މާލޭގައި ދެ މާރާމާރީއެއް ހިންގައި ހަތަރު މީހަކު ޒަޚަމްކޮށްލައިފިއެވެ.

ފުލުހުން މައުލޫމާތު ދޭ ގޮތުގައި ފުރަތަމަ މާރާމާރީ ހިންގާފައިވާ ކަމުގެ މައުލޫމާތު އެ މުއައްސަސާއަށް ލިބިފައިވަނީ ހޯމަ ދުވަހުގެ ހެނދުނު 5:48 ހާއިރުއެވެ. އެ މާރާމާރީ ހިންގާފައިވަނީ ކޯރުކެނޑި މަގު، މާވެޔޮ މިސްކިތް ކައިރީގަ އެވެ.

އެ މާރާމާރީގައި ޒަޚަމްވެފައިވަނީ 23 އަހަރުގެ ދިވެހި ދެ ފިރިހެނުންނެވެ. އެ މާރާމާރީގައި ޒަޚަމްވި ދެ މީހުން ގެންގޮސްފައިވަނީ އައިޖީއެމް ހޮސްޕިޓަލަށެވެ.

ރާއްޖެ އެމްވީއަށް މައުލޫމާތު ލިބިފައިވާ ގޮތުގައި ޒަޚަމްވެގެން އައިޖީއެމްއެޗަށް ގެންދިޔަ ދެ މީހުންގެ ތެރެއިން އެކަކު ވަނީ ދޫކޮށްލާފައެވެ. ނަމަވެސް ދެވަނަ މީހާގެ މައިބަދައަށް ތޫނު އެއްޗަކުން ގިނަ ޒަހަމްތަކެއް ލިބިފައިވާތީ އަދިވެސް އޭނާއަށް ދަނީ ފަރުވާ ދެމުންނެވެ.

ދެވަނަ މާރާމާރީގެ މައުލޫމާތު ފުލުހުންނަށް ލިބިފައިވަނީ ހޯމަ ދުވަހުގެ ހެނދުނު 9:17 ހާއިރުއެވެ. އެ މާރާމާރީގައި ވެސް ދިވެހި ދެ ފިރިހެނަކަށް އަނިޔާވެފައިވާއިރު އެ ދެ މީހުން ގެންގޮސްފައިވަނީ އޭޑީކޭ ހޮސްޕިޓަލަށެވެ.

އޭޑީކޭއިން މައުލޫމާތު ދިން ގޮތުގައި އެ ހޮސްޕިޓަލަށް ގެންދިޔަ ދެ މީހުންނަށް ވެސް އަދިވެސް ދަނީ ފަރުވާ ދެމުންނެވެ.

މީސްމީޑިއާގައި ދައުރުވާ ވީޑިއޯތަކާއި ފޮޓޯތަކުން ފެންނަ ގޮތުގައި އެ މާރާމާރީތަކުގައި ޒަޚަމްވި މީހުންނަށް ވެސް ހަމަލާ ދީފައިވަނީ ތޫނު އެއްޗަކުންނެވެ.

އެ މާރާމާރީތަކާ ގުޅިގެން އިތުރަށް ބަލަން ޖެހޭ ކަންކަން މިހާރު ބަލަމުން އަންނަ ކަމަށް ވެސް ފުލުހުން ބުނެއެވެ.