އިއްޒުއްދީން ސްކޫލުގެ ޕްރިންސިޕަލް އިސްމާއިލް ނަސީރުއާއި ދެކޮޅަށް ބަޔާން ދީފައި ވަނިކޮށް އެ ސްކޫލުގެ ހަތަރު ޓީޗަރުން ކުއްލި ގޮތަކަށް އެޑިއުކޭޝަން މިނިސްޓްރީ އިން އެހެން ސްކޫލަކަށް ބަދަލުކުރީ "ބަދަލު ހިފަން" ކަމަށް އެޗްއާރުސީއެމްގެ ވިސްލްބްލޯވާ ޕްރޮޓެކްޝަން ޔުނިޓުން ކަނޑައަޅައިފިއެވެ.
އެ ހަތަރު ޓީޗަރުން މިދިޔަ އަހަރު، ޕްރިންސިޕަލްއާއި ދެކޮޅަށް ބަޔާން ދިނީ ޖިންސީ ފުރައްސާރަކުރަމުންދާ ކަމަށް ތުހުމަތުކޮށެވެ. މި މައްސަލައިގެ ބަޔާން ނަގައި ކަން ހިނގި ގޮތް ބަލަމުން ދަނިކޮށް އެޑިއުކޭޝަނުން ނިންމީ ހަތަރު ޓީޗަރުން އެހެން ސްކޫލަކަށް ބަދަލުކުރުމަށެވެ.
މިއީ ބޭއިންސާފެއް ކަމަށް ބުނެ ޓީޗަރުން ކަންބޮޑުވުން ފާޅުކުރުމުން އޭރު އެޑިޔުކޭޝަން މިނިސްޓްރީން ނެރުނު ބަޔާނެއްގައި ބުނެފައި ވަނީ ޓީޗަރުން އެހެން ސްކޫލްތަކަށް ބަދަލުކުރުމުގައި ހުށަހެޅި ޖިންސީގޯނާގެ މައްސަލައާ ގުޅުމެއް ނެތް ކަމަށެވެ.
ހިއުމަން ރައިޓްސް ކޮމިޝަންގެ ވިސްލްބްލޯވާ ޕްރޮޓެކްޝަން ޔުނިޓަށް ހުށަހެޅުމުން އެމައްސަލަ ބެލުމަށްފަހު އެޔުނިޓުން ނިންމާފައިވާ ނިންމުމުގައި ވަނީ އެ މައްސަލައިގައި ވަށައިގެންވާ ކަންތައްތަކަށް ރިއާޔަތްކުރުމުން އެނގެނީ ހަތަރު ޓީޗަރުން ވެސް އެހެން ސްކޫލަކަށް ބަދަލުކުރީ "ވިސްލްބްލޯ ކުރާ ފަރާތްތައް ރައްކާތެރިކުރުމުގެ ގާނޫނު" ގެ ދަށުން ވިސްލްބްލޯކުރުމުގެ ސަބަބުން ހިފި ބަދަލެއްގެ ގޮތުން ކަމަށެވެ.
ވިސްލްބްލޯ ކުރުމަކީ މުޖްތަމައުގައި ހިނގާ ނޭދެވޭ ކަމެއްގެ މައުލޫމާތު އާންމު ކުރުމެވެ.
މިމައްސަލައިގައި ހިއުމަން ރައިޓްސް ކޮމިޝަންގެ ވިސްލްބްލޯވާ ޕްރޮޓެކްޝަން ޔުނިޓުން މައްސަލަ ބަލައި ނިމުނުކަން އެންގި ލިޔުމުގައި ބުނެފައިވަނީ ޔުނިޓްގެ މި ނިންމުމާ ގުޅިގެން ކަމާބެހޭ ފަރާތްތަކަށް އަންގަން ޖެހޭ އެންގުންތައް އެންގުމުގެ މަސައްކަތް އެ ޔުނިޓުން ކުރިއަށް ގެންދާނެ ކަމަށެވެ.
