ޔޫއެންޑަބްލިއުޓީއޯއިން ވަކިވާން ރަޝިއާއިން ނިންމައިފި

އދ ގެ ފަތުރުވެރިކަމުގެ ޖަމްއިއްޔާ، ޔުނައިޓެޑް ނޭޝަންސް ވޯރލްޑް ޓޫރިޒަމް އޯގަނައިޒޭޝަން (ޔޫއެންޑަބްލިއުޓީއޯ)އިން ވަކިވާން ރަޝިއާއިން ނިންމައިފިއެވެ.

ޔޫއެންޑަބްލިއުޓީއޯއިން ވަނީ، އެޖަމްއިއްޔާއިން ވަކިވާން ރަޝިއާއިން ނިންމާފައިވާކަން ބުދަ ދުވަހު ހާމަކޮށްފައެވެ. އަދި މިނިންމުން ރަޝިއާއިން ނިންމާފައި ވަނީ އެޖަމްއިއްޔާގެ މެމްބަރު ގައުމުތަކުގެ މެދުގައި ރަޝިއާ ސަސްޕެންޑް ކުރުމާގުޅޭގޮތުން ވޯޓެއް ނެގުމަށް ތައްޔާރުވަމުން ދަނިކޮށް ކަމަށް ޔޫއެންޑަބްލިއުޓީއޯއިން ފާހަގަކުރެއެވެ.

ޔޫއެންޑަބްލިއުޓީއޯގެ ތަރުޖަމާނަކާ ހަވާލާދީ ރޮއިޓަރސްގައި ރިޕޯޓުކޮށްފައިވާގޮތުން، ރަޝިއާއިން އެޖަމްއިއްޔާއިން ވަކިވާން ނިންމި ނަމަވެސް އެގައުމު ސަސްޕެންޑް ކުރުމާ ގުޅޭގޮތުން ވޯޓުނަގައި އެގައުމުގެ ސަސްޕެންޑް ކުރުމުގެ މަސައްކަތްކުރާނެއެވެ. ސަބަބަކީ ސަސްޕެންޑްކުރުމަށް ނިންމާ ހިސާބުން ފެށިގެން ރަޝިއާ ސަސްޕެންޑްވާއިރު، އެގައުމު އެޖަމްއިއްޔާއިން ވަކިވުމަށް ފުރިހަމަކުރަންޖެހޭ ކަންތައްތައް ފުރިހަމަ ކުރުމަށް ގާތްގަޑަކަށް 1 އަހަރު ދުވަސް ނަގާނެތީއެވެ.

ޔޫއެންޑަބްލިއުޓީއޯގެ ސެކްރެޓަރީ ޖެނެރަލް ޒުރާބް ޕޮލޮލިކަޝްވިލް ވަނީ ރަޝިއާ ސަސްޕެންޑްކުރަން ގައުމުތަކުން ވޯޓުދޭނެކަމަށް އުންމީދުކުރާކަމަށް ވިދާޅުވެފައެވެ.

ރަޝިއާ ސަސްޕެންޑްކުރަން ބޭނުންނަމަ 160 މެމްބަރުންގެ ތިންބައި ކުޅަ ދެބައި މެމްބަރުންގެ ވޯޓު ބޭނުންވާނެއެވެ.

ޔޫއެންޑަބްލިއުޓީއޯއިން ރަޝިއާ ވަކިވުމާ ގުޅޭގޮތުން ކްރެމްލިންގެ ތަރުޖަމާން ޑިމިޓްރީ ޕެސްކޮވް ވިދާޅުވީ އެޖަމްއިއްޔާއިން ވަކިވިނަމަވެސް ރަޝިއާގެ ފަތުރުވެރިކަމަށް ބުރޫނާރާނެ ކަމަށެވެ.

އދ ގެ އާންމު މަޖިލީހުން ވަނީ މިމަހުގެ ކުރީ ކޮޅު އދ ގެ ހިއުމަން ރައިޓްސް ކޮމިޝަނުން ރަޝިއާ ސަސްޕެންޑްކޮށްފައެވެ.

މިނިންމުންތައް ނިންމަމުން މިދަނީ ފެބްރުއަރީ 24 ވަނަ ދުވަހު އަސްކަރީ އޮޕަރޭޝަނެއްގެ ނަމުގައި ޔޫކްރެއިނަށް އަރައި، ފެށި ހަނގުރާމައާ ގުޅިގެންނެވެ.