ކުށް މަދު އަމާން މުޖުތަމައަކަށް އަވައްޓެރި ފުލުހުން

ކޮންމެ ތަނެއްގައިވެސް ކުށް ކުރާ މަދު ބަޔަކު ނަމަވެސް އުޅެއެވެ. އެހެންނަމަވެސް އެތަނަކީ ކުށް މަދު ތަނަކަށް ހެދުމަށް އެކި މުއައްސަސާތައް ގުޅިގެން އެތައް މަސައްކަތްތަކެއް މިހާރުވެސް ކުރަމުންދެއެވެ. މި މަސައްކަތުގެ ބޮޑު ރޯލެއް ފުލުހުން އަދާކުރަމުންދާއިރު، ފުލުހުން ކުރާ މަސައްކަތުން މުޖުތަމައުގައި ކުށް ކުރުން ކޮންމެވެސް ވަރަކަށް މަދުކުރެވެއެވެ. ކުށް ކުރާ މީހުން އަތުލައިގަނެ އެމީހުންނަށް ދޭންޖެހޭ އަދަބު ދެއެވެ. އެހެންނަމަވެސް މި މުޖުތަމައަކީ ކުށް މަދު ތަނަކަށް ހެދުމަށް އަދިވެސް ކުރަންޖެހޭ ވަރަށް ގިނަ މަސައްކަތްތަކެއް އެބަހުއްޓެވެ.

މި މުޖުތަމައަކީ ކުށް މަދު އަމާން ތަނަކަށް ހެދުމަށް ހަމައެކަނި ފުލުހުން ކުރާ މަސައްކަތަކުން މިކަމަށް ކާމިޔާބެއް ނުލިބޭނެއެވެ. މި މަސައްކަތަކީ ކާމިޔާބު މަސައްކަތަކަށް ހަދައި، މި މުޖުތަމައަކީ ކުށް މަދު ތަނަކަށް ހެދުމަށް ފުލުހުންނާއި އަދިވެސް މިނޫން މުއައްސަސާތައް ގުޅިގެން މަސައްކަތްކުރަން ޖެހެއެވެ. އަދި މިހާރު ފުލުހުންގެ ޚިދުމަތުން ފަށާފައިވާ އަވައްޓެރި ފުލުހުންގެ މަސައްކަތަކީ ކާމިޔާބު މަސައްކަތްތަކެއް ކުރުމަށް އެޅޭނެ ރަނގަޅު ފިޔަވަޅެއް ކަމުގައި ގިނަ ބަޔަކު ދެކެއެވެ. އަވައްޓެރި ފުލުހުންގެ ޚިދުމަތަކީ ކުރިއަށް އޮތް ފަސް އަހަރަށް ކަނޑައަޅާފައިވާ ފުލުހުންގެ ސްޓްރެޓީޖިކް ޕްލޭންގައި ހިމެނޭ ލަނޑުދަނޑިތަކުގެ ތެރެއިން ލޯކަލް ޕޮލިސިންގެ ތެރޭގައި ހިމެނޭ ކަމެކެވެ.

އަވައްޓެރި ފުލުހުންގެ ޚިދުމަތަކީ މައިގަނޑު 4 އަސާސެއްގެ މައްޗަށް ބިނާވެގެންވާ ޚިދުމަތެކެވެ. އެ އަސާސްތަކުގެ ތެރެއިން "އިތުބާރު" މިއީ ވަރަށް މުހިންމު އަސާސެއް ކަމުގައި ފުލުހުން ފާހަގަކުރެއެވެ. މިގޮތުން ފުލުހުންނާއި ރައްޔިތުންގެ މެދުގައި އިތުބާރު އޮންނަން ޖެހެއެވެ. ރައްޔިތުން ފުލުހުންނާއި ހިއްސާކުރާ މައުލޫމާތުތަކަކީ ސައްހަ މައުލޫމާތުތަކަކަށްވެ، އެއީ ސިއްރު ހިފެހެއްޓިފައިވާ މައުލޫމާތުތަކަކަށް ވާންޖެހެއެވެ. އަދި ފުލުހުންވެސް ރައްޔިތުންނަށް އިތުބާރުކުރަން ޖެހެއެވެ.

