ކަސްޓަމްސްއިން އަތުލައިގަތް މަސްތުވާތަކެއްޗާއި ގުޅިގެން މީހަކު ހައްޔަރުކޮށްފި
މި މައްސަލައިގައި ހައްޔަރު ކުރީ 18 އަހަރުގެ ދިވެހި ފިރިހެނެއް
އަތުލައިގަނެވުނު މަސްތުވާތަކެތި
ކުރިއަރ މެދުވެރިކޮށް ރާއްޖެއަށް އެތެރެ ކުރަން އުޅުނު މަސްތުވާތަކެތީގެ މައްސަލައިގައި މީހަކު ހައްޔަރުކޮށްފިއެވެ.
ފުލުހުން މައުލޫމާތު ދޭ ގޮތުގައި އެ މައްސަލާގައި މި މަހުގެ ހަތަރުވަނަ ދުވަހު ހައްޔަރު ކުރީ އުމުރުން 18 އަހަރުގެ ދިވެހި ފިރިހެނެކެވެ. އޭނާގެ ބަންދާ މެދު ގޮތެއް ނިންމަން ކޯތަށް ހާޒިރު ކުރުމުން 15 ދުވަހުގެ މުއްދަތެއް ދީފައިވާ ކަމަށް ފުލުހުން ބުނެއެވެ.
ކުރިއަރ މެދުވެރިކޮށް އެތެރެ ކުރަން އުޅުނު މަސްތުވާތަކެތި އަތުލައިގެންފައިވަނީ އޭޕްރިލް މަހުގެ 28 ވަނަ ދުވަހު ކަސްޓަމްސް އިންނެވެ.
ކަސްޓަމްސް އިން ބުނީ މަސްތުވާތަކެތި ފެނުނީ ރާއްޖެއަށް ކުރިއަރ މެދުވެރިކޮށް ގެނައި ޕާރުސަލްތައް ބަލައި ފާސް ކުރިިއިރު، ޝައްކު ކުރެވޭ ޒާތުގެ ބާވަވަތެއް ހުރުމުން އިތުރަށް ބަލައި ފާސްކުރުމުން ކަމަށެވެ. އެގޮތުން 1.363 ކިލޯގެ މަސްތުވާތަކެތި ފެނިފައިވާ ކަމަށް ކަސްޓަމްސް އިން ބުނެފައިވެއެވެ.
މަސްތުވާތަކެތި ފެނުނީ ވައިގެ މަގުން ރާއްޖެއަށް އެތެރެ ކޮށްފައިވާ ޕާރުސަލެއްގެ ތެރެއިންނެވެ. އޭގެ ތެރެއިން ފެނުނު ތަކެތި މަސްތުވާތަކެތީގެ ބާވަތެއް ކަމަށްވާ މެތުއެމްފަޓަމައިން (މެތު) އަށް ޕޮޒިޓިވްވެފައިވާކަމަށް ވެސް ކަސްޓަމްސްއިން މައުލޫމާތު ދީފައިވެއެވެ.
ކަސްޓަމްސްއިން އަތުލައިގަތް މި މަސްތުވާތަކެތީގެ މަގުމަތީ އަގު ފަސް ލައްކަ ރުފިޔާއަށް އަރައެވެ.
