ސިވިލް ސަރވިސްގައި މަސައްކަތްކުރާ ޓީޗަރުންނަށް ހައްގުވާ އެކި ޕްރޮމޯޝަންތަކާއި ހައްގުވާ މަގާމުގެ ކުރިއެރުން ނުލިބޭ މައްސަލައިގައި ކޯޓަށް ދާން ނިންމައިފިއެވެ.

ކޮވިޑް-19ގެ ހާލަތަށްފަހު ސިވިލް ސަރވިސްގެ އެކި އިދާރާތަކުގައި މަސައްކަތްކުރާ ފަރާތްތަކުގެ ޕްރޮމޯޝަން ފަދަ އެކި ކުރިއެރުންތައް ދިނުން މަޑުޖައްސާލުމަށް ސަރުކާރުން ވަނީ ނިންމާފައެވެ. މިކަމާއި ގުޅިގެން ރާއްޖެއެމްވީއަށް މައުލޫމާތުދެމުން ޓީޗަރސް އެސޯސިއޭޝަނުން ބުނީ ކޮވިޑް-19 އާއެކު މުވައްޒަފުންނަށް ކުރިއެރުންތައް ދިނުން މަޑުޖައްސާލި ނަމަވެސް ސަރުކާރުގެ އެހެން އިދާރާތަކަށް މި ޕްރޮމޯޝަންތައް ދޭން ފަށާފައިވާކަމަށެވެ.

ޕްރޮމޯޝަން ނުލިބުމުގެ ޝަކުވާ ގިނަ ޓީޗަރުން ކުރަމުން އަންނަކަމަށް އެއެސޯސިއޭޝަނުން ބުނެއެވެ. އެހެންކަމުން ޕަބްލިކް އިންޓްރެސްޓް ލޯ ސެންޓަރު (ޕީއައިއެލްސީ) ގެ އެހީތެރިކަމާއެކު މި މައްސަލަ ކޯޓަށް ހުށަހެޅުމަށް ނިންމާފައިވާކަމަށް އެ އެސޯސިއޭޝަނުން ބުނެފައިވެއެވެ.

ޓީޗަރސް އެސޯސިއޭޝަނުން ބުނީ މި މައްސަލައާއި ގުޅިގެން އެޑިއުކޭޝަން މިނިސްޓްރީގެ ޕަރމަނަންޓް ސެކެޓްރީ، ސިވިލް ސަރވިސް ކޮމިޝަން އަދި ޕޭ ކޮމިޝަނާވެސް ބައްދަލުކޮށްފައިވާކަމަށެވެ. އަދި ޓީޗަރުންގެ ކަންބޮޑުވުންތައް ހިއްސާކޮށްފައިވާނެ ކަމަށެވެ. އެހެންނަމަވެސް މިކަމަށް އެދެވޭ ހައްލެއް ލިބިފައިނުވާކަމަށާއި، ހައްލެއް ނުލިބޭނަމަ ވަޒީފާއާއި ބެހޭ ޓްރައިބިއުނަލަށް މި މައްސަލަ ހުށަހެޅުމަށް ޕަރމަނަންޓް ސެކެޓްރީ ވިދާޅުވި ކަމަށެވެ.

މި މައްސަލައާއި ގުޅިގެން ރާއްޖެއެމްވީން ކުރި ސުވާލަކަށް ޖަވާބުދެއްވަމުން އެޑިއުކޭޝަން މިނިސްޓްރީގެ ޕަރމަނަންޓް ސެކެޓްރީ އަހުމަދު އަލީ ވިދާޅުވީ މި މައްސަލައިގައި އެއްވެސް ފަރާތަކުން ރަސްމީކޮށް ކޯޓަށް ދާން އުޅޭ ކަމެއް އެޑިއުކޭޝަން މިނިސްޓްރީއަށް އެނގިފައިނުވާކަމަށެވެ.

ކޮވިޑާއި ގުޅިގެން މަގާމުގެ ކުރިއެރުން ދިނުން މަޑުޖައްސާލާފައިވާކަން ފާހަގަކުރައްވައި އަހުމަދު އަލީ ވިދާޅުވީ އަލުން މި ކުރިއެރުންތައް ދިނުމުގެ މަޝްވަރާތައް މިހާރު ކުރެވެމުންދާކަމަށެވެ. އަދި ޓީޗަރުންގެ ފަރާތުން މިކަމުގެ ޝަކުވާތައް ދޭތެރެ ދޭތެރެއިން ލިބެމުންދާކަމަށާއި، މިފަދައިން ހުށަހަޅާ މައްސަލަތައް ހައްލުކޮށްދޭން މަސައްކަތްކުރައްވާކަމަށެވެ.

ކޯޓަށް ގޮސްގެން މި މައްސަލަ ހައްލުކުރުމުގެ ބަދަލުގައި މިކަން އެޑިއުކޭޝަން މިނިސްޓްރީގެ ތެރެއިން ހައްލުކުރުމަކީ އެންމެ ރަނގަޅު ގޮތް ކަމުގައި ގަބޫލުފުޅުކުރައްވާކަމުގައިވެސް އެޑިއުކޭޝަން މިނިސްޓްރީގެ ޕަރމަނަންޓް ސެކެޓްރީ އަހްމަދު އަލީ ވިދާޅުވިއެވެ.