ރެޓްރޯ ކޮފީ ވޮލީ މުބާރާތް: ލޮބްސްޓަރއާއި އޯލް ސްޓާރ ފައިނަލަށް

އަލިފުށީގައި ކުރިއަށްދާ އެލްދީ ރެޓްރޯ ކޮފީ ވޮލީބޯޅަ މުބާރާތުގެ ފިރިހެން ޑިވިޝަންގެ ފައިނަލުން ކޮމަންޑޫ ލޮބްސްޓަރ, އަދި އަންހެން ޑިވިޝަންގެ ފައިނަލުން އަލިފުށި އޯލް ސްޓާރ ޖާގަ ހޯދައިފިއެވެ.

އޯލް ސްޓާރ ފައިނަލްގެ ޖާގަ ޔަގީންކުރީ ފަސް ޓީމް ވާދަކުރާ މުބާރާތުގައި މިހާތަނަށް ކުޅުނު ތިން މެޗުވެސް ކާމިޔާބުކޮށްގެންނެވެ. ތިންވަނަ މެޗުގައި ބުދަ ދުވަހު ހަވީރު އޯލްސްޓާރ ކުރި ހޯދީ ސިކްސް ޕެކްއާ ވާދަކޮށް ސީދާ ދެސެޓުންނެވެ. މެޗުގެ މޮޅު ކުޅުންތެރިއަކީ އޯލް ސްޓާރގެ ޝަރީފާ އާދަމްއެވެ. މުބާރާތުގައި އޯލް ސްޓާރ ދެވަނަ މެޗު ކާމިޔާބުކުރީ ސުޕަރ ސިކްސްއާ ވާދަކޮށްގެންނެވެ.

ފިރިހެން ޑިވިޝަންގައި ކޮމަންޑޫ ލޮބްސްޓާރ ވަނީ މިހާތަނަށް ކުޅުނު ދެ މެޗުވެސް ކާމިޔާބުކޮށްފައެވެ. މިބައިގައި ވާދަކުރަނީ ހަތަރު ޓީމެވެ. ލޮބްސްޓާރ ތިންވަނަ މެޗުގައި އަލިފުށި ފެނަކަ ބްރާންޗާ ވާދަކޮށް ކުރިހޯދީ ތިން ސެޓް އެއް ސެޓުންނެވެ. މެޗު ލޮބްސްޓަރ ކާމިޔާބުކުރީ ފުރަތަމަ ސެޓް އަލިފުށީ ފެނަކަ ބްރާންޗުން ގެންގޮސްފައިވަނިކޮށެވެ. އަލިފުށީ ފެނަކަ ވަނީ ދެވަނަ މެޗުގައި އަލިފުށީ ޕޮލިސް އަތުން ބަލިވެފައެވެ. ތިން މެޗުގެ ތެރެއިން ފެނަކަ މޮޅުވީ އެއް މެޗުންނެވެ.