އަލިފުށި އެއާޕޯޓާއެކު ރައްޔިތުންގެ ޖީބަށް ލުއިވެ، ތަކުލީފުތަކަށް ނިމުމެއް އަންނާނެ: ކައުންސިލް ރައީސް
އަލިފުށިން ހިއްކާ 50 ހެކްޓަރު ބިމުގެ %80 ޖާގައަކީ އެއަރޕޯޓް ސަރަހައްދަށް ބޭނުންކުރާ ޖާގަ
އަލިފުށި އެއަރޕޯޓް ޓަރމިނަލްގެ ބިންގާއެޅުމުގެ ރަސްމިއްޔާތުގެ ތެރެއިން
ރ.އަލިފުށީގައި ޤާއިމްކުރާ އެއާޕޯޓާއެކު ރައްޔިތުންގެ ޖީބަށް ލުއިވެ މިހާރު ރައްޔިތުން ކުރިމަތިލާ ދަތުރުފަތުރުކުރުމުގެ ތަކުލީފުތަކަށް ނިމުމެއް އަންނާނެ ކަމަށް އަލިފުށީ ކައުންސިލްގެ ރައީސް އާދަމް އިމްރާން ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން އެ އެއާޕޯޓާއެކު ވައިގެ ދަތުރުކުރަން ބޭނުންވާ ފަރާތްތަކުން ކުރާ ޚަރަދު ބޮޑުތަނުން ކުޑަ ކުރެވޭ ކަމަށް އޭނާ ވިދާޅުވިއެވެ. މީގެ އިތުރުން އެ އެއާޕޯޓާއެކު އެ ސަރަހައްދަށް ވަޒީފާގެ އިތުރު ފުރުސަތުތައް ލިބިގެންދާނެ ކަމަށާއި އެކަމާއި އުފާކުރައްވާ ކަަމަށް އޭނާ ވިދާޅުވިއެވެ. އެ ބަދަލާއެކު ކައިރީގައި ހުރި އިތުރު ރަށްރަށަށް ދާން ވެސް ފަސޭހަ ވެގެންދާނެ ކަމަށް އިމްރާން ވިދާޅުވިއެވެ. ހަމައެހެންމެ އަލިފުށީގައި އެއާޕޯޓެއް އެޅުމަކީ އެ ރަށް އިތުރު އެހެން ސިނާއަތުތަކަށް ހުޅުވިގެން ދާނެ ކަމެއްގެ ގޮތުގައި އޭނާ ވަނީ ފާހަގަކުރައްވާފައެވެ. އެގޮތުން ބޯޓިން ދާއިރާ އާއި ލޯކަލް ޓުއަރިޒަމް އަށް އަލިފުށި ހުޅުވާލުމަށް އެކަމުގެ ސަބަބުން ބާރު ލިބޭނެ ކަން ފާހަގަކުރެއްވިއެވެ. އެހެންކަމުން މިއީ ރަށަށް ލިބޭ އާމްދަނީ އިތުރުކުރެވޭނެ މަގެއް ކަން އިމްރާން ވިދާޅުވިއެވެ.
ރ. އަލިފުށީ އެއަރޕޯޓުގެ ޓަރމިނަލްގެ ބިންގާ އަޅާފައި ވަނީ ނިމިދިޔަ ހަފްތާގެ ބުރާސްފަތި ދުވަހުއެވެ. އެ ޓަރމިނަލް އިމާރާތުގެ ބިންގާ އަޅުއްވައިދެއްވީ މި މަޝްރޫއުގެ މަސައްކަތް ހަވާލުކޮށްފައިވާ ކުންފުނި ކަމަށްވާ އެމް.ޓީ.ސީ.ސީގެ ސީއީއޯ އާދަމް އާޒިމްއާއި ރައްޔިތުންގެ މަޖިލީހުގެ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިނާއި ކައުންސިލްގެ ރައީސް އާދަމް އިމްރާނެވެ.
އަލިފުށީ އެއަރޕޯޓް ތަރައްގީކުރުމަށް އެމް.ޓީ.ސީ.ސީއާ ހަވާލުކުރީ ފާއިތުވި އަހަރުގެ ސެޕްޓެމްބަރު މަހުގެ 1 ވަނަ ދުވަހު ކަމަށް ވާއިރު އެ މަޝްރޫއުގެ ދަށުން އަލިފުށީގެ ބިންހިއްކުމާއި، އެއަރޕޯޓް ތަރައްގީކުރުމުގެ މަސައްކަތް ކުރުމަށް ވަނީ ހަމަޖެހިފައެވެެ. އެގޮތުން މިދިޔަ އޮގަސްޓް މަހު ބިން ހިއްކުމުގެ މަސައްކަތް ވަނީ ފަށާފައެވެ. މީގެ އިތުރުން މި ޕްރޮޖެކްޓްގެ ދަށުން އަލިފުށިން 50.5 ހެކްޓަރުގެ ބިން ހިއްކުމަށް ހަމަޖެހިފައިވާކަމަށް އެމްޓީސީސީން ވަނީ ބުނެފައެވެެ. އަދި އެ މަސައްކަތް ނިމެމުންދާވަރަކަށް، އެއަރޕޯޓްގެ އަމަލީ މަސައްކަތްތައް ފަށަމުންދާނެކަމަށް އެ ކުންފުނިން ބުނެއެވެ.
އަލިފުށިން ހިއްކާ 50 ހެކްޓަރު ބިމުގެ %80 ޖާގައަކީ އެއަރޕޯޓް ސަރަހައްދަށް ބޭނުންކުރާ ޖާގައެވެ. ބާކީ 10 ހެކްޓަރު ބޭނުންކުރާނީ އެ ސަރަހައްދުގެ ބޯހިޔާވަހިކަމާއި، ރަށުގައި އިގްތިސާދީ މަސައްކަތަކަށް ބިން ދޫކުރުމަށެވެ.
