ސްކޫލުތަކުގައި މުދައްރިސުންނަށް އެކަށީގެންވާ މަސައްކަތުގެ މާހައުލެއް ނެތް: މެންބަރު ޒިޔާދު
ތައުލީމީ އަދި ސިއްހީ ދާއިރާގެ ގިނަ މައްސަލަތަކެއް އެބަހުރި، ރަނގަޅު ކުރުމަށް ވަގުތު ނަގާނެ
ވައިކަރަދޫ ދާއިރާގެ މެންބަރު ހުސައިން ޒިޔާދު މަޖިލީހުގެ ޖަލްސާގައި ވާހަކަ ދައްކަވަނީ
ރާއްޖޭގެ ސްކޫލުތަކުގައި ކިޔަވައިދިނުމަށް މަސައްކަތް ކުރާ މުދައްރިސުންނަށް އެކަށީގެންވާ މަސައްކަތުގެ މާހައުލެއް ސްކޫލުތަކުގައި ނެތް ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.
ހޯމަ ދުވަހު ރައްޔިތުން މަޖިލީހުގައި ތައުލީމީ ދާއިރާގެ މަސައްކަތްތެރިންނާއި ސިއްހީ މަސައްކަތްތެރިން އިތުރުގަޑީގައި ކުރާ މަސައްކަތަށް ފައިސާދޭ އުސޫލުތަކާއި އަދުލުވެރި މަސައްކަތު މާހައުލެއް ގާއިމުކުރުމާމެދު ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ހުށަހެޅި ގަރާރަށް ބަހުސް ކުރައްވަމުން މެންބަރު ޒިޔާދު ވިދާޅުވީ ތައުލީމީ އަދި ސިއްހީ ދާއިރާގެ ގިނަ މައްސަލަތަކެއް އެބަހުރި ކަމަށާއި، ރަނގަޅު ކުރުމަށް ވަގުތު ނަގާނެ ކަމަށެވެ.
މެންބަރު ޒިޔާދު ވިދާޅުވީ މުވައްޒަފުންގެ ދަތިކަމުގެ އިތުރުން ވަސީލަތްތައް ވެސް މަދު ކަމަށެވެ. އަދި ވިދާޅުވީ ގޮނޑިއާ މޭޒު ވެސް ނެތް ކަމަށާއި، މުދައްރިސުންނަށް މަސައްކަތް ކުރާނެ ރަނގަޅު މާހައުލެއް ސްކޫލުތަކުގައި ނެތް ކަމަށެވެ.
ބައެއް ސްކޫލުތަކުގައި ދެ ދަންފަޅިއަށް ކިޔަވާއިރުގައި 8 ގަޑިއިރު ހަމަކޮށްފައި މަޖުބޫރުވޭ އަނެއްޓީޗަރުންނަށް އެތަނުން ނުކުމެގެންދާން. އެސްޓާފް ރޫމްގައި ނޯވޭ ޖާގައެއް. އެއް މޭޒެއް އެއްގޮޑިއެއް ޝެއަރކޮށްގެން މިއަދު ރާއްޖޭގެ ގިނަ ސްކޫލުތައް މިހާރު ވެސް ހިނގަމުންދަނީ. އެހެންވީމަ ޓީޗަރުންނަށް އެކަށީގެންވާ މަސައްކަތުގެ މާހައުލެއް ވެސް ސްކޫލުތަކުގައި ނެތް.ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު
ސިއްހީ ދާއިރާއަށް އިޝާރާތް ކުރައްވައި މެންބަރު ޒިޔާދު ވިދާޅުވީ ކުރީ ސަރުކާރުގައި ސިއްހީ ޚިދުމަތްތައް ހަރުދަނާ ކުރުމަށް ރަށްރަށުގެ ސިއްހީ މަރުކަޒުތަކުގެ އިމާރާތްތައް ބޮޑުކުރުމާއި، މުވައްޒަފުން އިތުރު ކުރުމުގެ އިތުރުން ޚިދުމަތްތައް ވެސް ގާއިމްކުރަމުން ދިޔަ ކަމަށެވެ. ސިއްހީ ޚިދުމަތް ހޯދުމަށް މާލެއަށް އައުން މަޖުބޫރުވެފައިވާ އޮތުން ބަދަލު ކުރުމަށް ވަރަށް ގިނަ މަސައްކަތްތައް ކުރި ކަމަށް މެންބަރު ޒިޔާދު ވިދާޅުވިއެވެ.
އެގޮތުން ސަރަހައްދީ ގިނަ ހޮސްޕިޓަލްތަކެއް ތަރައްގީ ކުރުމުގެ މަސައްކަތް ވެސް ކުރިއަށް ގެންދިޔަ ކަމަށާއި، ނަމަވެސް މިހާރު އެމަސައްކަތްތައް ހުއްޓިފައިވާ ކަމަށް އޭނާ ވިދާޅުވިއެވެ. މެންބަަރު ޒިޔާދު ވިދާޅުވީ މި ސަރުކާރުން ވެސް އެގޮތަށް މަސައްކަތް ކުރަންޖެހޭ ކަމަށާއި، އަތޮޅުތެރޭގެ ސިއްހީ ނިޒާމު ހަރުދަނާ ކުރަންޖެހޭ ކަމަށެވެ.
