ޖިންސީ ގޯނާ ކުރި މައްސަލައިގައި އެކަށީގެންވާ ހެތްކާއި ގަރީނާ ހޯދުމަށް މަސައްކަތްކޮށްފައިވާނެ: ފުލުހުން
ޖިނާއީ ދައުވާއެއްކޮށްގެން ކުށް ސާބިތުކުރެވޭ މިންވަރަށް ހެތްކާއި ގަރީނާ ލިބިފައިނުވާކަމަށް ޕީޖީ އޮފީހުން ބުނި
މޯލްޑިވްސް ޕޮލިސް ސަރވިސްގެ ހެޑް ކުއާޓަރ، ޝަހީދު ހުސައިން އާދަމް ބިލްޑިންގ
އައްޑޫސިޓީ ހިތަދޫގައި އުމުރުން 6 އަހަރުގެ ކުއްޖަކަށް ޖިންސީ ގޯނާ ކުރި މައްސަލައިގެ ތުހުމަތުގައި ހެތްކާއި ގަރީނާ ހޯދުމަށް މަސައްކަތް ކޮށްފައިވާނެކަމަށް ފުލުހުން ބުނެފިއެވެ.
ފުލުހުން ބުނީ އައްޑޫސިޓީ ހިތަދޫގައި އުމުރުން 6 އަހަރުގެ ކުއްޖަކަށް ޖިންސީ ގޯނާ ކޮށްފައިވާކަމަށް ތުހުމަތުކުރެވޭ މައްސަލައެއް މާޗް 23 ވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ. މި މައްސަލައާ ގުޅިގެން އުމުރުން 59 އަހަރުގެ ދިވެހި އަންހެނަކު މާޗް 24 ވަނަ ދުވަހުގެ ވަގުތެއްގައި ކޯޓު އަމުރެއްގެ ދަށުން ހައްޔަރުކޮށް، ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތުން ގޮތެއް ނިމެންދެން ބަންދުކުރުމަށް އަމުރުކޮށްފައިވާކަމަށެވެ.
މި މައްސަލަ ހުށަހެޅުނު ހިސާބުން ސީރިއަސް މައްސަލައެއްގެ ގޮތުގައި ތަހުގީގު ކުރިއަށް ގެންގޮސް، މައްސަލައާ ގުޅިގެން ސުވާލު ކުރަންޖެހޭ އެންމެހާ ފަރާތްތަކާއި ސުވާލުކޮށް ހެތްކާއި ގަރީނާ ހޯދުމުގެ މަސައްކަތް ކޮށްފައިވާ ކަމަށް ވެސް ފުލުހުން ބުންޏެވެ. އެގޮތުން މައްސަލައިގެ ތަހުގީގުގައި ފުލުހުން ހޯދާފައިވާ ހެތްކާއި ގަރީނާ, އަދި މައްސަލައާ ގުޅުންހުރި އެންމެހާ ލިޔެކިޔުންތަކާއެކު ޖިނާއީ ދައުވާއެއް ކުރުމާމެދު ގޮތެއް ނިންމުމަށް ޕްރޮސެކިއުޓަރ ޖެނެރަލްގެ އޮފީހަށް މައްސަލަ ފޮނުވާފައިވަނީ 20 އޭޕްރީލް ވަނަ ދުވަހު ކަމަށެވެ. އަދި މައްސަލައިގެ ތަހުގީގުގައި ހޯދާފައިވާ ހެތްކާއި ގަރީނާ ވަޒަންކުރުމަށްފަހު ޖިނާއީ ދައުވާއެއްކޮށްގެން ކުށް ސާބިތުކުރެވޭ މިންވަރަށް ހެތްކާއި ގަރީނާ ލިބިފައިނުވާ ކަމަށް ބަޔާންކޮށް 21 އޭޕްރިލްގައި ޕީޖީ އޮފީހުން މައްސަލަ އަނބުރާ ފޮނުވާލާފައިވާ ކަމަށްވެސް ފުލުހުން ބުންޏެވެ.
އެހެންކަމުން މައްސަލައިގައި ހައްޔަރުކުރި މީހާ އޭފްރިލް 21 ވަނަ ދުވަހުގެ ރޭ ބަންދުން ދޫކޮށްލާފައިވާ ކަމަށާއި, މި މައްސަލައިގެ ތަހުގީގަށް ލިބުނު ހުރިހާ މައުލޫމާތެއްގެ ވަށައިގެންވާ އެންމެހާ ކަންކަން ބަލައި، ހެތްކާއި ގަރީނާ ހޯދުމަށް މައްސަލައިގެ ތަހުގީގުގައި ފުލުހުން މަސައްކަތްކޮށްފައި ވާނެ ކަމަށް ވެސް ވަނީ ބުނެފައެވެ. ނަމަވެސް މި މައްސަލައިގައި ހައްޔަރުކުރި މީހާ ފިޔަވާ އިތުރު މީހެއް ނުވަތަ ބައެއްގެ މައްޗަށް ތުހުމަތު ކުރެވޭ ވަރުގެ އެކަށީގެންވާ ހެތްކެއް ނުވަތަ ގަރީނާއެއް ތަހުގީގަށް ލިބިފައިނުވާކަމަށް ފުލުހުން ބުންޏެވެ.
