ޔަމަނުގެ ރައްޔިތުން މުޅި ދުނިޔޭގެ އެހީއަށް ބޭނުންވެފައި

ދުނިޔޭގެ އެންމެ ބޮޑު އިންސާނީ ކާރިސާއަކާ މިވަގުތު ކުރިމަތިލާންޖެހިފައިވާ ގައުމަކީ ޔަމަނެވެ. 2015 ވަނަ އަހަރު ޔަމަނުގައި ފެށި ހަނގުރާމައަށްފަހު އެގައުމުގެ ރައްޔިތުންނަށް ވަނީ ދަތި އުނދަގޫ އެތައް ކަމެއް ތަހައްމަލުކުރަންޖެހިފައެވެ. 30 މިލިއަން މީހުންގެ ބޮޑު އާބާދީއެއް އޮންނަ މި ގައުމުގައި ހަނގުރާމައިގެ ސަބަބުން މިހާތަނަށް 4 މިލިއަނާ ގާތްކުރާ އަދަދަކަށް މީހުން މަރުވެ ގޮސްފައިވާކަމަށް ވަނީ ލަފާކޮށްފައެވެ. އަދި 22 މިލިއަނަށްވުރެ ގިނަ މީހުން އިންސާނީ އެހީތެރިކަމަށް ބޭނުންވެފައިވާއިރު، 19 ވަރަކަށް މިލިއަން މީހުންނަށް ބޭނުންވާ ކާނާ ލިބުން ވަރަށް ދައްޗެވެ. އަދި 4 މިލިއަން މީހުންނަށް ވީނުވީއެއް ނޭނގި ވަނީ ގެއްލިފައެވެ. މިއީ މިހާތަނަށް ދިމާވެފައިވާ އެންމެ ބޮޑު އިންސާނީ ކާރިސާއެވެ. އެހެންނަމަވެސް މި އިންސާނީ ކާރިސާ މުޅި ދުނިޔެއިން ހަނދާން ނެތިފައި އޮތް ފަދައެވެ.

ޔަމަނުގެ އެތައް މިލިއަން ބަޔަކު ބަނޑުހައިހޫނުކަމުގައި ދިރިއުޅެމުންދާއިރު މީގެ ތެރޭގައި ގިނަ އަދަދެއްގެ ކުޑަކުދިން ހިމެނެއެވެ. އެކުދިން ހެދިބޮޑުވުމަށް ބޭނުންވާ ނިއުޓްރިޝަންއާއި، އަދިވެސް އިތުރު މާއްދާތައް އެކުދިންނަކަށް ނުލިބެއެވެ. މިއީ ކަންބޮޑުވާންޖެހިފައިވާކަމެކެވެ. އެގައުމުގެ ރައްޔިތުންނަށް ކާނާ ފޯރުކޮށްދިނުމަށް މިހާރު ވަނީ ވަރަށް ބޮޑަށް ދަތިވެފައެވެ. އެގައުމުގެ ރައްޔިތުންނަށް ކާޑުގެ ބާވަތްތައް ފޯރުކޮށްދިނުމަށް އެތަކެތި ހައްދަމުންދިޔަ އެއް ގައުމަކީ ޔޫކްރެއިނެވެ. އެހެންނަމަވެސް މިހާރު ކުރިއަށްދާ ހަނގުރާމައިގެ ސަބަބުން އެ ދަނޑުތަކަށް އަޅާނުލެވި އެތަންތަންވެސް ވަނީ ހަލާކުވެފައެވެ.