މިދިޔަ އަހަރުގެ ޖޫން މަހު ފެންމަތިވި ޖިންސީ ގޯނާގެ މައްސަލަ މީޑިއާއަށް ފެންމަތިކޮށްފައިވަނީ ޓީޗާސް އެސޯސިއޭޝަން އޮފް މޯލްޑިވްސް (ޓޭމް) އާއި މި މައްސަލަ ބެލުމުގައި ޝާމިލްވި ޕަބްލިކް އިންޓްރެސްޓް ލޯ ސެންޓަރުންނެވެ. މިމައްސަލައާ ގުޅޭގޮތުން ޕީއައިއެލްސީން ނެރުނު ބަޔާނުގައި ބުނެފައިވަނީ އެ ޖަމިއްޔާއިން މި މައްސަލަ ދިރާސާކުރިއިރު ހަތަރު ޓީޗަރުން އެހެން ސްކޫލުތަކަށް ބަދަލުކުރުމަށް މެދުވެރިވެފައިވާ ސަބަބަކީ ޖިންސީ ފުރައްސާރަކުރި މައްސަލަ ހުށަހެޅުމާއި އެކަމާ ދެކޮޅަށް އަޑުއުފުލުމާއި ހެކި ބަސް ދިނުމުގެ ސަބަބުން ކަން މައްސަލައިގެ ކަން ހިނގާފައިވާ ގޮތަށާއި ހެއްކާއި ގަރީނާއަށް ބެލުމުން އެނގެން އޮންނަ ކަމަށެވެ.
ޕީއައިއެލްސީން ބުނީ ޓީޗަރުން އެހެން ސްކޫލަކަށް ބަދަލުކުރަން ނިންމި ގާނޫނާ ހިލާފު ނިންމުން ބާތިލުކޮށްދިނުމަށް އެދި އެ ޓީޗަރުންގެ ފަރާތުން ސިވިލް ސާވިސް ކޮމިޝަނުގެ މައްޗަށް ރައްދުވާ ގޮތަށް ވަޒީފާއާ ބެހޭ ޓްރައިބިއުނަލަށް ވެސް މައްސަލަ ހުށަހަޅާފައިވާނެ ކަމަށެވެ. އެ ފިޔަވަޅު ދިފާއުކޮށް ސީއެސްސީން ވާހަކަ ދެއްކިޔަސް އެ ފިޔަވަޅު އަޅާފައި ވަނީ ގާނޫނާ އެއްގޮތަށްކަން ސާބިތުވާނެ އެއްވެސް ހެއްކެއް ވަޒީފާއާ ބެހޭ ޓްރައިބިއުނަލްގެ އަޑުއެހުންތައް ނިމުނުއިރު ވެސް ހުށަހަޅާފައިނުވާ ކަމަށް ޕީއައިއެލްސީން ބުނެއެވެ.
މި މައްސަލައިގައި އެޑިއުކޭޝަނުން ނެރުނު ބަޔާނުގައި ބުނެފައި ވަނީ އެ ހަތަރު ޓީޗަރުން އެހެން ސްކޫލަކަށް ބަދަލުކުރަން ނިންމީ އެ މައްސަލަ ހައްލުކުރުމަށްޓަކައި ޕްރޮފެޝަނަލް މިންގަނޑުތަކާ އެއްގޮތަށް ހާއްސަ ކޮމިޓީއަކުން ހިންގި ލީޑާޝިޕް އެންޑް މެނޭޖްމަންޓް ރިވިއު އަށް ރިއާތްކުރުމަށް ފަހު ކަމަށެވެ. އެ މައްސަލައިގައި ޓީޗާސް އެސޯސިއޭޝަނުން ނެރެފައިވާ ބަޔާނުގައި ހަގީގަތާ ހިލާފު މައުލޫމާތުތައް ހުރި ކަމަށް ބުނެ އެކަން ވެސް މިނިސްޓްރީގެ ބަޔާނުގައި ކުށްވެރިކޮށްފައިވެވެ.
އިއްޒުއްދީންގެ ޕްރިންސިޕަލަށް އެއްވެސް ފިޔަވަޅެއް ނާޅާއި އޭނާ ބަދަލުކުރީ އެހެން ރަށެއްގެ ސްކޫލުގެ ޕްރިންސިޕަލަކަށެވެ.