ފުލުހުންނާއި ރައްޔިތުންނާ ދެމެދު އޮންނަ ގުޅުން އިތުރަށް ހަރުދަނާކޮށް ވަރުގަދަކުރުމަކީ މިއަދު ވަރަށް ޚާއްސަ އިސްކަމެއް ދީގެން ކުރަން ޖެހިފައިވާ މުހިންމު މަސައްކަތެކެވެ. އަވައްޓެރި ފުލުހުންގެ ޚިދުމަތުގެ ތެރެއިން މިކަމަށްވެސް ވަރަށް ޚާއްސަ އިސްކަމެއް ދެވިގެންދެއެވެ. މިގޮތުން އަވައްޓެރި ފުލުހުންގެ އަސާސްތަކުގެ ތެރޭގައި ހިމެނޭ "އިޚުތިރާމް" މި ބައިން، ފުލުހުންނާއި ރައްޔިތުންނާ ދެމެދު އޮންނަ ގުޅުން ވަރުގަދަކުރުމަށް އިތުރަށް މަސައްކަތްތައް ކުރެވެއެވެ. އަދި ފުލުހުންނަކީ ރައްޔިތުންނަށް އިޚުތިރާމުކުރާ ބަޔަކަށްވެ، ރައްޔިތުންނަކީ ފުލުހުންނަށް އިޚުތިރާމު ކުރާ ބަޔަކަށް ވާންޖެހެއެވެ.

ބަޔަކު އެކުވެގެން ކުރާ މަސައްކަތެއް ގިނަ ފަހަރު ކާމިޔާބުވުމުގެ ފުރުސަރު ވަރަށް ބޮޑެވެ. ހަމަ މިގޮތަށް މުޖުތަމައުގައި ހުރި މައްސަލަތައް ހައްލުކުރުމަށް ފުލުހުންނާއި ރައްޔިތުން ގުޅިގެން ކުރާ މަސައްކަތުން މިކަން ކާމިޔާބުކުރެވިދާނެއެވެ. މިކަމަށް އިޝާރާތްކޮށް އަވައްޓެރި ފުލުހުންގެ އަސާސްތަކުގެ ތެރޭގައި "އެކުގައި" މި އަސާސް ހިމެނެއެވެ. ރައްޔިތުންގެ ފަރާތުން ފުލުހުންނަށް މައްސަލަތައް ހުށަހަޅައި ފުލުހުންނާއި ރައްޔިތުން ގުޅިގެން އެކުގައި އެ މައްސަލައެއް ހައްލުކުރުމުގެ މަސައްކަތް ކުރުމަށް މަގުފަހިވެއެވެ.

މި ހަތަރު އަސާސްގެ ތެރެއިން އެންމެ ފަހު އަސާސްއަކީ "އަމާން" މިއެވެ. މި މަސައްކަތްތަކުން އަމާން މުޖުތަމައެއް ގާއިމްކުރުމަކީ ފުލުހުންގެ އެންމެ ބޮޑު އެއް މަގުސަދެވެ. އަދި އަމާންކަމާއެކު މި މަސައްކަތްތައް ކުރުމަށް ފުލުހުން އަމާޒު ހިފާފައިވާއިރު، މި 4 އަސާސް އެންމެ ފުރިހަމަ ގޮތުގައި ހާސިލްކުރެވިއްޖެނަމަ މި މަސައްކަތަކީ ކާމިޔާބު މަސައްކަތަކަށް ވެގެންދާނެއެވެ. އަދި މި މުޖުތަމައަކީ އަމާން މުޖުތަމައަކަށް ހެދިގެންދާނެއެވެ.