މާލޭގެ ގެތަކުގެ ބޭރުގައި ޖަހާފައިވާ "އިންޑިއާ އައުޓް" ބެނާތައް ނަގަން ފުލުހުން އަންގައިފިއެވެ.
ބޮޑުތަކުރުފާނު މަގުގައި ހުންނަ ކުރީގެ ރައީސް ޔާމީންގެ ގެކޮޅުގައި އިންޑިއާ އައުޓް ލިޔެފައިވާ ބޮޑު ބެނާއެއް ވަނީ ހަރުކޮށްފައެވެ. އެ ބެނާގައި ހުރީ ރާއްޖޭގެ ޤައުމީ ދިދައިގައި ހިމެނޭ ފެއްސާރައި ރަތާއި ހުދު ކުލައެވެ. އަދި ރަތް ކުލައިން އިންޑިއާ އައުޓް ވަނީ ލިޔެފައެެވެ. މީގެ އިތުރުންވެސް މާލޭގެ އެކި ސަރަހައްދުގެ މަގު މަތީގައާއި ފާރުތަކުގައިވެސް އިންޑިއާ އައުޓް އަދި އިންޑިއާ މިލިޓަރީ އައުޓް މިގޮތަށް ދަނީ ލިޔަމުންނެވެ.
ފުލުހުން ބުނީ "އިންޑިއާ އައުޓް" ޖަހައި މިގޮތަށް ބެނާ ދަމާފައި ހުރުމަކީ, ވަކި ޤައުމަކަށް ނިސްބަތްކޮށް ހިންގޭ، އެ ޤައުމުގެ ގަދަރާއި ކަރާމާތަށް އުނިކަން ލިބޭފަދަ އަމަލެއްގެ ގޮތުގައި ސިފަވުމާއި، ބައިނަލްއަޤުވާމީ ގުޅުންތަކާއި އަވަށްޓެރި ޤައުމުތަކާއި ރާއްޖެއާ ދެމެދު އޮންނަ ޚާރިޖީ އަދި ސަޤާފީ ގުޅުންތަކަށް އޭގެ ސަބަބުން ނުރަނގަޅު އަސަރުކޮށް، އެ ޤައުމުތަކުގައި ދިރިއުޅޭ އަދި ޒިޔާރަތްކުރާ ދިވެހީންގެ މަސްލަހަތަށްވެސް ގެއްލުން ވެދާނެކަމެއް ކަމުގައި ދެކޭ ކަމަށެވެ.
މީގެ އިތުރުން، މިފަދަ އަމަލުތަކަކީ އޭގެ ވަށައިގެން ހިނގާ ކަންކަމުގެ ސަބަބުން ރާއްޖެއާއި ދިވެހި ރައްޔިތުންގެ މަސްލަހަތަށް ސީދާ ގޮތުންނާއި ނުސީދާގޮތުން ގެއްލުން ވެދާނެ ފިތުނަވެރި އަމަލަކަށްވާތީ، އެއީ ދިވެހިރާއްޖޭގެ ޤާނޫނުލްއުޤޫބާތުގެ 615 ވަނަ މާއްދާގެ (ހ) ގެ 6 ވަނަ ނަންބަރުގައި ބަޔާންކޮށްފައިވާ ޖާއިޒު މަޤުސަދެއް ހާސިލުނުވާނެ އަމަލަކުން ނުރައްކާތެރި، ނުވަތަ މާއްދީގޮތުން ހުތުރު، ނުވަތަ މީހުން ބިރުގަންނާނެފަދަ ހާލަތެއް އުފެދިދާނެ އަމަލެއް ކަމުގައި ބެލެވޭ ކަމަށް ފުލުހުން ބުނެއެވެ.
އެހެންކަމުން، ދިވެހި ފުލުހުންގެ ޚިދުމަތުގެ ޤާނޫނުގެ 22 ވަނަ މާއްދާގެ (ރ)، (ނ) އަދި (ފ) ގެ ދަށުން އާންމު މަސްލަހަތު ރައްކާތި ކުރުމާއި، އާންމު މަސްލަހަތު ގާއިމްކުރެވިގެންވާ ރައްކާތެރިކަން ދެމިއޮތް މުޖުތަމައެއްގެ އިހުސާސް ރައްޔިތުންނަށް ދިނުމަށް ކުރަންޖެހޭ ކަންކަން ކުރުމާއި، ދާޚިލީ ނުރައްކާތަކުން ރައްކާތެރިވެ އޮތް މާހައުލެއް ގާއިމުކޮށް، މުޖުތަމައުގެ ރައްކާތެރިކަމަށް ބުރޫއަރާފާނެ ކަންކަން ދުރާލާ ދެނެގަނެ އެކަންކަން ހުއްޓުވުމަށް އަޅަންޖެހޭ ފިޔަވަޅު އެޅުމުގެ ބާރާއި މަސްއޫލިއްޔަތު ހަވާލުވެގެންވާ މުއައްސަސާގެ ހައިސިއްޔަތުން "އިންޑިއާ އައުޓް" ޖަހާފައިވާ ބެނާތައް ނެގުމަށް ލިޔުމުން އަންގާފައިވާނެ ކަމަށް ފުލުހުން ބުނެފައިވެއެވެ.
ފުލުހުން މިފަދައިން އަންގާފައިވާއިރު ބުދަ ދުވަހު ރައްޔިތުންގެ މަޖިލީހުގެ ޖަލްސާ ފެށުމާއެކުމިކަމަށް މިއިޝާރާތްކުރައްވައި މަޖިލީހުގެ ރައީސް މުހައްމަދު ނަޝީދު ވިދާޅުވީ އަވަށްޓެރި ޤައުމުތަކާއި ބެހޭ ގޮތުން ބަދު ބަސް ބުނެ ބޮޑެތި ބެނާތައް ނަގާފައި ހުރުމަކީ ޤާނޫނޫލް އުޤޫބާތާ ޚިލާފު އަދި އާންމު މަސްލަހަތާ ޚިލާފު ކަމެއް ކަމަށެވެ.
