ސްރީލަންކާގައި ދިވެއްސަކު ގެއްލިގެން ހޯދަނީ
ގެއްލިގެން ހޯދަނީ އުމުރުން ދުވަސްވީ މީހެއް
ލަންކާގައި ގެއްލިގެން ހޯދާ އިބްރާހިމް އަލީ
ސްރީ ލަންކާގައި ދިވެއްސަކު ގެއްލިގެން ހޯދަން ފަށައިފިއެވެ.
ގެއްލިގެން ހޯދަން އިއުލާން ކޮށްފައިވަނީ ލަންކާއަށް ބޭސްފަރުވާއަށް ގޮސް އުޅުނު އުމުރުން 62 އަހަރުގެ އިބްރާހިމް އަލީ ނަމަކަށް ކިޔާ މީހެކެވެ. އޭނާ އަކީ ކިޑްނީ ބައްޔަށް ފަރުވާ ހޯދަމުން ދާ މީހެކެވެ.
އޭނާ ގެއްލުނު ކަމަށް ބެލެވެނީ އީދު ދުވަހުން ފެށިގެންނެވެ.
އިބްރާހިމް އަލީ ހޯދަން ސޯޝަލް މީޑިއާގައި އިއުލާންކޮށްފައިވާ ޕޯސްޓެއްގައި ބުނެފައިވަނީ އޭނާ އެންމެ ފަހުން ދިޔައީ އީދު ދުވަހު ދެހިވަލަ މިސްކިތަށް ކަމަށާއި އޭގެ ފަހުން ޚަބަރެއް ނުވާ ކަމަށެވެ. އޭނާގެ އެއްވެސް މައުލޫމާތެއް ލިބިއްޖެ ނަމަ 2382 499 (77) 94+ އަށް ނުވަތަ ލަންކާގައި ހުންނަ ރާއްޖޭގެ އެމްބަސީ ނަމްބަރު 6666 881 076 އަށް ގުޅުމަށް ވަނީ އެދިފައެވެ.
ލަންކާއިން އުމުރުން ދުވަސްވީ ދިވެއްސަކު ގެއްލިގެން އުޅޭ ކަން ފޮރިން މިނިސްޓްރީން ވެސް ވަނީ ކަށަވަރު ކޮށްދީފައެވެ. އެ މިނިސްޓްރީން ބުނީ ލަންކާގައި ހުންނަ އެމްބަސީން އިބްރާހިމް އަލީގެ އާއިލާއަށް ދޭން ޖެހޭ ހުރިހާ އެއްބާރުލުން ދޭނެ ކަމަށެވެ. އަދި އޭނާ ހޯދުމަށް ލަންކާގެ ފުލުހުންނާ ގުޅިގެން އާއިލާއިން މަސައްކަތް ކުރަމުން އަންނަ ކަމަށް ވެސް އެ މިނިސްޓްރީން މައުލޫމާތު ދީފައި ވެއެވެ.
