ދިވެހި ޕްރިމިއަރ ލީގު ތާވަލްގެ ފުލުގައި އޮތް ދަ ގްރާންޑޭ އަތުން 5-0 ން މޮޅުވެ އެއްވަނާގައި މާޒިޔާއިން 5 ޕޮއިންޓްގެ ލީޑެއް ނަގައިފިއެވެ. ދެވަނާގައި އޮތް އީގަލްސްއަށްވުރެ އިތުރަށް މެޗެއް ކުޅެގެން މާޒިޔާ ވަނީ 27 ޕޮއިންޓް ހަމަކޮށްފައެވެ. އެއީ 10 މެޗުންނެވެ.

ދެވަނާގައި އީގަލްސް އޮތީ ނުވަ މެޗުން 22 ޕޮއިންޓާއެކުއެވެ. އާދިއްތަ ދުވަހުގެރޭ ސަސް ބަލިކޮށްގެން, ފަރަޤު ކުޑަކުރުމުގެ ފުރުޞަތު އީގަލްސްއަށް އޮންނާނެއެވެ. ޕޮއިންޓަކާއެކު ފުލުގައި އޮތް ދަ ގްރާންޑޭ ކޮޅަށް މާޒިޔާއިން ޖެހި ފަސް ލަނޑުގެ ތެރެއިން ހަތަރު ލަނޑު ޖެހީ ފުރަތަމަ ހާފްގައެވެ. ހަތަރުވަނަ މިނިޓްގައި ކުރި ހޯދައިދިނީ ނާއިޒު ހަސަން (ދާދު) އެވެ. ދެވަނަ ލަނޑު ކޯނަރަކުން އޭރިޔާތެރެއަށް ހުރަސްވިބޯޅަ ބޮލުން ފޮނުވާލައިގެން ކާމިޔާބުކުރީ ކާޓަލްއެވެ. ތިންވަނަ ލަނޑު ޖެހީ ހަމްޒާ މުޙައްމަދު (ހަމްޕު) އެވެ. ހާފް ނިމެން ފަސް މިނިޓަށް ވެފައިވަނިކޮށް ހަތަރުވަނަ ލަނޑު ޖެހީ ކޯނޭއެވެ.

ފުރަތަމަ ހާފްއާއި ހިލާފަށް ދެވަނަ ހާފްގައި ދަ ގްރާންޑޭއިން ކުޅުން ރަނގަޅު ކުރިއެވެ. އެކަމަކު މާޒިޔާގެ ގޯލަށް ރަނގަޅު އެޓޭކެއް ކުރެވޭ ވަރެއް ނުވިއެވެ. ދަ ގްރާންޑޭއިން ކުޅުން ރަނގަޅު ކުރުމުގެ ނަތީޖާއަކީ މާޒިޔާއަށްވެސް ދެވަނަ ހާފްގައި ގޯލްތަކެއް ނުޖެހުނެވެ. ދެވަނަ ހާފްގެ ހަމައެކަނި ގޯލް މާޒިޔާއަށް ޖަހައިދިނީ ބަދަލު ކުޅުންތެރިއެއްގެ ގޮތުގައި ނިކުއިން އަސަދުالله އަބުދުالله އެވެ. ލަނޑަށްފަހުވެސް އަސަދުالله ރަނަގޅު ދެ ބޯޅައެއް ބޮލުން ފޮނުވާލި ނަމަވެސް ގޯލަކަށް ބަދަލުކޮށްނުލެވުނެވެ.

މާޒިޔާ ވަނީ މިދިޔަ ހަފްތާގައި 13-0 ން ވެލެންސިޔާ ބަލިކޮށްފައެވެ. ލީގުގައި މާޒިޔާ ބަލިވީ ދެވަނަ ބުރުގައި އީގަލްސް އަތުންނެވެ.