ހޮސްޕިޓަލުތައް ހިންގަން ޖެހޭނީ މިނިސްޓްރީ އާ ވަކިން، އަންނަ އަހަރު އިންގިލާބީ ބަދަލެއް އަންނާނެ – ނަސީމް
ހެލްތު މިނިސްޓްރީއަކީ ހޮސްޕިޓަލު ހިންގާތަނަކަށް ވެގެން ނުވާނެ
ހެލްތު މިނިސްޓަރު އަހުމަދު ނަސީމް، ފަށާއިރު ޕްރޮގްރާމުގައި
ސަރުކާރުގެ ހުރިހާ ހޮސްޕިޓަލެއް ވެސް ހިންގަން ޖެހޭނީ މިނިސްޓްރީ އާ ވަކިން ކަމަށާއި، އަންނަ އަހަރުގެ ތެރޭގައި އިންގިލާބީ ބަދަލެއް އަންނާނެކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
ރާއްޖޭގެ ސިއްހީ ދާއިރާއަށް އައިސްފައިވާ ބަދަލުތަކާއި ގުޅޭގޮތުން ހެލްތު މިނިސްޓަރު ވާހަކަދައްކަވާފައިވަނީ ރާއްޖެޓީވީގެ ފަށާއިރު ޕްރޮގްރާމުގައެވެ. މިނިސްޓަރު ނަސީމް ވިދާޅުވީ ހެލްތު މިނިސްޓްރީއަކީ ވަރަށް އުނދަގޫ ދާއިރާއެއް ކަމަށެވެ. ހެލްތުގެ ވާހަކަ ދެކެވޭ އިރު އެ ދެކެވެނީ ގާތްގަނޑަކަށް 12 ހާސް މުވައްޒަފުންގެ ވާހަކަ ކަމަށާއި، އެއީ ސިވިލް ސަރވިސްގެ ވަރަށް ގިނަ އަދަދެއްގެ ބައެއް ކަމަށެވެ.
މިނިސްޓަރު ވިދާޅުވީ ހެލްތް މިނިސްޓްރީގެ އިންފްރާސްޓްރަކްޗަރާއި ހެލްތު މިނިސްޓްރީގެ ކަންތައްތަކެއް ކުރިން ސްޓްރަކްޗަރުކޮށްފައި ނެތް ކަމަށެވެ. އަދި ހެލްތު މިނިސްޓްރީ އާ ހަވާލުވެވަޑައިގެންނެވި ފަހުން ގާތްގަނޑަކަށް 2 އަހަރާ ގާތްވާއިރު، އޭގެ ތެރެއަށް ޑްރަގް ރިހިބިލިޓޭޝަންގެ ކަންތައްތައް މިދިޔަ އަހަރު އިތުރުކޮށްފައިވާ ކަމަށެވެ. އަދި އޭގެ ސަބަބުން ހެލްތު މިނިސްޓްރީ މާ ބޮޑު ވެސް ވެއްޖެ ކަމަށެވެ.
މިނިސްޓަރު ނަސީމް ވިދާޅުވީ ވީހާވެސް އަވަހަކަށް ހެލްތު މިނިސްޓްރީން ހިންގުން ވަކިވެ އިންސްޓިޓިއުޝަނެއްގެ ގޮތުގައި ހޮސްޕިޓަލުތައް ހިންގަން ބޭނުންވާ ކަމަށެވެ. އެކަމަށްޓަކައި ޕޮލިސީއެއް ރާވާފައިވާ ކަމަށާއި، ރައީސް އޮފީހުން އެ ޕޮލިސީ އެޕްރޫވްކޮށްފައިވާ ކަމަށެވެ.
މިނިސްޓަރު ވިދާޅުވީ އަންނަ އަހަރުގެ ފުރަތަމަ ކުއާޓާގައި މޯލްޑިވްސް ހެލްތު ސަރވިސަސް އުފައްދާ އޭގެ ތެރެއަށް ހުރިހާ ހިންގުމެއް ބަދަލުވެގެންދާނެ ކަމަށެވެ.
މިނިސްޓަރު ވިދާޅުވީ ސިއްހީ ދާއިރާގައި ހުރި ކަންކަން ރަނގަޅު ނުކުރެވިގެން އުޅޭ ސަބަބަކީ އިގްތިސާދީ ކަންތައްތައް ހުރިގޮތުން ކަމަށެވެ. އެކަމަކު ސިއްހީ ދާއިރާގެ ކަންކަން ރަނގަޅުކޮށްދެއްވާނެކަމަށް ރައީސް ސާލިހު އިއުލާންކުރައްވާފައިވާ ކަމަށާއި، އޭގެ ތެރޭގައި މުސާރައަށް ވެސް ބަދަލު އަންނާނެކަމަށެވެ. އަދި މިއާއެކު މީހުން ވެސް މޯޓިވޭޓްވާނެކަމަށާއި، ހިދުމަތްދޭން ތިބޭ މީހުންގެ ކޮންފިޑެންސް ވެސް އިތުރުވާނެ ކަމަށެވެ. މިނިސްޓަރު ވިދާޅުވީ އެހިސާބުން ރާވާފައިވާ އޮތް ރޭވުމާ އެކު ރަނގަޅަށް ކުރިއަށް ދެވޭނެ ކަމަށެވެ.
