ސައިބީރިއާގައި ރޯވި އަލިފާން ގަޑެއްގެ ސަބަބުން 10 މީހުން މަރުވެއްޖެ

ސައިބީރިއާގައި ރޯވި އަލިފާން ގަނޑެއްގެ ސަބަބުން 10 މީހުން މަރުވެއްޖެއެވެ.

މޮސްކޯގެ އިރުމަތިން ގާތްގަނޑަކަށް 3000 ކިލޯމީޓަރު (1900 މޭލު) ދުރުގައި އޮންނަ ކްރަސްނޮޔާރަސްކް ސަރަހައްދުގައި، އަލިފާން ރޯވެ އެ ސަރަހައްދުގެ ގިނަ ވިލެޖުތަކަކަށް ދަނީ އަލިފާން ފެތުރެމުންނެވެ. ހަލުވިކަމާއެކު އަލިފާން ފެތުރެމުން ދަނީ ވައިގަދަވުމުގެ ސަބަބުންނެވެ.

ވައިގަދަވުމުގެ ސަބަބުން އަލިފާން ނިއްވާލުމަށް ކުރަމުންދާ މަސައްކަތްތަކަށް ވެސް ވަނީ ހުރަސްއެޅިފައެވެ. އަދި އެ ސަރަހައްދުގައި މިހާރު ވަނީ ކުއްލި ހާލަތު ވެސް އިއުލާންކޮށްފައެވެ.

އެ ގައުމުގެ ފެޑެރަލް ފޮރެސްޓްރީ އޭޖެންސީން ބުނީ ޕަވަރ ލައިންތަކުގައި ޝޯޓް ސަރކިޓްވުމުގެ ސަބަބުން 350 ގެއެއްގައި އަލިފާން ރޯވެ އަނދަމުންދާ ކަމަށާއި، ގަދަ ވައިގެ ސަބަބުން ހާލަތު އިތުރަށް ގޯސްވެފައިވާ ކަމަށެވެ.

މި އަލިފާނުގެ ހާދިސާގައި ގިނަ އަދަދެއްގެ ބަޔަކު ފިހި އެހެންވެސް އަނިޔާތައް ލިބިފައިވާ އިރު، މިފަދަ މީހުން އެންމެ ގިނައިން ތިބި ސަރަހައްދުތަކުގައި މިހާރު ވަނީ މެޑިކަލް ޝެލްޓަރތަކެއް ހަދައިފައެވެ.