ވިލިމާލެ ދާއިރާގެ ކައުންސިލަރު، ނަހުލާ އަލީ މާލެ ސިޓީ ކައުންސިލުން ކުއްޔަށް ދޫކޮށްފައިވާ ބިންތަކެއްގެ އެގްރީމެންޓުތަކެއް ވީދާލާ މަންޒަރު ވީޑިއޯ ފޫޓޭޖް ތަކުން ފެންނަ ކަމަށާއި، އެ މައްސަލަ މިހާރު ފުލުހަށް ހުށަހަޅައިފި ކަމަށް މާލެ ސިޓީ ކައުންސިލް ގެ މޭޔަރ އާދަމް އާޒިމް ވިދާޅުވެއްޖެ އެވެ.

ބުދަ ދުވަހު ބޭއްވި މާލެ ސިޓީ ކައުންސިލްގެ ޖަލްސާގައި ވާހަކަދައްކަވަމުން މޭޔަރު އާޒިމް ވިދާޅުވީ މާލޭގެ ބިންތަކަކާ ބެހޭ ކޮންޓްރެކްޓެއް ނަހުލާ ވީދާލާ މަންޒަރު ފެންނަ ވީޑިއޯއެއް އެބަ އޮތް ކަމަށެވެ. އެ ވީޑިއޯ ހުރިހާ ކައުންސިލަރުންނާ މިހާރު ހިއްސާ ވެސް ކޮށްފައިވާ ކަމަށް އޭނާ ވިދާޅުވި އެވެ.

މޭޔަރު އާޒިމް ވިދާޅުވި ގޮތުގައި ނަހުލާ ވީދާލާފައި ވަނީ އެ ކައުންސިލުން މި ފަހުން އާންމުކުރި ބިމުގެ ދަފުތަރުގައި ނުހިމެނި އޮތް ކޮންޓްރެކްޓެކެވެ. މި ވާހަކަތަކާއި އެކު ކައުންސިލަރު ނަހުލާ ވަނީ ވަރަށް ބޮޑަށް އަޑުގަދަކޮށް ނުރުހުން ފާޅުކޮށްފަ އެވެ.

ޖަލްސާގައި ވާހަކަ ދައްކަވަމުން މޭޔަރު އާޒިމް ވިދާޅުވީ، ކައުންސިލުގައި ފެންނަން ހުރި ޑޮކިއުމެންޓުތަކަށް ބަލައި އާންމުކޮށްފައިވާ ބިމުގެ ލިސްޓުގައި ނުހިމެނިފައިވާ ކޮންޓްރެކްޓެއްގެ ޑޮކިއުމެންޓުތަކެއް ނައްތައިލުމަށްޓަކައި ކައުންސިލަރަކު މަސައްކަތް ކޮށްފައިވާ ވީޑިއޯ ފުޓޭޖު މިހާރު ފުލުހަށާއި އެލްޖީއޭއަށް ފޮނުވާފައިވާ ކަމަށެވެ.

މޭޔަރު ފާހަގަކުރެއްވި ގޮތުގައި މިކަމުން މާލެ ސިޓީ ކައުންސިލުގެ ލިޔެކިޔުންތައް ނައްތައިލާފައިވާކަން ހާމަވެ އެވެ. އާޒިމް ވަނީ ރަސްމީ ލިޔެކިޔުމެއް ވީދާލުމަކީ ޖިނާއީ ކުށެއް ކަމަށް ވިދާޅުވެފަ އެވެ. އަދި ސިޓީ ކައުންސިލުގައި ހުންނަ އެއްވެސް ލިޔެކިޔުމެއް ނައްތާލުމުގެ ބާރު އެ ކައުންސިލުގެ އެއްވެސް މެންބަރަކަށް ލިބިގެން ނުވާ ކަމަށް ވެސް އޭނާ ވިދާޅުވި އެވެ. މި މައްސަލައާ ގުޅިގެން ސިޓީ ކައުންސިލްގެ މުވައްޒަފުންގެ ބަޔާންތައް ވެސް ނަގާފައިވާ ކަމަށާއި އެ ބަޔާންތައް ފުލުހުންނާ ހިއްސާކުރައްވާނެ ކަމަށް މޭޔަރު ވިދާޅުވި އެވެ.

