ސަސް އަތުންވެސް ބަލިވެ، ވެލެންސިޔާ ފަހަތަށް!
5 މެއި 2022 | ބުރާސްފަތި 13:52ވެލެންސިޔާ މިހާރު އޮތީ ފަސްވަނާގައި
ލަނޑުޖެހުމަށްފަހު ސަސް ކުޅުންތެރިން އުފާފާޅުކުރަނީ
ދިރާގު ދިވެހި ޕްރިމިއަރ ލީގުގައި ސުޕަރ ޔުނައިޓެޑް ސްޕޯރޓްސް (ސަސް) އަތުންވެސް ބަލިވެ, ކްލަބް ވެލެންސިޔާ ފަހަތަށް ސޮއްސާލައިފިއެވެ.
ތަފާތު މައްސަލަތަކާއެކު ފޯމް ދަށްވެފައިވާ ވެލެންސިޔާގެ މައްޗަށް ދެވަނަ ބުރުގައި ސަސްއިން ކުރި ހޯދީ 2-0ންނެވެ. ފުރަތަމަ ބުރުގައި ވެލެންސިޔާ ވަނީ ސަސް ބަލިކޮށްފައެވެ. މެޗުގެ ދެވަނަ ހާފްގައި ސަސްގެ ދެގޯލްވެސް ކާމިޔާބުކޮށްދިނީ އަލީ ނަސޫހު ރަޝީދެވެ. މެޗުގެ މޮޅު ކުޅުންތެރިއަކީވެސް އޭނާއެވެ. މިމޮޅާއެކު ސަސް ވަނީ ތާވަލްގެ ތިންވަނާގައި އޮތް ޔުނައިޓެޑް ވިކްޓްރީއާ އަރާހަމަކޮށްފައެވެ. އެއީ 14 ޕޮއިންޓާއެކުއެވެ. ސަސްއާއި ޔޫވީއަށްވުރެ ކުރީގައި ތާވަލްގައި އޮތީ, ދެވަނާގައި އޮތް އީގަލްސްއާއި އެއްވަނާގައި އޮތް މާޒިޔާއެވެ. ވެލެންސިޔާ މިހާރު އޮތީ 13 ޕޮއިންޓާއެކު ފަސްވަނާގައެވެ.
ލީގުގައި ބުރާސްފަތި ދުވަހުގެރޭ ވާދަކުރާނީ ކްލަބް އީގަލްސްއާއި ގްރީން ސްޓްރީޓްސްއެވެ. ހުކުރު ދުވަހު ހަވީރު ވާދަކުރާނީ މާޒިޔާއާއި ޔުނައިޓެޑް ވިކްޓްރީއެވެ.
