ޕީޕީއެމްއާއި އެ ޕާޓީގެ ލީޑާޝިޕް ބަދުނާމުކޮށް މާލޭ ސިޓީ ވިލިމާލޭ ދާއިރާގެ މެންބަރު ނަޙުލާ އަލީ ދައްކަމުން ގެންދަވަނީ ހަގީގަތާ ޚިލާފު ދޮގު ވާހަކަތަކެއްކަމަށް ބުނެ އެ ޕާޓީގެ ސުލޫކީ ކޮމިޓީން ބަލަމުން އަންނަ މައްސަލައިގައި ދިފާއުގައި ޖަވާބުދާރީވާން ބޭނުންވާކަމަށް އޭނާ ވިދާޅުވެއްޖެއެވެ.

ނަހުލާ ވިދާޅުވީ، ސުލޫކީ މައްސަލައެއް ކަމަށްބުނެ ޕީޕީއެމުން ފޮނުވާފައިވާ ސިޓީއަކަށްވާތީ މަގާމުގެ މަސްއޫލިއްޔަތުވެސް އޮތުމާއެކު އެކަމުގައި އަމިއްލަފުޅަށް ޖަވާބުދާރީވާން ބޭނުންވާ ކަމަށެވެ. އަދި އެފުރުސަތު ޕީޕީއެމްގެ ސުލޫކީ ކޮމިޓީން ދިނުމަށް އެދޭ ކަމަށެވެ.

ޕީޕީއެމުން ބުނީ ޕާޓީގެ ލީޑަރޝިޕް ބަދުނާމުކޮށް ނަޙުލާ ދައްކަމުން ގެންދަނީ ހަގީގަތާ ޚިލާފު ދޮގު ވާހަކަތަކެއް ކަމަށެވެ. ޕާޓީގެ އާންމު މެންބަރުންނާއި، ސޯޝަލް މީޑިއާގައި ޕާޓީއާއި ޕާޓީގެ ލީޑަރޝިޕް ބަދުނާމުކޮށް ހަގީގަތާ ޚިލާފު ދޮގު ވާހަކަތައް ފަތުރަން ފަށާފައިވަނީ، ވިލިމާލޭ ދާއިރާގެ، މާލޭ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ބައި-އިލެކްޝަންގައި ޕީޕީއެމްގެ ޓިކެޓްގައި ވާދަ ކުރާ ކެންޑިޑޭޓަށް އެންޓި ކެމްޕެއިންކޮށް، އިދިކޮޅުން ވާދަ ކުރަމުން ގެންދާ ކެންޑިޑޭޓަށް ވޯޓު ހޯދުމުގެ މަސައްކަތްތަކެއް ކުރާކަމުގެ މައުލޫމާތު ހެއްކާއެކު ލިބިފައިވާކަމަށް ޕީޕީއެމުން ބުނެއެވެ.

އެހެންކަމުން އެމައްސަލަ ސުލޫކީ މައްސަލައެއްގެ ގޮތުގައި، ޕާޓީގެ ސުލޫކީކޮމިޓީން ބަލަން ފަށާފައިވާ ކަމަށެވެ. އަދި ޕާޓިގެ ރައީސްގެ ނަންފުޅު ބޭނުންކޮށް، ދޮގު ވާހަކަތައް ދައްކައި މެންބަރުންގެ މެދުގައި ނުތަނަވަސްކަން އުފައްދައި، ފިތުނަ އުފެދޭ ވާހަކަތައް ދައްކަމުންގެންދާކަމަށްވެސް ޕީޕީއެމުން ބުނެއެވެ. އަދި މިކަންކަން ކުރުމުގައި ނަހުލާ އާއެކު އޭނާއަށް ވާގިވެރި ވުމުގައި، އޭނާގެ މަންމަ އާމިނަތު ލީލާ، އާއި ސުލޫކީ ކޮމިޓީއަށް މައްސަލައެއް ހުށަހެޅި އެމައްސަލަ ބަލަން ފެށުމާއެކު، ދޮގު ވާހަކަތަކެއް ދެއްކުމަށްފަހު ޕާޓިން ވަކިވެފައިވާ އޭނާގެ ކޮއްކޮ މަރްޔަމް ނަފްޙާ އަލީވެސް ހިމެނޭ ކަމަށް ވަނީ ބުނެފައެވެ. އެހެންކަމުން ނަހުލާގެ އިތުރުން އާމިނަތު ލީލާގެ ވެސް ސުލޫކީ މައްސަލައެއް ޕާޓިން ބަލަމުން އަންނަ ކަމަށް ޕީޕީއެމުން މިކަމާ ގުޅިގެން ހުކުރު ދުވަހު ނެރުނު ބަޔާނުގައި ބުނެފައިވެއެވެ.

މި ބަޔާނާ ގުޅިގެން ނަހުލާ ކުރެއްވި ފޭސްބުކް ޕޯސްޓެއްގައި ވިދާޅުވީ، ހަގީގަތާ ޚިލާފު ދޮގު ވާހަކަތަކެއް ދައްކައިފައެއް ނުވާނެ ކަމަށެވެ.

ނަހުލާ ވިދާޅުވީ، ޕީއެންސީގެ ނައިބު ރައީސް އަދި ހުޅުމާލޭ ދާއިރާގެ މެންބަރު އިބްރާހިމް ޝުޖާއު އޭނާއަށް ޕާޓީން ކަނޑާލާނެކަމުގެ އިންޒާރު ސިޓީ ކައުންސިލް ތެރޭ ދީ، އޮފީހަށް ދިއުމަށް އުނދަގޫ ކުރާކަމުގެ ޝަކުވާ މިދިޔަ މަހުގެ 20ވަނަ ދުވަހު ހުށައަޅަައިފައިވާނެ ކަމަށެވެ. ނަމަވެސް ޕާޓީގެ ލީޑާޝިޕުން އެއީ އަމިއްލަ ކަމެއް ކަމަށް ބުނެ އެ މައްސަލައަށް މާ ބޮޑު ސަމާލުކަމެއް ދީފައިނުވާކަމަށް އޭނާ ވިދާޅުވިއެވެ.

މި ނޫސްބަޔާނަކީ ޝުޖާގެ ނުފޫޒުން ނެރެފައިވާ ނޫސްބަޔާނެއްކަމަަށްވެސް ނަހުލާގެ ޕޯސްޓުގައިވެއެވެ.

ނަހުލާ އިތުރަށް ވިދާޅުވީ އޭނާއާ ބެހޭގޮތުން ދޮގު ވާހަކަ ފަތުރަނީ ޝުޖާއުގެ ނުފޫޒުން ކަމަށެވެ. އަދި ރައީސް ޔާމީނަށް ތާއީދު ކުރާތީ ކޮންމެފަދަ ދެރައެއް ދިނަސް ފަރުވާލެއް ނެތް ކަމަށް ފޭސްބުކުގައި ނަހުލާ ވިދާޅުވެފައިވެއެވެ. އަދި ޕީޕީއެމްގެ ކެންޑިޑޭޓަށް ވޯޓު ނުދިނުމަށް އެއްވެސް މީހެއްގެ ގާތުގައި ވިދާޅުނުވާ ކަމަށެވެ.

މިކަމުގައި ޖަވާބުދާރީވާން ފުރުސަތު ދެއްވުމަށް ނަހުލާ ވަނީ އެދިވަޑައިގެންފައެވެ.