ޔަމަނުގައި ކާނާއަށް ބޭނުންވެފައިވާ އާއިލާތަކަށް ޔުނިސެފްއާއި އެކި ފަރާތްތަކުން އެހީތެރިކަން ފޯރުކޮށްދެމުންދެއެވެ. ނަމަވެސް އެންމެންނަށް ބޭނުންވާވަރަށް ކާނާ ފޯރުކޮށްދިނުމަށް އެފަރާތްތަކަށްވެސް ވަނީ ދަތިވެފައެވެ. ބޭރުގެ މީޑިއާއަކާ ވާހަކަދެއްކި ޔަމަނުގެ މަންމައަކު ބުނިގޮތުގައި އާއިލާގެ އެންމެންނަށް ބޭނުންވާވަރަށް ކާނާއެއް ނުލިބެއެވެ. ކުޑަކުދިންނަށް ބޭނުންވާ ނިއުޓްރިޝަންތައް ނުލިބި ހާލުގައި އުޅެމުންދާއިރު، އެކުދިން ގެންދަނީ ބަނޑުހައިވުމުން އެކުދިންގެ އަމިއްލަ އަތް ކަމުންނެވެ. ޔަމަނުގެ ހާލަތު އިންތިހާއަށް ގޯސްވެފައިވާކަން މިކަމުން އެނގިގެންދެއެވެ. އަދި މުޅި ދުނިޔޭގެ އެހީތެރިކަން އެގައުމަށް މިއަދު މިވަނީ ބޭނުންވެފައެވެ.

ޔަމަނުގެ އިތުރުން ސީރިއާ އަދި އަފްގާނިސްތާނުގެ ހާލަތުވެސް އަދި ހަމައަކަށް އެޅިފައިނުވާއިރު، ޔޫކްރެއިން-ރަޝިއާ ހަނގުރާމައާއެކު އެގައުމުތަކުގެ ހާލަތުވެސް ވަނީ އިތުރަށް ގޯސްވެފައެވެ. އެގައުމުތަކުގެ ރައްޔިތުންނަށްވެސް ކާނާ ލިބުމަށް ދައްޗެވެ. އެމީހުންނަށްވެސް އިންސާނީ އެހީ ވަނީ ބޭނުންވެފައެވެ. އެހެންނަމަވެސް މިއަދު މުޅި ދުނިޔޭގެ ލޯ ހުއްޓިފައިވަނީ ޔޫކްރެއިންގެ ރައްޔިތުން ތަހައްމަލުކުރަމުންދާ ދަތި ހާލަތަށެވެ. މީގެ އެތައް އަހަރެއް ކުރިން މުސްލިމު ގައުމުތަކުގައި ފެށި ހަނގުރާމަތަކުގައި އެގައުމުތަކުން ރެފިއުޖީންގެ ގޮތުގައި ދިޔަ މީހުން ބަލައިގަތީ ވަރަށް މަދު ގައުމަކުންނެވެ. ޔޫރަޕުގެ ގައުމުތަކުން އެމީހުން ބަލައިގެންފައެއް ނުވެއެވެ. އެހެންނަމަވެސް މިއަދު ޔޫކްރެއިނުން ޔޫރަޕުގެ ގައުމުތަކަށް ދާ ރެފިއުޖީން ބަލައިގަތުމަކީ ގިނަ ބައެއްގެ ކަންބޮޑުވުން މިކަމުގައި އޮތް ކަމެކެވެ.

ޔޫކްރެއިންގެ ރައްޔިތުންނަށް ގައުމުތަކުން އެހީވާ ބީދައިން އެއްވެސް ތަފާތުކުރުމެއްނެތި އިންސާނީ އެހީތެރިކަން ފޯރުކޮށްދޭންޖެހެއެވެ. ޔަމަން، ސީރިއާ، އަދި އަފްގާނިސްތާނުގެ އެތައް ބަޔަކު މިއަދު އިންސާނީ އެހީއަށާއި، ކާނާއަށް ބޭނުންޖެހިފައިވާއިރު، މި ގައުމުތަކަށް ދިމާވެފައިވާ މި ކާރިސާ ކުރިއަށް އޮތް ތަނުގައި އިތުރަށް ގޯހުން ގޯހަށް ގޮސްދާނެ ކަމަށް ގިނަ ބަޔަކު ލަފާކުރެއެވެ. ވަކިން ޚާއްސަކޮށް މިއަހަރުގެ މެދުތެރެއިން ފެށިގެން ފަހުކޮޅަށް މި ހާލަތު އިތުރަށް ގޯސްވެ އެ މީހުން ބަނޑަށް ޖެހިދާނެ ކަމަށް އދ. އިންވެސް ލަފާކުރެއެވެ.