މީގެ ދެއަހަރު ކުރިއަށް ޖެހިލާއިރު، ކޮވިޑާގުޅިގެން ވަރަށް ގިނަކަންތައްތައް ހުއްޓުމަކަށް އައެވެ. ކުރިން ކޮށްއުޅުނު އެތައް ކަމެއް ހުއްޓާލައި، އެތައް ދުވަހެއް ވަންދެން އާންމުން ގޭގައި ބަންދުވެފައި ތިބެންޖެހުނެވެ. އެތައް އުފާތަކުން މަހްރޫމްވެފައެވެ. ލޯބިވާ މީހުންނާ ދުރުގައި އެތައް ދުވަހެއް ހޭދަކުރަން ޖެހުނެވެ. އެއީ ހިތްދަތި، ހަނދާނުން ފޮހެލަން ދަތި ދުވަސްވަރެކެވެ.
ދެއަހަރަށްފަހު ދިވެހިރާއްޖެވެސް މިވަނީ މަޑުމަޑުން އާންމުން ހާލަތަށް ދާން ފަށާފައެވެ. ކޮވިޑާގުޅިގެން އަޅާފައިވާ ގިނަ ފިޔަވަޅުތަކަށް ލުއިދޭން މިވަނީ ފަށާފައެވެ. މާސްކް އެޅުންވެސް މިހާރު މަޖުބޫރެއް ނޫނެވެ. މިއާއެކު އާންމުންނަށް ވަރަށް ގިނަ ކަންތައްތައް ފަސޭހަކަމާއެކު ކުރުމުގެ މަގުފަހިވެގެން ދިޔައެވެ. މިއަހަރުގެ ރޯދަމަސް ވެސް އެންމެން ކަހަލަ ގޮތަކަށް ހޭދަކުރީ ވަރަށް ހިތްހަމަޖެހިގެން ތިބެއެވެ. އެއީ ގޭގައި ބަންދުވެފައި ތިބެން ނުޖެހުމުންނެވެ.
ކޮވިޑާގުޅިގެން މާލެ ސަރަހައްދުގައި ބޮޑު ޖަމާއަތުގައި އީދު ނަމާދުކުރުން ވެސް އޮތީ ދެއަހަރު ވަންދެން ހުއްޓުމަކަށް އައިސްފައެވެ. އީދު ވެސް ފާހަގަކުރަން ޖެހުނީ ގިނަ މީހުން ގޭގައި ތިބެގެން، އޮންލައިންކޮށް އާއިލާ މެމްބަރުންނަށް ފޮނުވި ތަހުނިޔާއާއެކުގައެވެ. އެހެންނަމަވެސް މިފަހަރު ހާލަތު ތަފާތެވެ. ދެ އަހަރަށްފަހު މާލެސަރަހައްދުގައި މިވަނީ ބޮޑު ޖަމާއަތުގައި އީދު ނަމާދުކޮށްފައެވެ.
ކުދި ބޮޑު އެންމެންގެ މޫނުމަތިން ފެނިގެން ދިޔައީ އުފާވެރިކަމެވެ. ހިނިތުންވުމެވެ. ކުޑަކުދިން ވެސް އެ ކުދިންގެ އީދު ހެދުމުގައި އީދު ނަމާދުކުރަން ގޮސް ތިބިއިރު ނުލާހިކު ރީއްޗެވެ. ޗާލެވެ. ބޮޑު ޖަމާއަތުގައި އީދު ނަމާދު ކުރަން ބައެއް މީހުން ދިޔައީ އެމީހުންގެ އާއިލާ މެމްބަރުންނާ އެއްކޮށެވެ. މަންމަ، ބައްޕަ، ބޭބެ، ދައްތަ އަދި ކޮއްކޮ އެކުގައި، މި އުފާވެރި ދުވަހުގައި ނަމާދަށް ގޮސް އުޅުން މަންޒަރު ފެނިގެންދިޔައެވެ. އެ މަންޒަރަކީ ބަލާލަން ނުލާހިކު އުފާވެރި މަންޒަރެކެވެ. މިކަމުގެ ސަބަބުން އާއިލީ ގުޅުންތައް ބަދަހިވެގެންދާނެއެވެ.
އެންމެ އުފާވެރި މަންޒަރަކަށް ފެނިގެންދިޔައީ އެކަކު އަނެކަކަށް އީދުގެ ތަހުނިޔާ އަރިސްކޮށް، ސަލާން ކުރަމުން ދިޔަ މަންޒަރެވެ. ކުޑަކުދިންނާއި ބޮޑެތި މީހުން ވެސް ސަލާން ބަދަލުކޮށް، ހިނިތުންވުމަކާއެކު ބައްދަލު ކުރަމުންދިޔައެވެ.
ފިތުރު އީދުގެ ކުޅިވަރުތައް އެހާ ކުލަގަދަ ގޮތެއްގައި ފާހަގަ ނުކުރިނަމަވެސް، އީދު ނަމާދަށްފަހު ގެތަކުގައި ހެނދުނުގެ ސައި ހަދައެވެ. އާންމު ގޮތެއްގައި ކުޅި ބޯކިބަލާއި ފޮނި ބޯކިބާ ގިނަ މީހުން ހަދައެވެ. މިއީ ވެސް މި ޚާއްސަ ދުވަސް ފާހަގަކުރުމަށް ގިނަ މީހުން ކޮށްއުޅޭ ކަމެކެވެ. ދެ އަހަރަށްފަހު މި އީދު ވެސް މިވެގެންދިޔައީ އެންމެން އެކުވެ، ގުޅުންތައް ބަދަހިކުރުމަށް ލިބުނު ވަރަށް ރަނގަޅު ފުރުސަތަކަށެވެ.
