"ޖުލައި 26 ގެ ކުރިން ޕްރައިމަރީ ހެލްތު ކެއަރ ފެށުމަށް މިދަނީ މަސައްކަތްކުރަމުން"

ޖުލައި 26 ގެ ކުރިން ޕްރައިމަރީ ހެލްތު ކެއަރ ލޯންޗުކުރުމުގެ މަސައްކަތް ކުރައްވަމުންދާކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.

މިއަހަރުގެ މާރޗް މަސް ނިމުމުގެ ކުރިން ރާއްޖޭގައި ޕްރައިމަރީ ހެލްތު ކެއަރ އިފްތިތާހުކުރައްވާނެ ކަމަށް ހެލްތް މިނިސްޓަރު ވަނީ މީގެ ކުރިން ވިދާޅުވެފައެވެ. އެހެންނަމަވެސް އަދި ޕްރައިމަރީ ހެލްތު ކެއަރ ލޯންޗުކޮށްފައެއް ނުވެއެވެ.

މިކަމާއި ގުޅިގެން "ރާއްޖެއެމްވީ" އިން ދެންނެވި ސުވާލަކަށް ޖަވާބުދެއްވަމުން މިނިސްޓަރު ނަސީމް ވިދާޅުވީ ޕްރައިމަރީ ހެލްތު ކެއަރ ލޯންޗުކުރުމުގެ ކުރިން ގާނޫނީ ގޮތުން ފުރިހަމަކުރަންޖެހޭ ކަންކަން ހުންނަ ކަމަށެވެ. އަދި ޕްރައިމަރީ ހެލްތު ކެއަރ ލޯންޗުކުރުމުގެ މަސައްކަތް ލަސްވަނީ ގާނޫނީ ގޮތުން ފުރިހަމަކުރަންޖެހޭ ބައެއް ކަންކަން އަދިވެސް ހުރީމަ ކަމަށް މިނިސްޓަރު ނަސީމް ވިދާޅުވިއެވެ.

މިކަންކަން ވީހާވެސް އަވަހަށް ނިންމުމަށް މަސައްކަތް ކުރައްވަމުންދާކަމަށާއި، ޖުލައި 26 ގެ ކުރިން ނިންމަންޖެހޭ ހުރިހާ ކަމެއް ނިންމައި، ލޯންޗުކުރަން މަސައްކަތްކުރައްވަމުންދާކަމަށް މިނިސްޓަރު ވިދާޅުވިއެވެ.

ޕްރައިމަރީ ހެލްތު ކެއަރ ފެށުމުގެ މަސައްކަތަކީ މި ސަރުކާރުން ވަރަށް ޚާއްސަ އިސްކަމެއް ދީގެން ކުރަމުންދާ މަސައްކަތެކެވެ. މިގޮތުން ޕްރައިމަރީ ހެލްތް ކެއަރ ފެށުމަށް ޕައިލެޓް ޕްރޮގްރާމެއްވެސް ވަނީ ކުރިއަށްގެންގޮސްފައެވެ. އަދި ޕްރައިމަރީ ހެލްތް ކެއަރ ކުރިއެރުވުމަށް ކިއުބާ ސަރުކާރާއެކު ވަނީ އެއްބަސްވުމެއްގައިވެސް ސޮއިކޮށްފައެވެ.

ޕްރައިމަރީ ހެލްތް ކެއަރއާ ގުޅޭގޮތުން މީގެ ކުރިން ރާއްޖެޓީވީއަށް ދެއްވި އިންޓަރވިއުއެއްގައި މިނިސްޓަރު ނަސީމް ވިދާޅުވީ ދިވެހިރާއްޖޭގެ ސިއްހީ ނިޒާމު އަލަށް ބައްޓަން ކުރެވުނު ޒަމާނުގައި، އެންމެ ބޮޑު އިސްކަމެއް ދެވުނީ ޕްރައިމަރީ ހެލްތުކެއަރ މެދުވެރިކޮށް ރައްޔިތުންނާ ގާތުން ސިއްހީ ޚިދުމަތް ފޯރުކޮށްދިނުމަށެވެ. ނަމަވެސް، ދިވެހި ރައްޔިތުންގެ ދިރިއުޅުމުގެ ވައްޓަފާޅިއަށް އައި ބަދަލުތަކާއި، ދުނިޔޭގެ ސިއްހީ އޮނިގަނޑަށް އައި ބަދަލުތަކާއި ލިބުނު ކުރިއެރުންތަކާއި، ކެއުން ބުއިމުގެ އާދަކާދަތައް ބަދަލުވުމާއި، ދިވެހި ރައްޔިތުންގެ އުއްމީދުތައް ބަދަލުވުމާއި، އަދި އެހެނިހެން ކަންކަމާ ގުޅިގެން، ރާއްޖޭގެ ސިއްހީ ނިޒާމުގެ ފޯކަސް ބަދަލުވީ ކިއުރެޓިވް ކެއަރ ނުވަތަ ބަލިވުމަށްފަހު ބޭސްފަރުވާ ހޯދުމުގެ ގޮތުން، ސްޕެޝަލިސްޓް ކެއަރ ކުރިއެރުވުމުގެ ސިސްޓަމަކަށް ކަމަށް މިނިސްޓަރ ވިދާޅުވިއެވެ. އެގޮތުން، ރާއްޖޭގެ އެކި ކަންކޮޅުތަކުގައި ހޮސްޕިޓަލްތަކާއި ޒަމާނީ ހެލްތު ސެންޓަރުތައް ގާއިމު ކުރުމުގެ މަސައްކަތްތައް ވަނީ ކުރެވިފައެވެ.