ފިތުރު އީދު ފާހަގަކުރުމަށް އަލިފުށީ ރެޓްރޯ ކޮފީން, އެރަށުގައި ފުޓްސަލް މުބާރާތަކާއި ވޮލީބޯޅަ މުބާރާތެއް ބާއްވަން ތައްޔާރުވެއްޖެއެވެ. މީގެތެރެއިން ވޮލީބޯޅަ މުބާރާތް ބާއްވަނީ ދެޖިންސަށް ވަކިން, ދެ މުބާރާތުގެ ގޮތުގައެވެ.

މުބާރާތުގައި އަލިފުށީގެ ޓީމްތަކުގެ އިތުރުން ށ. ކޮމަންޑޫއަށްވެސް ވަނީ ފުރުސަތު ދީފައެވެ. ފުޓްސަލް މުބާރާތުގައި ވާދަކުރާ 10 ޓީމްގެ ތެރޭގައި ކޮމަންޑޫ ޓީމެއް ހިމެނެއެވެ. ފުޓްސަލް މުބާރާތުގައި ވާދަކުރާ 10 ޓީމް ބަހާލާފައިވަނީ ތިން ގްރޫޕަކަށެވެ. ކޮންމެ ގްރޫޕަކުން އެއްވަނަ ޓީމާއި, ތިން ގްރޫޕް އެއްކޮށްލައިގެން އެންމެ ރަނގަޅު ދެވަނަ ޓީމަށް ސެމީފައިނަލްގެ ޖާގަލިބޭގޮތަށެވެ. ފުޓްސަލް މުބާރާތް ފަށާނީ މިމަހުގެ 25 ވަނަ ދުވަހުއެވެ. އެމުބާރާތުގެ ފައިނަލް މެޗު ކުޅޭނީ އީދު ދުވަހުއެވެ. މީގެ އިތުރުން އީދު ދުވަހު ވޮލީބޯޅަ މުބާރާތް ފަށާނެއެވެ.

ވޮލީބޯޅަ މުބާރާތުގެ އަންހެން ޑިވިޝަންގައި ވާދަކުރާނީ އަލިފުށީގެ 5 ޓީމެވެ. ފިރިހެން ޑިވިޝަންގައި ކޮމަންޑޫއިންވެސް ވާދަކުރާނެއެވެ. މިއީ ރެޓްރޯ ކޮފީން އަލިފުށީފައި ބާއްވާ ދެވަނަ ފުޓްސަލް މުބާރާތެވެ. މުބާރާތުގެ ގުރުއަތުލުމުގެ ރަސްމިއްޔާތު ބުދަ ދުވަހުގެރޭ ވަނީ ބާއްވާފައެވެ. މި ރަސްމިއްޔާތުގައި, ޓީމްތަކުގެ ދިދައާއި މުބާރާތުގެ ލޯގޯއާއި ލަވަ ވަނީ ލޯންޗްކޮށްފައެވެ.

އަލިފުށީގައި އެންމެފަހުން ބޭއްވި ކުޅިވަރުގެ އެންމެ ބޮޑު ހަރަކާތަކީ މިސީޒަންގެ ޕްރެޒިޑެންޓްކަޕް ފައިނަލް މެޗެވެ. އެމެޗު ކުޅުނީ އަލިފުށީގައި މިސަރުކާރުން އަޅާފައިވާ ޓާފް ފުޓްބޯޅަ ދަނޑުގައެވެ.