ފުލުހުންގެ ބެރިކޭޑްތައް ދުރަށްލައި، ލަންކާގެ ބުދިސްޓުން މުޒާހަރާކުރަން ރައީސް ގަނޑުވަރު ކުރިމައްޗަށް

ލަންކާގެ ސަރުކާރާ ދެކޮޅަށް ކުރާ މުޒާހަރާތަކުގައި އެގައުމުގެ ބުދިސްޓުންވެސް ބައިވެރިވަމުންދާއިރު، އަންގާރަ ދުވަހު މުޒާހަރާކުރި ބުދިސްޓުންތަކެއް ވަނީ ފުލުހުންގެ ބެރިކޭޑުތައް ދުރަށް ޖައްސައި ރައީސް ގަނޑުވަރު ކުރިމަތީގައި މުޒާހަރާކޮށްފައެވެ.

ލަންކާގެ ނޫހެއް ކަމަށްވާ ނިއުސްވަޔަރގައި ރިޕޯޓުކޮށްފައިވާގޮތުން، ލަންކާގެ އިންޓަރ-ޔުނިވަރސިޓީ ބިއްކޫ ފެޑަރޭޝަން (އައިޔޫބޫއެފް)އިން ވަނީ އަންގާރަ ދުވަހު ރައީސް ގަނޑުވަރު ކުރިމަތީގައި މުޒާހަރާކޮށްފައެވެ.

އެނޫހުން ރިޕޯޓުކޮށްފައިވާގޮތުން، އައިޔޫބީއެފްއިން މުޒާހަރާ ފަށާފައިވަނީ ވިހަރަމަހަޑެޝީ ޕާކުންނެވެ. އެއަށްފަހު އެމީހުން ވަނީ ގޯލް ފޭސް ގްރީންއަށް މިސްރާބުޖަހާފައެވެ.

ކޮލޮމްބޯގެ ވޯރލްޑް ޓްރޭޑް ސެންޓަރުގައި ފުލުހުން ބެރިކޭޑު ޖަހައި ބަންދުކޮށްފައި ވަނިކޮށް، މުޒާހަރާގެ ބައިވެރިން ވަނީ އެ ބެރިކޭޑުތައް ދުރަށްޖައްސައި ކުރިއަށްގޮސްފައިކަމަށް ނިއުސްވަޔަރއިން ރިޕޯޓުކުރެއެވެ. އަދި ލަންކާގެ ސެންޓްރަލް ބޭންކް ކައިރީގައި ހުރި ބެރިކޭޑުތައް ދުރަށް ޖައްސައި އެތާނގައިވެސް މުޒާހަރާ ކުރިއަށް ގެންގޮސްފައިވާކަމަށް ރިޕޯޓުކޮށްފައިވެއެވެ.

އެއަށްފަހު ރައީސް ގަނޑުވަރު ހުންނަ ސަރަހައްދަށް ގޮސް އެސަރަހައްދުގައި ވަނީ މުޒާހަރާކޮށްފައެވެ. މިއީ ރައީސް ގަނޑުވަރު ކުރިމަތީގައި މުޒާހަރާކުރި ފުރަތަމަ ފަހަރެވެ. ފުލުހުން ވަނީ އެސަރަހައްދަށް ދެވޭ ހުރިހާ މަގެއް ބެރިކޭޑް ބަހައްޓައި ބަންދުކޮށްފައެވެ.

ރައީސް ގަނޑުވަރު ކުރިމަތީގައި މުޒާހަރާކުރުމަށްފަހު އައިޔޫބީއެފްގެ ބައިވެރިން ވަނީ، ގޯލް ފޭސް ގްރީންއަށް ގޮސް އެތަނުގައި މުޒާހަރާކުރަމުންދާ މީހުންނާ ބައިވެރިވެފައެވެ.

ލަންކާއަށް ދިމާވެފައިވާ އިގުތިސާދީ ކާރިސާއާއެކު އެގައުމުގެ ރައީސްއާއި ބޮޑުވަޒީރު އަދި ސަރުކާރާ ދެކޮޅަށް އަޑުއުފުލާ އެތައް މިލިއަން މީހުންނެއް ދަނީ މުޒާހަރާކުރަމުންނެވެ.