އަލިފުށީގައި މިހާރުކުރިއަށްދާ ރެޓްރޯ ކޮފީ ފުޓްސަލް މުބާރާތުގެ ސެމީފައިނަލްގައި ވާދަކުރާނެ ޓީމްތައް ކަށަވަރުވެއްްޖެއެވެ. މުބާރާތުގެ ސެމީފައިނަލުން ޖާގަހޯދީ ޓްރިޕަލް އޭޔޫއާއި, ލޮބްސްޓަރ އެފްސީއާއި, ފޯރި އެފްސީއާއި, ޓްރިޕަލް އޭޔޫ މިކްސްއެވެ.
ގްރޫޕް އޭގެ އެއްވަނަ ޓީމްގެ ގޮތުގައި ސެމީފައިނަލްގެ ޖާގަހޯދީ ޓްރިޕަލް އޭޔޫއެވެ. އެޓީމް ވަނީ ކުޅުނު ތިން މެޗުވެސް ކާމިޔާބުކޮށް ނުވަ ޕޮއިންޓް ހޯދާފައެވެ. އެޓީމްގެ ފަހު މެޗު ޓްރިޕަލް އޭޔޫ މިކްސްއާ ވާދަކޮށް ކާމިޔާބުކުރީ 2-1ންނެވެ. މެޗުގައި ޓްރިޕަލް އޭޔޫގެ ދެ ލަނޑު ކާމިޔާބުކޮށްދިނީ އަހުމަދު އާދަމާއި ނާއިލެވެ. ޓްރިޕަލް އޭޔޫ މިކްސްގެ ލަނޑު ކާމިޔާބުކޮށްދިނީ ޝަމީޒެވެ. މެޗުގެ މޮޅު ކުޅުންތެރިއަކީ ޓްރިޕަލް އޭޔޫގެ އާދަމް އިމްރާނެވެ. މެޗުން ބަލިވިޔަސް ޓްރިޕަލް އޭޔޫ މިކްސްވެސް ވަނީ ސެމީފައިނަލަށް ދަތުރުކޮށްފައެވެ. އެއީ ތިން ޓީމް އެއްކޮށް އެންމެ ރަނގަޅު ނަތީޖާ ހޯދި ދެވަނަ ޓީމްގެ ގޮތުގައެވެ. ޓްރިޕަލް އޭޔޫ މިކްސްއިން ވަނީ ދެ މެޗުން މޮޅުވެ ހަ ޕޮއިންޓް ހޯދާފައެވެ.
ގްރޫޕް ބީގެ އެއްވަނަ ޓީމްގެ ގޮތުގައި ސެމީފައިނަލުން ޖާގަ ހޯދީ ލޮބްސްޓަރ އެފްސީއެވެ. އެޓީމް ވަނީ އެއް މެޗުން މޮޅުވެ, އެއް މެޗުން އެއްވަރުކޮށް ހަތަރު ޕޮއިންޓް ހޯދާފައެވެ. ސެމީގެ ޖާގަ ލިބުނީ ފައިދާ ގޯލުން ކުރި ހޯދައިގެންނެވެ. މިގްރޫޕުން ދެވަނަ ހޯދި ޔުނައިޓެޑް އޭޖީންވެސް ވަނީ ހަތަރު ޕޮއިންޓް ހޯދާފައެވެ. ޔުނައިޓެޑް އޭޖީން ދެވަނަ މެޗު ހުކުރު ދުވަހުގެރޭ އެފްސީ ވަނދުކަރާއާ ވާދަކޮށް 8-1ން ކާމިޔާބުކުރިއެވެ. އެ މެޗުގައި ޔުނައިޓެޑް އޭޖީގެ އަލީ އަބްދުالله ފަސް ލަނޑު ޖެހިއެވެ. މެޗުގެ މޮޅު ކުޅުންތެރިއަކީވެސް އޭނާއެވެ. އެޓީމްގެ އަނެއް ތިން ލަނޑުގެ ތެރެއިން ދެ ލަނޑު ޖެހީ މުއާޒެވެ. އެޓީމަށް ދެން ލަނޑު ޖަހައިދިނީ ޒަޔާނެވެ. ވަނދުކަރާގެ ލަނޑު ޖެހީ އިބްރާހީމް މުހައްމަދެވެ.
ގްރޫޕް ސީގެ އެއްވަނަ ހޯދީ ފޯރި އެފްސީއެވެ. އެޓީމް އެއްވަނަ ހޯދީ ދެ މެޗުވެސް ކާމިޔާބުކޮށް ހަ ޕޮއިންޓާއެކުއެވެ. ދެވަނަ މެޗު ބްލެކް ހޯކްއާ ވާދަކޮށް ކާމިޔާބުކުރީ 9-0ންނެވެ. ލޮބްސްޓަރގެ އިޝާމް ހަތަރު ލަނޑު، އަދި ރައުޝަމް ތިން ލަނޑު ޖަހައި ހެޓްރިކް ހެދިއެވެ. އެޓީމްގެ އަނެއް ދެ ލަނޑު ޖެހީ މުއީނެވެ. މެޗުގެ މޮޅު ކުޅުންތެރިއަކީ އިޝާމެވެ.
ހޮނިހިރު ދުވަހުގެރޭ ސެމީފައިނަލް ފުރަތަމަ މެޗުގައި ވާދަކުރާނީ ޓްރިޕަލް އޭޔޫއާއި ލޮބްސްޓާ އެފްސީއެވެ. ދެވަނަ ސެމީފައިނަލްގައި ވާދަކުރާނީ ފޯރި އެފްސީއާއި ޓްރިޕަލް އޭޔޫ މިކްސްއެވެ.
