ހަތަރު މިލިއަނަށް ވުރެ ގިނަ މީހުން މިރަމްޟާން މަހުގެ މިހާތަނަށް އުމްރާ ފުރިހަމަކޮށްފި
މި ރަމްޟާން މަހު 4،200،000 މީހުންނަށް އުމްރާ ވުމަށް ވިސާ ދޫކޮށްފައިވޭ
އުމްރާ
މި ރަމްޟާންމަހުގެ ފުރަތަމަ ވިހި ދުވަހާ ހަމަޔަށް 4 މިލިއަނަށް ވުރެ ގިނަ މީހުން އުމްރާގެ އަޅުކަން ފުރިހަމަ ކޮށްފައިވާ ކަމަށް ހައްޖާއުމްރާގެ ކަންތައް ބަލަހައްޓާ އިދާރާތަކާއި ހަވާލާ ދީ ސައޫދީ ގެޒެޓުން ރިޕޯޓްކޮށްފިއެވެ.
ހައްޖު އަދި އުމްރާގައި މީހުން ބައިބޯވުން ކޮންޓްރޯލް ކުރުމަށް އުފައްދާފައިވާ ޚާއްސަ އިދާރާ އިން ބުނެފައިވާގޮތުގައި އުމްރާގެ އަޅުކަން އަދާކުރުމަށް މަސްޖިދު އަލް ހަރަމް އަށާ އެހެންވެސް މުހިންމު މަގާމްތަކަށް އެއްވެ އުޅޭ މީހުންނަށް ކަންކަން ފަސޭހަކޮށް ރައްކާތެރި ކަމާއެކު އުމްރާގެ އަޅުކަން ފުރިހަމަ ކުރުމަށް މަގުފަހި ކޮށްދިނުމަށްޓަކާ ކަމާބެހޭ ހުރިހާ އިދާރާތަކެއް ގުޅިގެން ދަނީ ވަރަށް ބޮޑަށް މަސައްކަތްކުރަމުން ނެވެ.
ރަސްމީ އިދާރާތަކުން ބުނާ ގޮތުގައި ރަމްޟާން މަހު މިހާތަނަށް ހަތަރު މިލިއަން ދުއިސައްތަހާސް މީހުންނަށް އުމްރާ ވުމުގެ ހުއްދަ ނުވަތަ ވިސާދީފައި ވެއެވެ. މިމީހުންނަށް ހުއްދަ ދެވިފައިވަނީ ސައޫދީ ސަރުކާރުން ކަނޑައަޅާފައިވާ ރައްކާތެރިކަމުގެ ފިޔަވަޅުތަކާއެކު އެގައުމަށް އެތެރެ ވުމަށެވެ.
ސައޫދީ ގެޒެޓް ޚަބަރުދޭ ގޮތުގައި މިއަހަރު ޚާއްސަ ސަމާލުކަމެއް ދީގެން އުމުރުން ދުވަސްވީ މީހުންނާއި ޚާއްސަ އެހީއަށް ބޭނުންވާ މީހުންނަށް ތަވާފް ކުރުމާ އެހެންވެސް އަޅުކަމުގެ ރުކުންތައް ފުރިހަމަ ކުރުމަށް ޚާއްސަ އިންތިޒާމްތަކެއް ވަނީ ހަމަޖައްސާދީފައެވެ. އަދި އެކި އުމްރާވެރިންގެ އެކި ގްރޫޕްތަކަށް އެކި ވަގުތު ކަޑައަޅާފައިވާއިރު މިކަންފަސޭހަ ކުރުމަށްޓަކާ ފޯނަށް އެޅޭ ޚާއްސަ ދެ އެޕްލިކޭޝަން ވެސް ވަނީ ތައާރަފް ކޮށްފައެވެ.