ބުދަ ދުވަހުގެ ޖަލްސާގައި ކައުންސިލަރު ނަހުލާ ވަނީ ސިޓީ ކައުންސިލްގެ ލިޔެކިޔުމެއް ވީދާލިކަމަށް އިއުތިރާފުވެވަޑައިގެންފަ އެވެ. ނަމަވެސް ދިފާއުގައި ނަހުލާ ވިދާޅުވީ އޭނާ ވީދާލީ ކުރީގެ ތާރީހެއް ޖަހައިގެން ވިލިމާލޭގެ ބިމެއް ހަވާލުކުރުމަށް މިދިޔަ ބުރާސްފަތި ދުވަހު ސޮއިކުރި ލިޔުމެއް ކަމަށެވެ.

ނަހުލާގެ އެ ވާހަކަތަކާ ގުޅިގެން މާލެ ސިޓީ ކައުންސިލްގެ ސެކްރެޓަރީ ޖެނެރަލް މުހައިމިން ވިދާޅުވީ އެ ލިޔުމުގައި ޖޫން 1، އޮތް ނަމަވެސް، ބިމާބެހޭ އެއްބަސްވުންތަކުގައި އޮންނަ ގްރޭސް ޕީރިއަޑް ގުނަން ފަށަނީ ބިން ހަވާލުކުރާ ތާރީހުން ފެށިގެން ކަމަށެވެ. އަދި އެއީ އޮޅުވާލައިގެން ކުރި ކަމެއް ނޫން ކަމަށް ވެސް މުހައިމިން ވިދާޅުވި އެވެ.

މާލެ ސިޓީ ކައުންސިލްގެ ބުދަ ދުވަހުގެ ޖަލްސާ ނިންމައިލީ އެ ބަހުސް އިތުރަށް ހޫނުވެ، ޖަލްސާ ކުރިއަށް ގެންދެވޭ ގޮތް ނުވެގެންނެވެ. ޖަލްސާ ނިންމައިލައްވަމުން މޭޔަރު އާޒިމް ވިދާޅުވީ އެ މައްސަލައަކީ ފުލުހުން ތަހުގީގު ކުރަމުންދާ މައްސަލައަކަށް ވާތީ، އެކަމާ ބެހޭގޮތުން އިތުރަށް ވާހަކަދެއްކުމަކީ ތަހުގީގަށް ހުރަސް އެޅިދާނެ ކަމެއް ކަމަށެވެ.

މި މައްސަލައަކީ މާލެ ސިޓީ ކައުންސިލުގެ ބިންތަކާ ގުޅޭ ކަންކަމުގައި ހިނގާފައިވާ ގޯސްތަކާ ގުޅޭ ގޮތުން ފަހަކަށް އައިސް ފެންމަތިވެފައިވާ އިތުރު މައްސަލައެކެވެ. މި މައްސަލަ ފުލުހުން ތަހުގީގު ކުރަމުންދާއިރު، ކައުންސިލުގެ ރަސްމީ ލިޔެކިޔުންތައް ނައްތާލުމުގެ ކަންކަން ކުރިއަށްދިޔަ ގޮތާއި، އެކަމުގައި ކައުންސިލަރުންގެ އަތެއް ވޭތޯ ބެލުމަށް ފުލުހުން ތަހުގީގު ކުރާނެ ކަމަށް ލަފާކުރެވެ އެވެ. މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލެ ސިޓީ ކައުންސިލްގެ މޭޔަރު ކަމުގައި ހުންނެވި އިރު، ކަނޑައެޅިފައިވާ އުސޫލުތަކާއި ހިލާފަށް ގިނަ ބިންތަކެއް ކުއްޔައްދީފައިވާ ކަމަށް ގިނަ ބަޔަކު ތުހުމަތު ކުރެ އެވެ.