ކުރީގެ ރައީސް ޔާމީންއަށް އިންޒާރުދިން މައްސަލަ ފުލުހުން ބަލަނީ
6 މެއި 2022 | ހުކުރު 01:07ކުރީގެ ރައީސް ޔާމީންއަށް އިންޒާރު ދިން މައްސަލަ ރައްޔިތުންގެ މަޖިލީހުގެ 241 ކޮމިޓީއަށްވެސް ވަނީ ހުށައަޅާފައި
އިދިކޮޅު ކޯލިޝަނުން ބޭއްވި ޖަލްސާއެއްގައި ރައީސް އަބްދުﷲ ޔާމީން ވާހަކަފުޅު ދައްކަވަނީ
ކުރީގެ ރައީސް ޔާމީން އަބްދުލްޤައްޔޫމްއަށް އިންޒާރުދިން މައްސަލަ ފުލުހުން ބަލަން ފަށައިފިއެވެ.
ފުލުހުން ބުނީ ސޯޝަލް މީޑިއާގައި އާންމު ކޮށްފައިވާ ވީޑިއޯއެއްގައި ކުރީގެ ރައީސް ޔާމީންއަށް އިންޒާރު ދީފައިވާ ކަމަށް ބުނާ މައްސަލައެއް ބަލައި ދިނުމަށް އެދި ފުލުހުންނަށް ހުށައަޅާފައިވަނީ މެއި މަހުގެ 2ވަނަ ދުވަހު ކަމަށެވެ. އަދި ފޭސްބުކްގައި ކޮށްފައިވާ ޕޯސްޓެއް ބަލައި ދިނުމަށް އެދި މެއި 3ވަަނަ ދުވަހު ސިޓީއަކުން ފުލުހުންނަށް ހުށައަޅާފައިވާ ކަމަށެވެ.
އެހެންކަމުން މި ސިޓީތަކާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން މައުލޫމާތުދެއެވެ.
މޯލްޑިވްސް ޔޫތު ފޯސްގެ ނަމުގައި ބަޔަކު ހަރަކާތްތަކެއް ފަށާފައިވަނީ މިދިޔަ ހަފްތާގެ ހޯމަ ދުވަހުން ފެށިގެންނެވެ. އެ ފަރާތްތަކުގެ ޓްވިޓާއެކައުންޓުން އާއްމުކޮށްފައިވާ ވީޑިއޯއެއްގައި ވަނީ އިންޑިއާގެ އަގު ވައްޓާލުމަށް އިދިކޮޅު ކޯލިޝަނުން ކުރަމުން އަންނަ ކަންކަން ހުއްޓާލުމަށް ގޮވާލާފައެވެ. އަދި އިންޑިއާ އައުޓް ހަރަކާތްތަކަށް ފާޑުކިޔައި ރައީސް ޔާމީން "ސައިޒު" ކޮށްލާނެ ކަމަށް ވެސް އެ ވީޑިއޯގައިވަނީ ބުނެފައެވެ.
މީގެ އިތުރުން އަންގާރަ ދުވަހުގެ ހަވީރުގެ ވަގުތުގައި މޯލްޑިވްސް ޔޫތު ފޯސްއިން ވަނީ، ރައީސް ޔާމީން ދިރިއުޅުއްވާ ގެކޮޅު ހ. ދޫވެހި ކުރިމައްޗަށް އެއްވެ މުޒާހަރާ ވެސް ކޮށްފައެވެ. މުޒާހަރާގެ ބައިވެރިން ގޮވާލަމުންދިޔައީ ރައީސް ޔާމީން ހައްޔަރުކޮށް ޖަލަށް ލުމަށެވެ.
ކުރީގެ ރައީސް ޔާމީންއަށް އިންޒާރު ދިން މައްސަލަ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށްވެސް ވަނީ ހުށައަޅާފައެވެ. އެ މައްސަލަ މަޖިލީހަށް ހުށައެޅުއްވީ ގުރައިދޫ ދާއިރާގެ މެމްބަރު ޣައްސާން މައުމޫންއެވެ. އެ މައްސަލަ ބައްލައިދެއްވުމަށް އެދިވަޑައިގެން ޣައްސާން މަޖިލީހަށް ސިޓީ ފޮނުއްވީ އަންގާރަ ދުވަހުއެވެ.
ރައްޔިތުންގެ މަޖިލީހުގެ ރައީސްއަށް ޣައްސާން ފޮނުއްވި ސިޓީގައި ވިދާޅުވީ މޯލްޑިވްސް ޔޫތު ފޯސްގެ ނަމުގައި ހަދާފައިވާ ޓްވިޓާ އެކައުންޓަކުން އާންމު ކުރި ވީޑިއޯއެއްގައި ރައީސް ޔާމީންގެ ހަށިކޮޅަށް ގެއްލުންދޭނެ ކަމުގެ އިންޒާރު ދީފައިވާ ކަމަށެވެ. އެ ވީޑިއޯގައި ފެންނަ މީހާގެ ވާހަކަތަކުން އެމަނިކުފާނަށް ޓެރަރިސްޓް ހަމަލާއެއް ދޭން ރާވާފައިވާ ކަމަށް ބުނެފައިވާ ކަމަށް ވެސް އެސިޓީގައި ޣައްސާން ވަނީ ވިދާޅުވެފައެވެ.
