ރައީސްގެ ގަރާރުގެ ސަބަބުން ޚިޔާލު ފާޅުކުރުމުގެ މިނިވަންކަން ހަނިވާކަމަށް ބުނެ ހުށައެޅި މައްސަލަ ބޭރުކޮށްފި
25 އެޕްރީލު 2022 | ހޯމަ 05:54މައްސަލައާމެދު ބަހުސް ކުރުމަށް ނުފެންނަ ކަމަށް 27 މެމްބަރުން ވޯޓު ދެއްވި
އާދަމް ޝަރީފް - މަޑުއްވަރީ ދާއިރާގެ މެމްބަރު
ރައީސްގެ ގަރާރުގެ ސަބަބުން ޚިޔާލު ފާޅުކުރުމުގެ މިނިވަންކަން ހަނިވާކަމަށް ބުނެ ހުށައެޅި ކުއްލި މައްސަލަ ބޭރު ކޮށްލައިފިއެވެ.
މައްސަލަ ހުށައެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފެވެ.
މައްސަލައިގައި ބުނެފައިވަނީ އިސްލާމް ދީނާއި ޚިލާފު ނުވާ ކޮންމެ ކަމެއް ކުރުމުގެ މިނިވަންކަން ކޮންމެ ރައްޔިތަކަށް ޤާނޫނޫ އަސާސީން ލިބިގެންވާ ކަމަށެވެ. ޤާނޫނަކުން ހުއްދަ ލިބިގެން މެނުވީ އެއްވެސް މީހަކު ކުރާ ކަމެއް ހުއްޓުވައި ހުރަސް އަޅައިގެން ނުވާކަމަށް ޤާނޫނޫ އަސާސީގައި ބަޔާންކޮށްފައިވީ ހިނދު، ޤާނޫނު އަސާސީގެ 115 ވަނަ މާއްދާއަށް ރިއާޔަތް ކުރައްވައި ރައީސް ނެރުވި ގަރާރުން ޚިޔާލުފާޅުކުރުމުގެ މިނިވަންކަން ހަނިވެގެންދާ ކަމަށެވެ.
މީގެ އިތުރުން ޚިޔާލު ފާޅުކުރުމުގެ މިނިވަންކަން ކުއްލި ނުރައްކަލުގެ ހާލަތުގައިވެސް ހަނި ނުކުރެވޭނެކަމަށް ޤާނޫނޫ އަސާސީގައި ބަޔާންކޮށްފައިވާ ކަމަށްވެސް މިމައްސަލައިގައި ބުނެފައިވެއެވެ.
އެހެންކަމުން އެ ހައްޤުތައް އުނިކުރުމަށް ޤާނޫނެއް ނުވަތަ ގާރާރެއް ނެރުނަސް، އެވާނީ ބާތިލު އެއްޗަކަށް ކަމުގައި އާދަމް ޝަރީފް ހުށައެޅުއްވި މައްސަލައިގައި ބުނެފައިވެއެވެ.
އަދި ފުލުހުންނާއި ސިފައިން އަދި ސަރުކާރުގެ މުއައްސަސާތައް ބޭނުންކޮށްގެން ޚިޔާލު ފާޅުކުރުމުގެ މިނިވަންކަން ހަނި ކުރުމަށް ކުރާ މަސައްކަތް ހުއްޓުވުމަށް ސަރުކާރަށް ގޮވާލާކަމަށްވެސް މައްސަލައިގައި ބުނެފައިވެއެވެ.
މިމައްސަލައާމެދު ބަހުސް ކުރުމަށް ނުފެންނަ ކަމަށް 27 މެމްބަރުން ވޯޓު ދެއްވިއިރު، ބަހުސް ކުރުމަށް ފެންނަ ކަމަށް ވޯޓު ދެއްވީ 5 މެމްބަރުންނެވެ. އެހެންކަމުން މައްސަލައާމެދު ބަހުސް ކުރުމަށް ނުފެންނަ ކަމަށް ނިންމައި މަޖިލީހުން މައްސަލަ ވަނީ ބޭރުކޮށްލާފައެވެ.
