ކުރިއަރ މެދުވެރިކޮށް ރާއްޖެ އެތެރެ ކުރަން އުޅުނު މަސްތުވާތަކެތި އަތުލައިގެންފި

ކުރިއަރ މެދުވެރިކޮށް ރާއްޖެ އެތެރެ ކުރަން އުޅުނު ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސް ސާވިސަސް އިން އަތުލައިގެންފިއެވެ.

ކަސްޓަމްސް އިން ބުނީ މަސްތުވާތަކެތި ފެނުނީ ރާއްޖެއަށް ކުރިއަރ މެދުވެރިކޮށް ގެނައި ޕާރުސަލްތައް ބަލައި ފާސް ކުރިިއިރު ޝައްކު ކުރެވޭ ޒާތުގެ ބާވަވަތެއް ހުރުމުން އިތުރަށް ބަލައި ފާސްކުރުމުން ކަމަށެވެ. އެގޮތުން 1.363 ކިލޯގެ މަސްތުވާތަކެތި ފެނިފައިވާ ކަމަށް ކަސްޓަމްސް އިން ބުނެފައިވެއެވެ.

މަސްތުވާތަކެތި ފެނިފައިވަނީ އޭޕްރިލް 28ވަނަ ދުވަހު ވައިގެ މަގުން ރާއްޖެއަށް އެތެރެ ކޮށްފައިވާ ޕާރުސަލެއްގެ ތެރެއިންނެވެ. އޭގެ ތެރެއިން ފެނުނު ތަކެތި މަސްތުވާތަކެތީގެ ބާވަތެއް ކަމަށްވާ މެތުއެމްފަޓަމައިން (މެތު) އަށް ޕޮޒިޓިވްވެފައިވާ ކަމަށް ވެސް ކަސްޓަމްސް އިން މައުލޫމާތު ދީފައި ވެއެވެ.

ކަސްޓަމްސް އިން އަތުލައިގަތް މި މަސްތުވާތަކެތީގެ މަގުމަތީ އަގު ފަސް ލައްކަ ރުފިޔާ އަށް އަރައެވެ.

މި މައްސަލައިފައި އަތުލައިގަތް މަސްތުވާތަކެތި ކަސްޓަމްސް އިން މިހާރު ވަނީ ފުލުހުންނާ ހަވާލުކޮށްފައެވެ.