ފްރާންސްގެ ރިޔާސީ އިންތިޚާބުގައި އެމްބާޕޭއަށް 10 ވޯޓު!

ފްރާންސްގެ ރިޔާސީ އިންތިޚާބުގައި އެގައުމުގެ ޒުވާން ފުޓްބޯޅަ ކުޅުންތެރިޔާ ކީލިއަން އެމްބާޕޭއަށް 10 ވޯޓު ލިބިއްޖެއެވެ.

ފްރާންސްގެ ރިޔާސީ އިންތިޚާބުގައި ވާދަކުރީ އެމަނުއެލް މެކްރޯން އާއި މަރިން ލެޕެންއެވެ. އިންތިޚާބުގެ ވަގުތީ ނަތީޖާތައް ދައްކާ ގޮތުން 58.6 އިންސައްތަ ވޯޓާއެކު ކުރީގައި އުޅެނީ މެކްރޯންއެވެ. މި އިންތިޚާބުގައި ވޯޓުލީ 10 ފަރާތަކުން އެމްބާޕޭގެ ނަންޖަހާ އަމިއްލައަށް ވޯޓު ކަރުދާސް ޕްރިންޓު ކޮށްގެން އޭނާއަށް ވޯޓު ލާފައިވާކަމަށް ރިޕޯޓުތައް ބުނެއެވެ. މި ވޯޓުތައް ވަނީ ބާތިލު ވޯޓުގެ ގޮތުގައި ގުނާފައެވެ.

2018 ވަނަ އަހަރުގެ ވޯލްޑް ކަޕް ފްރާންސަށް ކާމިޔާބު ކޮށްދިނުމުގައި މުހިންމު ދައުރެއް އަދާކުރި އުމުރުން 23 އަހަރުގެ އެމްބާޕޭއަކީ މިހާރު ފުޓްބޯޅައިގެ ދުނިޔޭގައި އެންމެ ވިދަމުން އަންނަ އެއް ތަރިއެވެ. އޭނާ ހޯދުމަށްޓަކާ ގިނަ ކްލަބުތަކުން މަސައްކަތް ކުރަމުން އަންނައިރު، މި ރޭހުގެ އެންމެ ކުރީގައި އުޅެނީ ސްޕެއިންގެ ރެއާލް މެޑްރިޑެވެ.

ފްރާންސްގެ ޕީއެސްޖީއާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު މިއަހަރުގެ ޖޫން މަހުގެ ނިޔަލަށް ހަމަވާނެއެވެ. އެހެންކަމުން ކުރިއަށް އޮތް ސަމަރ ޓްރާންސްފަރ މާކެޓުގައި ހިލޭ ޓްރާންސްފަރއެއްގައި އޭނާ ބޭނުން ކްލަބަކަށް ދިއުމުގެ އިޚްތިޔާރު އެބައޮތެވެ.

މިދިޔަ ސީޒަންގައިވެސް ބޮޑު އަގެއް ދީފައި އެމްބާޕޭ ހޯދުމަށް ރެއާލްއިން އެތައް ފަހަރެއްގެ މަތިން ޕީއެސްޖީއަށް ހުށަހެޅިއެވެ. ނަމަވެސް ޕީއެސްޖީން ވަނީ އެހުރިހާ ހުށަހެޅުމަކަށް ނޫނެކޭ ބުނެފައެވެ. މި ސީޒަންގެ ނިޔަލަށް އެމްބާޕޭއާއެކު ހަދާފައިވާ އެއްބަސްވުމުގެ މުއްދަތު ހަމަވާއިރު ޕީއެސްޖީން އަދިވެސް މަސައްކަތް ކުރަމުން އަންނަނީ އޭނާގެ ކޮންޓްރެކްޓް އައު ކުރުމަށެވެ.

ރިޕޯޓުތައް ބުނާ ގޮތުން މިއަންނަ ސީޒަންގައި އެމްޕާބޭ ކުޅުން އެންމެ ގާތީ ރެއާލް މެޑްރިޑަށެވެ. ރެއާލްއަށް ކުޅުމަކީ އޭނާ ކުޑައިރުން ފެށިގެން ދެކެމުން އަންނަ ހުވަފެނެކެވެ. އެމްބާޕޭގެ މުސްތަގުބަލާއި މެދު ގޮތެއް ނިންމުމަށް އޭނާގެ މަންމަ އަންނަނީ ދެ ކްލަބާއި މަޝްވަރާ ކުރަމުންނެވެ. ވަކި ގޮތެއް ނިންމާނީ ދެކްލަބުގެ އެންމެ ފަހުގެ ހުށަހެޅުންތައް ބެލުމަށްފަހު ކަމަށް އެމްބާޕޭގެ މަންމަ ބުންޏެވެ.