އިދިކޮޅު ޕީޕީއެމް އިން 5000 މެމްބަރުން އެހެން ޕާޓީތަކަށް ގެންދިޔަކަމަށް ބުނެ ޝަކުވާތައް ބޮޑުވުމާއި ގުޅިގެން އިލެކްޝަންސް ކޮމިޝަންގެ ރެޖިސްޓްރޭޝަން ސެކްޝަންގެ އޮޑިޓެއް ހަދަން ނިންމައިފިއެވެ.
އިދިކޮޅު ޕީޕީއެމްގެ 5،000 މެމްބަރުން އޮޅުވާލައިގެން އެހެން ޕާޓީތަކަށް ވައްދާފައިވާކަމުގެ ތުހުމަތު އެޕާޓީން ގެންދަނީ ކުރަމުންނެވެ. ޕީޕީއެމްގެ ސެކްރެޓަރީ ޖެނަރަލް މުހައްމަދު ތޮލާލް ކުރެއްވި ޓްވީޓްއެއްގައި ވިދާޅުވީ, 2021 ވަނަ އަހަރުގެ އޮކްޓޯބަރުން ފެށިގެން އެހެން ޕާޓީތަކަށް މެމްބަރުން ވަގަށް ގެންގޮސްފައިވާ ކަމަށެވެ. އަދި އިލެކްޝަންސް ކޮމިޝަނުން އެކަން ބަލަންޖެހޭކަމަށް ބުނެ އޭނާ ވަނީ މައްސަލަވެސް ހުށަހަޅުއްވާފައެވެ.
މިކަމާއި ގުޅިގެން ރާއްޖެއެމްވީއަށް މައުލޫމާތުދެއްވަމުން އިލެކްޝަންސް ކޮމިޝަން ގެ ރައީސް ފުއާދު ތައުފީޤް ވިދާޅުވީ މިކަމުގެ ޝަކުވާތައް ބޮޑުވުމާއެކު ދެން އެންމެ އަވަހަށް އިސްކަމެއް ދީގެން އޮޑިޓް ކުރާނީ އިލެކްޝަން ކޮމިޝަންގެ ރެޖިސްޓްރޭޝަން ސެކްޝަން ކަމަށެވެ. މި އޮޑިޓުގެ ތެރެއިން ޕާޓީތަކުގެ ފޯމުތައް ބަލައިގެންފައިވަނީ ގާނޫނާ ގަވާއިދާ އެއްގޮތަށް ތޯ ބަލާނެ ކަމަށް ފުއާދު ވިދާޅުވިއެވެ.
ފުއާދު ވިދާޅުވީ މިފަދަ ޝަކުވާތަކަކީ ހުރިހާ ޕާޓީތަކަކުންވެސް ހުށަހަޅާ ޝަކުވާތަކެއް ކަމަށެވެ. އަދި މިކަމުގައި އިލެކްޝަންސް ކޮމިޝަންގެ ބައިވެރިވުން އޮންނަ ކަމަށް ޕާޓީތަކުން ބުނަމުންދާއިރު، މި މައްސަލައާ ގުޅިގެން މީގެ ކުރިން ހުރިހާ ސިޔާސީ ޕާޓީތަކާ ބައްދަލުކޮށްފައިވާނެ ކަމަށް ފުއާދު ވިދާޅުވިއެވެ. އަދި ޕީޕީއެމުން ހުށަހަޅާފައިވާ މި މައްސަލައާ ގުޅިގެން ޕީޕީއެމްއާވެސް ބައްދަލުކޮށްފައިވާކަމަށާއި، އަދިވެސް އިތުރު ބައްދަލުވުންތައް ބާއްވާނެ ކަމަށް ފުއާދު ވިދާޅުވިއެވެ.
ފުއާދު ވިދާޅުވީ މިއީ އަބަދުވެސް ޕާޓީތަކުން ހުށަހަޅާ މައްސަލައެއް ކަމަށާއި، މީގެ ކުރިން މިފަދަ ކަންކަން ކުރާ ފަރާތްތަކާމެދު ހަރުކަށި ފިޔަވަޅުވެސް އަޅާފައިވާކަމަށެވެ. އެހެންކަމުން އަނެއްކާވެސް މި ޕްރޮސެސް ފައްޓަން ނިންމަވާފައިވާކަމަށް ފުއާދު ވިދާޅުވިއެވެ.
ފުއާދު ވިދާޅުވީ ޕީޕީއެމްގެ 5،000 މެމްބަރުން އޮޅުވާލައިގެން އެހެން ޕާޓީތަކަށް ވައްދާފައިވާކަމަށް ތުހުމަތު ކުރި ނަމަވެސް އެ އަދަދަށް ވަގު ފޯމު އޮންނާނެ ކަމަށް ގަބޫލުފުޅު ނުކުރެއްވޭ ކަމަށެވެ. އެހެންނަމަވެސް ކޮންމެވެސް ވަރަކަށްވަގު ފޯމު ހުންނާނެ ކަމަށް ވިދާޅުވިއެވެ.
މީގެ އިތުރުން ޕާޓީތަކުން ގެންނަ ފޯމްތައް ވެބްސައިޓުގައި ހަފްތާއެއް ވަންދެން އާންމު ކުރުމަށްފަހު ރަޖިސްޓްރީކޮށްދޭ ގޮތަށް ނިންމުމަށް އީސީން މަޝްވަރާކުރަމުން ދާކަން ފުއާދު ވަނީ ފާހަގަކުރައްވާފައެވެ.
