ފުރަތަމަ ލެގުގެ ނަތީޖާއިން ކުރި ހޯދައިގެން ލިވަޕޫލް ސެމީއަށް!

އަމިއްލަ ދަނޑުގައި ބެންފީކާ އަތުން މޮޅުނުވެވުނަސް, ބެންފީކާގެ ދަނޑުގައި ކުރި ހޯދާފައިވާތީ ޗެމްޕިއަންސް ލީގުގެ ސެމީ ފައިނަލުން ލިވަޕޫލަށް ޖާގަ ލިބިއްޖެއެވެ.

ދެވަނަ ލެގުގައި ލިވަޕޫލްގެ ދަނޑުގައި ވާދަކުރި މެޗު ނިމުނީ 3-3 ން އެއްވަރު ވެގެންނެވެ. އެކަމަކު ފުރަތަމަ ލެގުގައި ލިވަޕޫލުން ވަނީ 3-1 ން މެޗު ކާމިޔާބުކޮށްފައެވެ. އެހެންކަމުން ދެ ލެގުން ލިވަޕޫލަށް ކުރި ލިބުނީ 6-2 ގެ އެގްރިގޭޓުންނެވެ. ދެވަނަ ލެގުގައި ފުރަތަމަ ލަނޑުޖަހާ ލިވަޕޫލަށް ކުރި ހޯދައިދިނީ އިބްރާހިމާ ކޮނާޓޭއެވެ. އެކަމަކު ހާފް ނިމުމުގެ ކުރިން މަޓިއަސް ރާމޯސް ލަނޑުޖަހާ ބެންފީކާއަށް އެއްވަރުކޮށްދިނެވެ. އޭގެކުރިންވެސް ބެންފީކާއިން ލަނޑެއް ޖެހިއެވެ. އެކަމަކު ވީއޭއާރުން ބެލުމަށްފަހު ނިންމީ އޮފްސައިޑްކަމަށެވެ. ދެވަނަ ހާފް ފަށައިގެން ލިވަޕޫލުން ދެ ލަނޑުގެ ލީޑެއްނެގީ ފިރްމީނިއޯ ޖެހި ދެ ލަނޑުންނެވެ. އެކަމަކު ފަހު 17 މިނިޓްގެ ތެރޭގައި ދެ ލަނޑު ޖަހައިގެން ބެންފީކާއިން ލިވަޕޫލްގެ ދަނޑުގައި ލިވަޕޫލް ހިފެހެއްޓިއެވެ. އެޓީމްގެ ފަހު ދެ ލަނޑު ޖަހައިދިނީ ޔަރެމްޗުކް އާއި ނޫނޭޒްއެވެ.

ސެމީ ފައިނަލްގައި ލިވަޕޫލް ވާދަކުރަންޖެހޭނީ ބަޔާން މިއުނިކް ކަޓުވާލި ސްޕެއިންގެ ވިޔަރެއާލްއާއެވެ.