ކޮންޓްރޯލެއް ނެތި މިފްކޯއިން މަސް ގަންނަން ފަށައިފި

މަސް ގަތުން ކޮންޓްރޯލުން ދޫކޮށް ހޮނިހިރު ދުވަހުން ފެށިގެން ކޮންޓްރޯލްއެއް ނެތި މިފްކޯއަށް މަސް ގަންނަން ފަށައިފިއެވެ.

މިފްކޯއިން ބުނީ ދެކުނުގެ މަސްވެރިކަން މާރޗް މެދުތެރެއިން ފެށިގެން އާދަޔާއި ޚިލާފަށް ރަގަޅުވެ އެއްފަހަރާ ގިނަދޯނިފަހަރުތަކެއް ސެންޓަރުތަކާއި ބޯޓުފަހަރަށް މަސްކިރުވުމަށް ގޮސްފައިވާތީ މިފްކޯގެ ފްރީޒިންގ ކެޕޭސިޓީއަށް ވުރެން އިތުރަށް މަސް ލިބެމުން ގޮސްފައިވާ ކަމަށެވެ.

މިކަމާއިގުޅިގެން މަސްވެރިން ބާނާމަސް، ގިނަ ދޯނިފަހަރަށް ކިރުވޭނެގޮތް ހަމަޖައްސައި ދިނުމަށްޓަކައި 6 އެޕްރީލް 2022 އިން ފެށިގެން މަސްކިރުން ކޮންޓްޜޯލް ކުރެވިފައިވެއެވެ. ނަމަވެސް 30 އެޕްރީލް 2022 ފެށިގެން ކޮންޓްރޯލް ކުރުމެއްނެތި މަސްކިރުމުގެ މަސައްކަތް ކުރިޔަށް ގެންދެވޭނެކަމަށް މިފްކޯއިން ބުނެފައިވެއެވެ.

މި މަހުގެ ކުރީ ކޮޅުގައި ދޯންޏަކުން 5 ޓަނުގެ މަސް ގަންނަން ނިންމި ނަމަވެސް މަސްވެރިންގެ ޑިމާންޑާއި އެކު ދޯންޏަކުން 7 ޓަނުގެ މަސް ގަންނަން ފުރަތަމަ ނިންމިއެވެ. އަދި އޭގެފަހުން ހޮނިހިރު ދުވަހުން ފެށިގެން ކޮންޓްރޯލް މިވަނީ ދޫކޮށްލާފައެވެ.

އެ ކުންފުނިން ބުނީ މިފްކޯއިން އަބަދުވެސް މަސައްކަތްކުރަމުން ގެންދަނީ މަސްވެރިންނަށް ދެވޭ ޚިދުމަތުގެ ފެންވަރު ރަނގަޅުކުރުމަށާއި އަވަސް ޚިދުމަތް ފޯރުކޮށްދީ، މަސްވެރިންގެ ކަންބޮޑުވުންތައް ބަލައިގަނެ އެކުންފުނިން ދެވޭ ޚިދުމަތަކީ މަސްވެރިންނަށް ފަސޭހަ ޚިދުމަތަކަށް ހެދުމަށެވެ.