ރެޓްރޯ ކޮފީ ފުޓްސަލް މުބާރާތް: ފައިނަލްގައި ޓްރިޕަލް އޭޔޫއާއި ފޯރި އެފްސީ

އަލިފުށީގައި ކުރިއަށްދާ ރެޓްރޯ ކޮފީ ފުޓްސަލް މުބާރާތުގެ ފައިނަލުން ފޯރި އެފްސީއާއި, ޓްރިޕަލް އޭޔޫ ޖާގަ ހޯދައިފިއެވެ.

ޓްރިޕަލް އޭޔޫ ފައިނަލުން ޖާގަ ހޯދީ ސެމީފައިނަލްގައި ށ.ކޮމަންޑޫ ލޮބްސްޓާއާ ވާދަކޮށް 5-2 ން ކުރި ހޯދައިގެންނެވެ. މެޗުގައި ޓްރިޕަލް އޭޔޫގެ އަހުމަދު އާދަމްއާއި, އަފްރާހު ނަސީމް ކޮންމެ ކުޅުންތެރިއަކު ދެ ލަނޑު ޖެހިއެވެ. އަނެއް ލަނޑު ޖެހީ އާދަމް އިމްރާންއެވެ. ލޮބްސްޓާގެ ފުރަތަމަ ލަނޑު ޖެހީ ތޯހާ ވަހީދެވެ. އެޓީމްގެ ދެވަނަ ލަނޑުޖެހީ ވިލްދާން އަހުމަދެވެ. މެޗުގެ މޮޅު ކުޅުންތެރިއަކީ ޓްރިޕަލް އޭޔޫގެ އަހުމަދު އާދަމްއެވެ.

ފައިނަލްގެ ދެވަނަ ޖާގަ ފޯރި އެފްސީ ހޯދީ ވާދަވެރި ކުޅުމަކަށްފަހު 3-2 ން ޓްރިޕަލް އޭޔޫ މިކްސް ބަލިކޮށްގެންނެވެ. މެޗުގައި ފޯރި އެފްސީގެ ތިން ލަނޑުވެސް ޖެހީ މުޙައްމަދު މުއީންއެވެ. މެޗުގެ މޮޅު ކުޅުންތެރިއަކީވެސް އޭނާއެވެ. ޓްރިޕަލް އޭޔޫ މިކްސްގެ ދެ ލަނޑު ޖެހީ އަހުމަދު ޝަމީޒުއެވެ. ފޯރި އެފްސީއާއި, ޓްރިޕަލް އޭޔޫ ވާދަކުރާ ފައިނަލް މެޗު ކުޅޭނީ އީދު ދުވަހުގެ ރެއެވެ.