ގިނަ އަދަދެއްގެ ބަނގުރަލާއި، ބައި މިލިއަނެއްހާ ރުފިޔާއާއެކު 3 ބިދޭސީން ހައްޔަރަށް
ހައްޔަރު ކޮށްފައިވަނީ ބަންގްލަދޭޝް މީހަކާއި، ލަންކާ ދެމީހުން
ޑްރަގް އެންފޯސްމަންޓުން ހިންގި އޮޕަރޭޝަނެއްގައި މާލޭގެ ތިން ގެއަކާއި ސައިކަލެއް ބަލައި ފާސްކޮށްފައިވޭ
ޑްރަގް އެންފޯސްމަންޓުން ހިންގި އޮޕަރޭޝަނެއްގައި މާލޭގެ ތިން ގެއަކާއި ސައިކަލެއް ބަލާ ފާސްކޮށް ގިނަ އަދަދެއްގެ ބަނގުރަލާއި ފައިސައާއެކު ތިން މީހަކު ހައްޔަރުކޮށްފިއެވެ.
ފުލުހުން ވަނީ މި އޮޕަރޭޝަނާ ގުޅޭ މައުލޫމާތު މީޑިއާތަކާ ހިއްސާކޮށްފައެވެ. އެގޮތުން މި އޮޕަރޭޝަނުގައި ހައްޔަރު ކޮށްފައިވަނީ 27 އަހަރުގެ ސްރީލަންކާ ފިރިހެނަކާއި، 31 އަހަރުގެ ސްރީލަންކާ ފިރިހެނަކާއި، 29 އަހަރުގެ ބަނގުލަދޭޝް ފިރިހެނެއް ކަމަށް ފުލުހުން މައުލޫމާތު ދެއެވެ.
ފުލުހުން މައުލޫމާތު ދޭ ގޮތުގައި މި ތިން މީހުންވެސް ހައްޔަރު ކޮށްފައިވަނީ މާލެއަށް ޤަވާއިދާ ހިލާފަށް ބަނގުރާ އެތެރެކޮށް، ބަނގުރާ ބޭނުންކޮށް، އެތަކެތީގެ ވަގުވިޔަފާރި ފުޅާ ދާއިރާއެއްގައި ކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމަތަކާ ގުޅިގެން ހިންގި އޮޕަރޭޝަނެއްގެ ތެރެއިންނެވެ. މިއީ ކައުންޓަރ ނާކޮޓިކްސް އިންޓެލިޖަންސް ޑިޕާޓްމަންޓާއި، ޑްރަގް އެންފޯސްމަންޓް ގުޅިގެން އޭޕްރީލް މަހުގެ 30 ވަނަ ދުވަހު ހިންގި ހާއްސަ އޮޕަރޭޝަނެކެވެ.
އެމީހުން ހައްޔަރުކޮށް ބަލައި ފާސްކުރިއިރު ގިނަ އަދަދެއްގެ ދިވެހި ރުފިޔާ ފެނިފައިވާ ކަމަށް ފުލުހުން ބުނެއެވެ. އަދި ބަލައި ފާސްކުރި ތިން ގެއިންވެސް ގިނަ އަދަދެއްގެ ބަނގުރަލާއި ގިނަ އަދަދެއްގެ ދިވެހި ފައިސާ އާއި އެމެރިކާ ޑޮލަރު ފެނިފައިވާއިރު، ޖުމްލަ 79 ފުޅި ބަނގުރާ ފެނުނުކަމަށް ފުލުހުން ބުނެއެވެ.
އޭގެ އިތުރުން، 245000ށް ވުރެ ގިނަ ދިވެހި ފައިސާއާއި 14500ށް ވުރެ ގިނަ އެމެރިކާ ޑޮލަރާއި 50 ޔޫރޯ ފެނިފައިވާއިރު، އޭގެ ޖުމުލަ އަގު ދިވެހި ރުފިޔާއިން އަގުކުރާއިރު ބައި މިލިއަނާއި ގާތް ކުރެއެވެ.
މި އޮޕަރޭޝަނުގައި ހައްޔަރު ކޮށްފައިވާ ތިން މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ވަނީ ތިން މީހުންނަށް 15 ދުވަހުގެ މުއްދަތެއް ދީފައެވެ.
މި މައްސަލަ ޑްރަގް އެންފޯސްމަންޓުން ދަނީ ތަހުގީގު ކުރަމުންނެވެ.
