ ރައީސްގެ ނަންފުޅު ބޭނުންކޮށް، ދޮގު ވާހަކަތައް ދައްކައި މެންބަރުންގެ މެދުގައި ނުތަނަވަސްކަން އުފައްދައި، ފިތުނަ އުފެދޭ ވާހަކަތައް ދައްކަމުންގެންދާކަމަށްވެސް ޕީޕީއެމުން ބުނެއެވެ. އަދި މިކަންކަން ކުރުމުގައި ނަހުލާ އާއެކު އޭނާއަށް ވާގިވެރި ވުމުގައި، އޭނާގެ މަންމަ އާމިނަތު ލީލާއާ ގުޅޭ މިމައްސަލަ ސުލޫކީ ކޮމިޓީއަށް ހުށަހެޅި އެމައްސަލަ ބަލަން ފެށުމާއެކު، ދޮގު ވާހަކަތަކެއް ދެއްކުމަށްފަހު ޕާޓީން ވަކިވެފައިވާ އޭނާގެ ކޮއްކޮ މަރްޔަމް ނަފްޙާ އަލީވެސް މިކަމުގައި ހިމެނޭ ކަމަށް ޕީޕީއެމުން ވަނީ ބުނެފައެވެ.
މި ބަޔާނާއި ގުޅިގެން ނަހުލާ ކުރެއްވި ފޭސްބުކް ޕޯސްޓެއްގައި ވިދާޅުވީ، ހަޤީޤަތާއި ޚިލާފު ދޮގު ވާހަކަތަކެއް ދައްކަވާފައި ނުވާނެ ކަމަށެވެ. ނަހުލާ ވިދާޅުވީ، ޕީއެންސީގެ ނައިބު ރައީސް އަދި ހުޅުމާލޭ ދާއިރާގެ ކައުންސިލް މެމްބަރު އިބްރާހިމް ޝުޖާއު އޭނާ ޕާޓީން ކަނޑާލާނެކަމުގެ އިންޒާރު ސިޓީ ކައުންސިލް ތެރޭ ދެއްވާފައިވާކަމަށާއި، އޮފީހަށް ވަޑައިގެންނެވުމަށް އުނދަގޫ ކުރައްވަމުން ގެންދަވާކަމުގެ ޝަކުވާ މިދިޔަ މަހުގެ 20ވަނަ ދުވަހު ހުށައަޅުއްވާފައިވާނެ ކަމަށެވެ. ނަމަވެސް ޕާޓީގެ ލީޑަރޝިޕުން އެއީ އަމިއްލަ ކަމެއް ކަމަށް ބުނެ އެ މައްސަލައަށް މާ ބޮޑު ސަމާލުކަމެއް ދީފައިނުވާކަމަށް އޭނާ ވިދާޅުވިއެވެ.
ޕީޕީއެމުން ނެރުނު ނޫސްބަޔާނަކީ ޝުޖާއުގެ ނުފޫޒުން ނެރެފައިވާ ނޫސްބަޔާނެއްކަމަަށްވެސް ނަހުލާގެ ޕޯސްޓުގައިވެއެވެ. ނަހުލާ އިތުރަށް ވިދާޅުވީ އޭނާއާ ބެހޭގޮތުން ދޮގު ވާހަކަ ފަތުރަނީވެސް ޝުޖާއުގެ ނުފޫޒުން ކަމަށެވެ. އަދި ރައީސް ޔާމީނަށް ތާއީދު ކުރައްވާތީ ކޮންމެފަދަ ދެރައެއް ދިނަސް ފަރުވާލެއް ނެތް ކަމަށް ފޭސްބުކްގައި ނަހުލާ ވިދާޅުވެފައިވެއެވެ. އަދި ޕީޕީއެމްގެ ކެންޑިޑޭޓަށް ވޯޓު ނުދިނުމަށް އެއްވެސް މީހެއްގެ ގާތުގައި ވިދާޅުނުވާ ކަމަށްވެސް ނަހުލާވަނީ ވިދާޅުވެފައެވެ.
