އިމްޕޯޓް އެކްސްޕޯޓުން 319 މިލިއަން ރުފިޔާގެ އާމްދަނީއެއް މާރޗް މަހު ދައުލަތަށް ލިބިފައިވާކަމަށް މޯލްޑިވްސް ކަސްޓަމްސްއިމް ހާމަކޮށްފިއެވެ.

ކަސްޓަމްސްއިން މާރޗް މަހުގެ ތަފާސްހިސާބުތައް އާންމުކޮށްފައިވާއިރު، މާރޗް މަހު ރާއްޖެއިން އެކްސްޕޯޓްކުރި މުދަލުގެ އެފްއޯބީ އަގު 432 މިލިއަން ރުފިޔާއަށް ވަނީ އަރާފައެވެ. މިއީ މިދިޔަ އަހަރުގެ މާރޗް މަހާ އަޅާ ބަލާއިރު 28 އިންސައްތައިގެ އިތުރުވުމެކެވެ. މިދިޔަ އަހަރުގެ މި މުއްދަތުގައި ލިބިފައިވަނީ 337 މިލިއަން ރުފިޔާއެވެ.

މިދިޔަ މަހު ރާއްޖެއަށް އެތެރެކުރި މުދަލުގެ ސީއައިއެފް އަގު 3.9 ބިލިއަން ރުފިޔާއަށް އަރާއިރު، މިދިޔަ މަހުގެ މި މުއްދަތުގައި ރާއްޖެ އެތެރެކޮށްފައިވަނީ 3.4 ބިލިއަން ރުފިޔާގެ މުދަލެވެ. މިއަހަރު މި އަދަދު ވަނީ 15 އިންސައްތައިން އިތުރުވެފައެވެ. މިއާއެކު މާރޗް މަހު 319 މިލިއަން ރުފިޔާގެ އާމްދަނީއެއް ދައުލަތަށް ލިބިފައިވާކަމަށް ކަސްޓަމްސްއިން ވަނީ ހާމަކޮށްފައެވެ. މިއީ ފާއިތުވި އަހަރާ އަޅާ ބަލާއިރު 21 އިންސައްތައިގެ އިތުރުވުމެއް ކަމަށް ކަސްޓަމްސްއިން ބުނެފައިވެއެވެ. މިދިޔަ އަހަރުގެ މި މުއްދަތުގައި ދައުލަތަށް ލިބިފައިވަނީ 264 މިލިއަން ރުފިޔާގެ އާމްދަނީއެކެވެ.

މިދިޔަ މަހު އަގުގެ ގޮތުން އެންމެ ގިނަ މުދާ އެކްސްޕޯޓުކޮށްފައިވަނީ ތައިލޭންޑަށް ކަމަށް ކަސްޓަމްސްއިން ބުނެފައިވެއެވެ. ތައިލޭންޑަށް 49 އިންސައްތަ މުދާ އެކްސްޕޯޓުކޮށްފައިވާއިރު، އިނގިރޭސިވިލާތަށް 11 އިންސައްތަ މުދާ، މޮރިޝަސްއަށް 9 އިންސައްތަ މުދާ، ޖަރުމަނުވިލާތަށް 5 އިންސައްތަ މުދާ އަދި އިންޑިއާއަށް 4 އިންސައްތަ މުދާ އެކްސްޕޯޓުކޮށްފައިވާކަމަށް ކަސްޓަމްސްއިން ހާމަކޮށްފައިވެއެވެ.

ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އޮމާން ، ޔޫ.އޭ.އީ އަދި އިންޑިއާ އެވެ. އޮމާން އިން 637 މިލިއަން ރުފިޔާގެ މުދާ އެތެރެކޮށްފައިވާއިރު، ޔޫ.އޭ.އީ އިން 628 މިލިއަން ރުފިޔާގެ މުދާ ވަނީ އެތެރެކޮށްފައެވެ. މީގެއިތުރުން އިންޑިއާ އިން 543 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފައެވެ.