ދަތް އަޅައި އަންހެނެއްގެ އިނގިލި ބުރިކޮށްލި މީހަކު ހައްޔަރުކޮށްފި
މާރާމާރީ ހިންގާފައިވަނީ އާދީއްތަ ދުވަހުގެ ރޭ
ދަތް އަޅައި ބުރިކޮށްލި އިނގިލި
ދަތް އަޅައި އަންހެނެއްގެ އިނގިލި ބުރިކޮށްލި ފިރިހެނަކު ހައްޔަރުކޮށްފިއެވެ.
ފުލުހުން ބުނީ ހޯމަ ދުވަހުގެ ފަތިހު ގއ. ވިލިނގިލީގައި ހިންގި އެ މާރާމާރީގެ ތުހުމަތުގައި ހައްޔަރުކޮށްފައިވަނީ އުމުރުން 31 އަހަރުގެ ދިވެހި ފިރިހެނެއް ކަމަށެވެ. އެ މާރާމާރީގައި އޭނާ ވަނީ އިތުރު ތިން މީހަކަށް ވެސް ހަމަލާދީފައެވެ.
އެ ހަމަލާތަކުގައި އަނިޔާވެފައިވަނީ އުމުރުން 60 އަހަރާއި 39 އަހަރާއި 31 އަހަރުގެ ދިވެހި ތިން އަންހެނުންނަށާއި 74 އަހަރުގެ ދިވެހި ފިރިހެނަކަށެވެ. ހަތަރު މީހުންނަށް ވެސް ވިލިނގިލި ހޮސްޕިޓަލުގައި ފަރުވާ ދިނުމަށްފަހު ވަނީ ދޫކޮށްލާފައެވެ.
"ރާއްޖެ އެމްވީ" އަށް މައުލޫމާތު ލިބިފައިވާ ގޮތުގައި އޭނާ ހަމަލާ ދީފައިވަނީ އޭނާގެ ކުރީގެ އަންހެނުންނާއި އާއިލާ މީހުންނަށެވެ. އެގޮތުން އޭނާ ދަތް އަޅައި އިނގިލި ބުރިކޮށްލާފައިވަނީ އޭނާގެ ކުރީގެ އަންހެނުންގެ ދައްތަގެއެވެ. އެ އަންހެން މީހާގެ ވައަތުގެ މެދު އިނގިލި ކުރިން ބައެއް ވަނީ އެއްކޮށް ބުރިކޮށްފައެވެ.
އެ އަންހެން މީހާގެ މަންމަގެ އަތުގެ ދެ އިނގިއްޔެއް ވެސް ވަނީ ބިންދާލައިފައެވެ. އެ މާރާމާރީ ހިންގި އިރު ގޭގައި ކުޑަކުދިންތަކެއް ތިބި ނަމަވެސް އެއްވެސް ކުއްޖަކަށް އަނިޔާއެއް ލިބިފައި ނުވެއެވެ.
މައުލޫމާތު ލިބިފައިވާ ގޮތުގައި އެމީހާ ފުލުހުންގެ ބެލުމުގެ ދަށަށް ގެންގޮސް އަންގާރަ ދުވަހު ވަނީ ކޯޓަށް ހާޒިރުކޮށްފައެވެ. ޝަރީއަތް ނިމެންދެން އޭނާ ބަންދުގައި ބެހެއްޓުމަށް ކޯޓުން އަމުރު ކޮށްފައިވާއިރު ކޯޓުގެ ހުރުމަތް ކަނޑާލާފައިވާތީ އޭނާއަށް 150 ދުވަހުގެ ޖަލު ހުކުމެއް އިއްވާފައިވާ ކަމަށް ވެސް މައުލޫމާތު ލިބެއެވެ.
