ހަނގުރާމަ ހިނގަމުން ދާ ޔޫކްރެއިނުން ރަޝިޔާ އަށް މީހުން ގެންދަން ފަށާފައިވާކަމަށް ޚަބަރުލިބިއްޖެއެވެ. ޔޫކްރެއިނުން މިހާތަނަށް 11،500 މީހުން ރަޝިއާއަށް ގެންގޮސްފައިވާއިރު އޭގެ ތެރޭގައި 1،847 ކުޑަކުދިން ހިމެނޭ ކަމަށް ރަޝިއާގެ ޑިފެންސް މިނިސްޓްރީން ބުނެފައިވެއެވެ.
އެ ވުޒާރާއިން ބޭރުގެ މީޑިއާތަކަށް މައުލޫމާތު ދީފައިވާގޮތުގައި ޔޫކްރެއިނުން ރަޝިއާއަށް މީހުން ގެންދަނީ އެމީހުން އެގޮތަށް އެދިގެންނެވެ. އެކަމުގައި ޔޫކްރެއިން ސަރުކާރުގެ އެއްވެސް އެހީއެއް ނުލިބޭ ކަމަށް ވެސް ވަނީ ބުނެފައެވެ.
ރަޝިއާއިން އެ ގައުމަށް ގެންދަނީ ޔޫކްރެއިނުގައި މިނިވަން ދައުލަތެއް ކަމަށް އިއުލާންކޮށްފައިވާ ސަރަހައްދުތަކުގައި ދިރިއުޅޭ މީހުންނެވެ. އެ މީހުން ރަޝިއާއަށް ގެންދަނީ މިހާރު ޔޫކްރެއިނުގައި ކުރިއަށްދާ ހަނގުރާމައާއި ގުޅިގެން އެމީހުންނަށް ރައްކާތެރިކަން ދިނުމަށެވެ.
ޔޫކްރެއިނުން މީހުން ގެންދަނީ އަމިއްލައަށް ބޭނުންވެގެން ކަމަށް ރަޝިއާއިން ބުނިނަމަވެސް ޔޫކްރެއިން ސަރުކާރުން ބުނެފައިވަނީ އެ މީހުން ގެންދަނީ ގަދަ ކަމުން ކަމަށެވެ.
ރަޝިޔާއިން ޔޫކްރެއިންގައި ދެމުންގެންދާ ހަމަލާތަކަކީ މިނިވަންކަން އިއުލާނު ކޮށްފައިވާ ސަރަހައްދުތަކުގެ ހިމާޔަތުގައި ހިންގަމުން އަންނަ ހާއްސަ މިލިޓަރީ އޮޕަރޭޝަނެއް ކަމަށް ރަޝިޔާ އިން އަންނަނީ ބުނަމުންނެވެ. ކުރީގެ ޚަބަރުތައް ބުނެފައިވާ ގޮތުގައި އެސަރަހައްދު ތަކުގެ ގިނަ މީހުން ރަޝިޔާ އަށް ތާއީދު ކުރެއެވެ.
