އަލިފުށި ރެޓްރޯ ކޮފީން ކުރިއަށްގެންދިޔަ ވޮލީބޯޅަ މުބާރާތުގެ ޗެމްޕިއަންކަން އަލިފުށީ ޕޮލިހާއި ސިކްސް ޕެކް ހޯދައިފިއެވެ.

ފިރިހެން ޑިވިޝަންގެ ޗެމްޕިއަންކަން އަލިފުށީ ޕޮލިސް ހޯދީ, ފައިނަލްގައި ށ. ކޮމަންޑޫ ލޮބްސްޓަރއާ ވާދަކޮށް 3-1 ސެޓުން މެޗު ކާމިޔާބުކޮށްގެންނެވެ. ފައިނަލް މެޗުގެ މޮޅު ކުޅުންތެރިއަކީ އަލިފުށީ ޕޮލިސްގެ ކަރީމްއެވެ. ފިރިހެން ޑިވިޝަންގެ އެންމެ މޮޅު ހަ ކުޅުންތެރިންނަކީ ކޮމަންޑޫ ލޮބްސްޓަރގެ ހުސެއިން އާރިފް, އަލިފުށީ ވޮލީ ޓީމްގެ ސަނީހު އާދަމްއާއި އިބްރާހީމް މުހައްމަދު, އަލިފުށީ ޕޮލިހުގެ އަހުމަދު މުޒުލިފްއާއި އަހުމަދު މައުރޫފް, އަދި އަލިފުށީ ފެނަކައިގެ އަހުމަދު އަލީމް އަލީއެވެ.

އަންހެން ޑިވިޝަންގެ ޗެމްޕިއަންކަން ސިކްސް ޕެކް ހޯދީ ފައިނަލްގައި އޯލް ސްޓާރއާ ވާދަކޮށް 3-2 ސެޓުން ކުރި ހޯދައިގެންނެވެ. މެޗުގެ މޮޅު ކުޅުންތެރިއަކީ ސިކްސް ޕެކްގެ އައިޝަތު ލަމްޔާއެވެ. މުބާރާތުގެ އަންހެން ޑިވިޝަންގެ އެންމެ މޮޅު ހަ ކުޅުންތެރިންނަކީ; ސިކްސްޕެކްގެ މަރިޔަމް ޝިފާއާއި އައިޝަތު ލަމްޔާ, ޓީމް ވިއްސާރަ ދުނީގެ މައިމޫނާ ޔޫސުފް, ސުޕަރ ސިކްސްގެ އައިޝަތު ފަރާ, އަދި އޯލް ސްޓާރގެ ފާތިމަތު ހިޝާމާއެވެ. އަންހެން ޑިވިޝަންގެ އެންމެ އުއްމީދީ ކުޅުންތެރިއަކީ އޯލް ސްޓާރގެ އައިޝާން ޝާހިދުއެވެ.