ލަމްހާގެ ބަންދު މުރާޖައާގައި އޭނާ: "މިތާ އުޅެން މިހާރު ވަރަށް ވަރަށް އުނދަގޫވޭ"
24 އެޕްރީލު 2022 | އާދީއްތަ 08:19ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދު
މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނު
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނުގެ ބަންދު މުރާޖައާ އަޑުއެހުމެއް އާދިއްތަ ދުވަހު ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
މި މައްސަލައިގައި ހޯމަ ދުވަހު ފުރަތަމަ ކުރިއަށްދިޔައީ އިބްތިދާއީ އަޑުއެހުމެކެވެ.
ބަންދު މުރާޖައާ އަޑުއެހުމުގައި ދިފާއީ ވަކީލުން ވަނީ ލަމްހާ ހުޅުމާލޭ ހޮސްޕިޓަލުގައި އެނދުމަތި ކޮށްގެން ފަރުވާ ދެވިފައިވާކަމަށް ބަޔާން ކުރައްވާފައެވެ. ދިފާއުގެ ފަރާތުން ބުނާ ގޮތުގައި ލަމްހާ އިމަރޖެންސީ ވެގެން ފާޚާނާ ތެރެއަށް ވެއްޓިގެން ހުޅުމާލޭ ހޮސްޕިޓަލަށް ގެންގޮސް އެޑްމިޓް ކޮށްފައިވާއިރު، އޭނާއަށް ބެޑް ރެސްޓް ބޭނުންވާކަމަށް ޑޮކްޓަރު ވަނީ ލަފާ ދެއްވާފައެވެ.
މި އަޑުއެހުމުގައި ލަމްހާ ބުނެފައިވަނީ، އޭނާއަކީ ޑިސްކް-ޑީ ޖެނެރޭޓިވް ޑިސީސްއަށް ޑައިގްނޯސް ކޮށްފައިވާ މީހެއް ކަމަށެވެ. އޭނާ ވެއްޓުނީ ކަހާލައިގެން ކަމަށާއި، އުނަގަނޑަަށް އަނިޔާވެފައިވާކަމަށް ލަމްހާ ބުންޏެވެ. އެތަނުގައި ބާލިދީ ފަދަ ތަކެތި އުފުލަން ޖެހޭއިރު، އެކަމުގެ ސަބަބުންނާއި، ފަހަތަށް ބިޑި އެޅުވުމުގެ ސަބަބުން އުނދަގޫތަކެއްވާކަމަށް އޭނާ ބުންޏެވެ.
ލަމްހާ މިހާރު ހުރީ ޝަރީއަތް ނިމެންދެން ބަންދުކޮށްފައެވެ. އެގޮތުން ދައުލަތުން ބުނާ ގޮތުގައި ލަމްހާގެ ބަންދުގެ ޙާލަތަށް ބަދަލެއް އައިކަމަށް ދިފާއަށް ޤަބޫލު ކުރެވޭނަމަ، އޮންނަ އުސޫލުގެ މަތިން ބަންދު މުރާޖައާ ކުރުމުގެ ކަންކަން ކުރިއަށް ގެންދެވިދާނެއެވެ.
ދައުލަތުން ބުނާ ގޮތުގައި ޑޮކްޓަރުގެ ލަފަޔާ ގުޅޭގޮތުން ދައުލަތަށް އެއްޗެއް ދެންނެވޭނީ މޯލްޑިވްސް ކަރެކްޝަނަލް ސަރވިސްއިން އިތުރަށް މައުލޫމާތު ސާފުކުރުމަށްފަހުއެވެ.
ޝަރީއަތުން ވަނީ ދެން އޮންނަ އަޑުއެހުމެއްގައި ބަންދު މުރާޖައާ ކުރިއަށް ގެންދެވުމަށް ނިންމަވާފައެވެ.
