ޓެސްޓުތަކެއް ހެއްދެވުމަށް ސައޫދީ ރަސްގެފާނު އެޑްމިޓް ކުރައްވައިފި
އެޑްމިޓް ކުރެއްވީ ސިއްޙީ ގޮތުން ހައްދަވަން ޖެހިވަޑައިގަންނަވާ ޓެސްޓުތަކެއް ހެއްދެވުމަށް
ސައުދީ ރަސްގެފާނު ސަލްމާން ބިން އަބްދުލްއަޒީޒް- އެމަނިކުފާނު އެޑްމިޓް ކުރައްވާފައިވަނީ ހޮނިހިރު ދުވަހު
ސައުދީ އަރަބިއްޔާގެ ރަސްގެފާނު ސަލްމާން ބިން އަބުދުލްއަޒީޒް ހޮސްޕިޓަލުގައި އެޑްމިޓް ކުރައްވައިފިއެވެ.
ސިއްޙީ ގޮތުން ހައްދަވަން ޖެހިވަޑައިގަންނަވާ ޓެސްޓުތަކެއް ހެއްދެވުމަށް ޖިއްދާގެ ހޮސްޕިޓަލެއްގައި ރަސްގެފާނު ސަލްމާން އެޑްމިޓް ކުރައްވާފައިވަނީ ހޮނިހިރު ދުވަހުގެ ވަގުތެއްގައެވެ. އެކަން ސައުދީ ޝާހީ އާއިލާއާ ޙަވާލާދީ ބޭރުގެ މީޑިއާތަކުން ވަނީ ކަށަވަރު ކޮށްދީފައެވެ.
ރަސްގެފާނު ސަލްމާންގެ ޓެސްޓުތައް މިހާރު ކުރިއަށްދާއިރު، އެމަނިކުފާނު އޮންނެވީ ކިންގ ފައިސަލް ސްޕެޝަލިސްޓް ހޮސްޕިޓަލުގައެވެ. ނަމަވެސް އެ ޓެސްޓުތަކާ ގުޅޭ މާ ގިނަ ތަފްސީލުތަކެއް ޝާހީ އާއިލާއިން ހާމަކޮށްފައެއް ނުވެއެވެ.
މީގެ ކުރިންވެސް މިގޮތަށް އެމަނިކުފާނު އެޑްމިޓް ކުރައްވައިގެން ޓެސްޓުތަކެއް ހައްދަވާފައިވެއެވެ. އެގޮތުން 2020 ވަނަ އަހަރުވެސް ގޯލް ބްލެޑަރ ސަރޖަރީއެއް ހައްދަވާފައިވާއިރު، ހިތްޕުޅަށް ލައްވާފައިވާ ޕޭސްމޭކަރުގެ ބެޓްރީވެސް ވަނީ މިއަހަރުގެ މާރޗު މަހުގެ ތެރޭގައި ބަދަލުކުރައްވާފައެވެ.
