މާލެއާއި ހުޅުމާލޭގައި ފުލުހުން ނިމިދިޔަ ޑިސެމްބަރު މަހުގެ 12 ވަނަ ދުވަހު ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މިއީ މިހާރުވެސް ތަޙުޤީޤު ކުރިއަށްދާ ބޮޑު މައްސަލައެކެވެ.
ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.
މި މައްސަލައިގައި އަންގާރަ ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި ދައުވާލިބޭ ފަރާތްތަކުގެ ވަކީލު ވަނީ ދިފާއީ ހެކި ހުށައެޅުމާއި، ހުށައެޅުންތަކަށް އިތުރު ފުރުސަތެއް ދެއްވުމަށް އެދިލައްވާފައެވެ. މިކަމާއި ގުޅޭގޮތުން މައްސަލަ ބައްލަވާ ގާޒީ ދީބާނާޒް ފަހުމީ ވަނީ ދައުލަތާއި ދިފާއުގެ ފަރާތުން ދެކޭ ގޮތް އޮޅުންފިލުއްވާފައެވެ.
ދައުލަތުން ބުނި ގޮތުގައި މި މައްސަލައިގައި މިހާރު ދިފާއި ބިނާ ކުރެވޭ މިންވަރަށް، އެކަށީގެންވާ ވަގުތު ފޯރުކޮށްދެވިފައިވެއެވެ. އަދި ހެކިބަސް ނެގުމުގެ މަރުޙަލާ ލަސްވުމަކީ ހެކިބަސް ދޭން ތިބި ފަރާތްތައް ޙާދިސާ ހަނދާން ނެތުމާއި. އޮޅުން އެރުން ފަދަ ކަންކަން ދިމާވެ، ހެކިބަސް ނެގުމުގައި ގޮންޖެހުންތަކެއް ކުރިމަތިވެދާނެ ކަމެކެވެ.
އެކަމާއި ގުޅޭގޮތުން ދިފާއީ ވަކީލު ވިދާޅުވީ، ހެކިބަސް ނެގުން ލަސްވެގެން ދިއުމަކީ ދިފާއުގެ މަސްލަޙަތަށްވެސް ރަނގަޅު ގޮތެއް ނޫން ކަމަށެވެ. އެގޮތުން ދައުވާ ލިބޭ ފަރާތްތައް މިހާރުވެސް ތިބީ ކަސްޓޯޑިއަލް ޖަލެއްގައި ކަމަށްވުމާއެކު، ދައުވާލިބޭ ފަރާތްތަކާ ބައްދަލުކުރެއްވުމުގައި ދަތިތަކެއް ދިމާވަމުންދާކަން ދިފާއީ ވަކީލު ފާހަގަކުރެއްވިއެވެ.
މި މައްސަލަ ބައްލަވާ ގާޒީ ދީބާނާޒްވެސް ވަނީ ބަންދުގައި ތިބި ފަރާތްތަކާ ބައްދަލުކުރުމުގައި ހުރި ދަތިތަކުގެ ވާހަކައަކީ ޝަރީއަތަށްވެސް އައު ވާހަކައެއް ނޫންކަން ފާހަގަކުރައްވައި، ދިފާއުވުމަށް އެކަށީގެންވާ ފުރުސަތު ލިބެންޖެހޭކަމަށް ޤަބޫލު ކުރައްވާކަމަށް ވިދާޅުވެފައެވެ. ގާޒީ ވަނީ 10 މެއި ގެ އޮފީސް ބަންދުވުމުގެ ކުރިން ދިފާއީ ހެއްކާއި ހުށައެޅުންތައް ހުށައެޅުމަށް ދަންނަވާފައެވެ.
އެއަށްފަހު، މި މައްސަލަ ކުރިއަށް ގެންދާނެ ގޮތުގެ ތާވަލާއި ގުޅޭގޮތުންވެސް ގާޒީ ވަނީ ދެފަރާތާއި މަޝްވަރާ ކުރައްވައި، ތާވަލެއް އެކުލަވާލައްވާފައެވެ.
މި މައްސަލައިގައި އެންމެ ފަހުން ބޭއްވިއަޑުއެހުމުގައިތަޙުޤީީޤު ކުރިއަށްދާ ބައެއްގެ ވާހަކަތައް ހިމެނޭ އިންޓެލް ރިޕޯޓުތަކާއި ގުޅޭ ދިގު ބަހުސެއް ކުރިއަށް ގެންގޮސްފައިވެއެވެ. އެ ދުވަހު ނިންމާފައިވަނީ އިންޓެލިޖެންސް ރިޕޯޓުތަކުގައި ހިމެނޭ ސިއްރު ކުރަންޖެހޭ މައުލޫމާތު ސިއްރު ކުރުމަށްފަހު ދިފާއަށް ރިޕޯޓު ދޫކުރުމާއި، ދިފާއުން މުޅި ރިޕޯޓު ބަލަން ބޭނުންވާނަމަ، ދައުލަތުން އެދިފައިވާ ގޮތަށް ކޯޓަށް އައިސް ކޯޓުން ކަނޑައަޅާ ޝަރުތުތަކާއެކު ބެލޭނެ ގޮތް ހެދުމަށެވެ.
އަންގާރަ ދުވަހުގެ އަޑުއެހުމުގައި ގާޒީ ދީބާނާޒް ވަނީ އެގޮތުގެ މަތިން ދިފާއަށް ރިޕޯޓު ދޫކުރި ނަމަވެސް، ދައުލަތުގެ ޝަރުތުތަކަށް ބޯލެނބުމަށް ހަނދުމަ ކޮށްދެއްވާފައެވެ. އެ ރިޕޯޓުތައް އެއްވެސް ގޮތަކަށް ބޭރުވެއްޖެނަމަ، ފިޔަވަޅު އަޅުއްވާނެކަންވެސް ގާޒީ ދީބާނާޒް ފާހަގަ ކުރެއްވިއެވެ.
ގާޒީ ވަނީ ދައުވާލިބޭ ފަރާތްތަކުގެ ވަކީލުންނާއި ދައުވާލިބޭ ފަރާތްތަކުންވެސް އެކަމަށް ސަމާލުވުމަށް ދަންނަވާފައެވެ.
