އެލްދީ ރެޓްރޯ ވޮލީބޯޅަ މުބާރާތް ރ.އަލިފުށީގައި ފަށައިފިއެވެ. ފިތުރި އީދުގެ މުނާސަތުގައި ކުރިއަށް ގެންދާ މުބާރާތުގައި ދެ ޑިވިޝަން ހިމެނެއެވެ. މުބާރާތުގެ އަންހެން ޑިވިޝަންގައި ފަސް ޓީމް އަދި ފިރިހެން ޑިވިޝަންގައި ހަތަރު ޓީމް ވާދަކުރެއެވެ.

މުބާރާތުގައި އާދިއްތަ ދުވަހުގެރޭ ތިން މެޗު ކުޅުނެވެ. އެއީ އަންހެން ޑިވިޝަންގެ ދެ މެޗާއި ފިރިހެން ޑިވިޝަންގެ އެއް މެޗެވެ. އަންހެން ޑިވިޝަންގެ ދެ މެޗު ކާމިޔާބުކުރީ ސުޕަރ ސިކްސްއާއި, ސިކްސް ޕެކްއެވެ. ފިރިހެން ޑިވިޝަންގެ މެޗު ކާމިޔާބުކުރީ އަލިފުށި ފެނަކައެވެ.

ފުރަތަމަ މެޗު ސުޕަރ ސިކްސް ކާމިޔާބުކުރީ ތަހުނިޔާއާ ވާދަކޮށް ސީދާ ދެ ސެޓުންނެވެ. މެޗުގެ މޮޅު ކުޅުންތެރިއަކީ ސުޕަރ ސިކްސްގެ ނަދީމާއެވެ. ސިކްސް ޕެކް މެޗު ކާމިޔާބުކުރީ ވިއްސާރަ ދުންޏާ ވާދަކޮށް ސީދާ ދެ ސެޓުންނެވެ. މެޗުގެ މޮޅު ކުޅުންތެރިއަކީ ވިއްސާރަ ދުނީގެ ޝިއުނާއެވެ. މުބާރާތުގެ އަންހެން ޑިވިޝަންގެ ކުރިއަށްގެންދަނީ ތިން ސެޓް ކުޅޭ ގޮތަށެވެ.

ފިރިހެން ޑިވިޝަންގެ ފުރަތަމަ މެޗު އަލިފުށި ފެނަކަ ކާމިޔާބުކުރީ އަލިފުށި ވޮލީ ޓީމާ ވާދަކޮށް 3-1 ސެޓުންނެވެ. މެޗުގެ މޮޅު ކުޅުންތެރިއަކީ ފެނަކަ ޓީމްގެ އަލީމްއެވެ. މުބާރާތުގެ ދެ ޑިވިޝަންގެ ކުރިއަށްދަނީ ލީގުބުރެއް ކުޅެ, އެންމެ ގިނަ ޕޮއިންޓް ހޯދާ ދެޓީމް ފައިނަލަށް ދާގޮތަށެވެ. ފައިނަލް މެޗުތައް ކުޅޭނީ ހުކުރު ދުވަހުއެވެ. ރެޓްރޯ ކޮފީ ފުޓްސަލް މުބާރާތުގެ ފައިނަލް މެޗު ހޯމަ ދުވަހުގެރޭ ކުޅޭނެއެވެ.