ނުރައްކާތެރި ކުށްވެރިން މޮނިޓަރ ކުރުމަށް ބޭނުންވާ ޓެގް ރާއްޖެ ގެނެސްފި

ނުރައްކާތެރި ކުށްވެރިން މޮނިޓަރ ކުރުމަށް ބޭނުންވާ ޓެގް ރާއްޖެ ގެނެސްފިއެވެ.

ފުރަތަމަ ރާއްޖެ ގެނެސްފައިވަނީ 100 ޓެގްއެވެ. ޓެގް ރާއްޖެ ގެނެސްފައިވަނީ އަމިއްލަ ބަޔަކާއި ހަވާލުކޮށްގެންނެވެ. މޮނިކޮން ޓެގް ރާއްޖެ ގެނައުމަށް ބަޔަކު ހޯދުމަށް ހޯމް މިނިސްޓްރީން އިއުލާންކޮށްފައިވަނީ މިދިޔަ އަހަރުގެ ނޮވެމްބަރުމަހުގެ 15 ވަނަ ދުވަހުއެވެ.

ހޯމް މިނިސްޓްރީން ބުނީ، މިހާރު ކުރިއަށްދަނީ ޓެގް އެޅުވުމަށް ޓެކްނިކަލް ގޮތުން ވާންޖެހޭ ތައްޔާރީތައް ކަމަށެވެ. ފުރަތަމަ 100 ޓެގް ގެނެސް ކުށްވެރިންގެ ފައިގައި އެޅުވުމަށް ނިންމާފައިވީ ނަމަވެސް ހާލަތަށް ބަލައި އެ އަދަދު އިތުރު ކުރަންޖެހިއްޖެ ނަމަ އިތުރު ކުރާނެ ކަމަށް ހޯމް މިނިސްޓްރީން ބުނެއެވެ.

ކުށްވެރިން ފައިގައި ޓެގް އަޅުވަނީ ޓެރަރިޒަމް މަނާކުރުމުގެ ގާނޫނުގެ ދަށުން ނެރޭ މޮނިކޮން އަމުރުގެ ދަށުންނެވެ. އެ އަމުރަކީ ބޮޑެތި ކުށްކުށުގެ ތުހުމަތު ކުރެވޭ މީހުން އުޅޭނޫޅޭ ގޮތް ބެލުމަށް އަޅުވާ އެއްޗެކެވެ. ޓެގް އެޅުވުމުން އެމީހާގެ މޫވްމެންޓް މޮނިޓަރ ކުރެވޭނެއެވެ. ޓެގް އަޅުވަނީ ވަކި ކަންކަމަކަށް ޝަރުތު ކުރުމަށް ފަހުގައެވެ. އެގޮތުން ވަކި ވަގުތެއްގައި ގެއިން ބޭރަށް ނުދިޔުމާއި، އެ އުޅޭ ރަށަކުން ފުރައިގެން އެހެން ތަނަކަށް ދާނަމަ ޚާއްސަ ހުއްދައެއް ހޯދަން ޖެހެއެވެ. މި ޝަރުތުތަކާ ޚިލާފުވެއްޖެނަމަ އެމީހުން އަނބުރާ ޖަލަށް ބަދަލުކުރެވޭނެއެވެ.