ސަރުކާރުގެ އާމްދަނީ 8 ބިލިއަންގައި، ޚަރަދު 11 ބިލިއަނަށް

އަހަރުގެ މިހާތަނަށް ދައުލަތަށް ލިބުނު އާމްދަނީއަށް ވުރެ ދައުލަތުގެ ޚަރަދު އިތުރުކަމަށް ފިނޭންސް މިނިސްޓަރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީއިން އާންމުކޮށްފައިވާ ތަފާސްހިސާބުތައް ދައްކާގޮތުން އޭޕްރިލް 21 ވަނަ ދުވަހުގެ ނިޔަލަށް ދައުލަތަށް އާމްދަނީގެ ގޮތުގައި 8.5 ބިލިއަން ރުފިޔާ ލިބިފައިވާއިރު، 11.2 ބިލިއަން ރުފިޔާ ވަނީ ޚަރަދުކޮށްފައެވެ. އެގޮތުން ރިކަރެންޓް އަދި ކެޕިޓަލް އެކްސްޕެންޑިޗަރގެ ގޮތުގައި ދައުލަތުން ވަނީ 10.5 ބިލިއަން ރުފިޔާ ޚަރަދުކޮށްފައެވެ.

ރިކަރެންޓް އެކްސްޕެންޑިޗަރގެ ގޮތުގައި ޚަރަދުކޮށްފައި ވަނީ 7.7 ބިލިއަން ރުފިޔާއެވެ. އެގޮތުން މުސާރަ އާއި އިނާޔަތްތައް ދިނުމަށް 1.2 ބިލިއަން ރުފިޔާ ހަރަދު ކޮށްފައިވާ އިރު، މުވައްޒަފުންނަށް އެލަވަންސް ދިނުމަށްވެސް 1.2 ބިލިއަން ރުފިޔާ ވަނީ ހަރަދުކޮށްފައެވެ. ޕެންޝަނަށް 301.1 މިލިއަން ރުފިޔާ ހަރަދު ކޮށްފައިވާ އިރު، ރިޓަޔަމެންޓް ބެނެފިޓްގެ ގޮތުގައި 129.5 މިލިއަން ރުފިޔާ ހަރަދު ކޮށްފައިވެއެވެ.

އެޑްމިނިސްޓްރޭޓިވް އަދި އޮޕަރޭޝަނަލް އެކްސްޕެންސްގެ ގޮތުގައި 4.9 ބިލިއަން ރުފިޔާ ވަނީ ހަރަދު ކޮށްފައެވެ.

ދައުލަތުގެ ކެޕިޓަލް އެކްސްޕެނޑިޗަރ އަށް ބަލާއިރު، މިމުއްދަތުގައި 2.8 ބިލިއަން ރުފިޔާ ވަނީ ޚަރަދުކޮށްފައެވެ. އެއީ ކެޕިޓަލް އިކުއިޕްމަންޓަށް 91.6 މިލިއަން ރުފިޔާ، އިންފްރާސްޓްރަކްޗަރ އެސެޓް އަށް 1.7 ބިލިއަން ރުފިޔާ، އަދި ޑިވެލޮޕްމެންޓް ޕްރޮޖެކްޓްސް އާއި އިންވެސްޓްމެންޓް އައުޓްލޭސް އަށް 905.8 މިލިއަން ރުފިޔާއެވެ.

މީގެ އިތުރުން ދައުލަތުގެ ލޯނުތައް ދެއްކުމަށް 681.1 މިލިއަން ރުފިޔާ ހަރަދުކޮށްފައިވާއިރު، ސޮވެރިން ޑިވެލޮޕްމެންޓް ފަންޑަށް 149.9 މިލިއަން ރުފިޔާ ވަނީ ޓްރާންސްފަރ ކޮށްފައެވެ. އަދި ޕީއެސްއައިޕީ މަޝްރޫއުތަކަށް 1.8 ބިލިއަން ރުފިޔާ ވަނީ ހޭދަކޮށްފައެވެ.

މިއަހަރުގެ މިހާތަނަށް ދައުލަތަށް 8.5 ބިލިއަން ރުފިޔާ ލިބިފައިވާއިރު އެންމެ ބޮޑު އާމްދަނީއެއް ލިބިފައި ވަނީ ޓެކުހުންނެވެ. އެއީ 5.9 ބިލިއަން ރުފިޔާއެވެ. އޭގެތެރޭގައި އިމްޕޯޓް ޑިއުޓީގެ ގޮތުގައި ލިބުނު 797.2 މިލިއަން ރުފިޔާ، ބިޒްނަސް ޕްރޮޕަޓީ ޓެކްސްގެ ގޮތުގައި ލިބުނު 1.2 ބިލިއަން ރުފިޔާ، ގްރީން ޓެކުހުގެ ގޮތުގައި ލިބުނު 314.3 މިލިއަން ރުފިޔާ އަދި އެއަރޕޯޓް ސަރވިސް ޗަރޖްގެ ގޮތުގައި ލިބުނު 207.5 މިލިއަން ރުފިޔާ ހިމެނެއެވެ.

ޓެކްސް ނޫން އެހެނިހެން ގޮތްގޮތުން ދައުލަތަށް 2.7 ބިލިއަން ރުފިޔާ ލިބިފައިވާއިރު، ކެޕިޓަލް ރިސީޓް ގެ ގޮތުގައި ދައުލަތަށް ލިބިފައި ވަނީ 5.4 މިލިއަން ރުފިޔާއެވެ. އަދި ގްރާންޓްސްގެ ގޮތުގައި 80.7 މިލިއަން ރުފިޔާ ވަނީ ލިބިފައެވެ.