ސްރީލަންކާގައި ވިއްކާ ބައެއް ބޭހުގެ އަގު 40 އިންސައްތަ މައްޗަށް ޖައްސާލައިފި

ފާއިތުވި 6 ހަފްތާ ތެރޭގައި ސްރީލަންކާއިން ބޭހުގެ އަގު ދެވަނަ ފަހަރަށް މަތިކޮށްފިއެވެ.

އިޤްތިސާދީ ކާރިސާއަކާއި ކުރިމަތިލަމުން އަންނަ ސްރީލަންކާއިން ބައެއް ބޭހުގެ އަގު 40 އިންސައްތަ މައްޗައް ޖައްސާލާފައިވާއިރު، މީގެ ތެރޭގައި އެންޓިބަޔޮޓިކް، ބައެއް ބާވަތްތަކުގެ ތަދުކަނޑުވާ ބޭސް އަދި ހިތުގެ ބައްޔަށް ބޭނުންކުރާ ބައެއް ބޭސްތައް ހިމެނެއެވެ.

ސްރީލަންކާގެ ރައްޔިތުންނަށް މިހާރުވެސް ބޭސް ލިބުމުގައި ދަތިތައް ދިމާވެފައިވާއިރު، ގިނަ ބޭސްތައް ގެންނަން ޖެހެނީ އެޤައުމުން ބޭރުންނެވެ.

ސްރީލަންކާ ސަރުކާރުން ބުނެފައިވަނި ފާމަސޫޓިކަލް ޕްރޮޑަކްޓްސްތަކުގެ އަގު ބޮޑުކުރުން ނޫން އެހެން އެއްވެސް ގޮތެއް ނެތް ކަމަށެވެ. މީގެ އިތުރުން ބޭރު ފައިސާގެ ރިޒާވް އިތުރުކުރުމަށް ވެސް ސްރީލަންކާ ސަރުކާރުން ދަނީ މަސައްކަތްތަކެއް ކުރަމުންނެވެ. މީގެ ތެރޭގައި ޒަރޫރީ ބޭހާއި ކާނާގެ ބައެއް ތަކެތި އެތެރެކުރުން މަނާކުރުން ހިމެނެއެވެ.

ބޭހުގެ އަގު ބޮޑުކުރުމާއެކު، އެޤައުމުގެ ސިއްޙީ ދާއިރާގެ ބޭފުޅުން ވަނީ އެކަމާއި ކަންބޮޑުވުން ފާޅުކުރައްވާފައެވެ. އަދި ބަލި މީހުންނަށް ލިޔެދޭ ބޭސްތައް މަދުން ގަތުމުގެ ބިރު އޮތްކަމަށް ސިއްޙީ ދާއިރާގެ ބޭފުޅުން ވަނީ ހާމަކުރައްވާފައެވެ. އަދި ބޮޑު އަގުގައި ބޭސް ގަންނަން ބޭނުންވިޔަސް ބައެއް ބޭސްތައް ލިބުމުގައި ދަތިތައް ހުރުމުން ވެސް އާންމުންގެ ކަންބޮޑުވުން އެބައޮތެވެ.

ކުޑަކުދިންނަށް ބޭނުންވާ އެންޓިބައޮޓިކްސް އަދި ފުރާނަ ސަލާމަތްކުރުމަށް ބޭނުންވާ އެންޓިބައޮޓިކްސާއި ސްޓެރޮއިޑްސް ލިބުމުގައިވެސް ގޮންޖެހުންތަކެއް ވަނީ ދިމާވެފައެވެ. މިއާއެކު ސްރީލަންކާގެ ހާލަތު އޮތްގޮތުން ރުޅި އައިސްފައިވާ ރައްޔިތުންގެ މެދުގައި ވަނީ އިތުރު ނުތަނަވަސްކަމެއް ވެރިވެފައެވެ. ސްރީލަންކާގައި ކައްކާ ގޭހާއި ހިކި ކިރު އަދި ތެލުގެ އަގު ބޮޑުވުމުގެ ސަބަބުން ވެސް އެކަމާއި ދެކޮޅަށް އެޤައުމުގެ ރައްޔިތުންދަނީ އަޑު އުފުލަމުންނެވެ.