ސްޓޭޕްލް ފުޑް ފެކްޓްރީ އެޅުމަށް ކުޅުދުއްފުށިން ބިން ހަމަޖައްސައިފި
13 އެޕްރީލު 2022 | ބުދަ 13:57މިފުޑް ފެކްޓްރީ އެޅުމަށް ބިން ހަމަޖައްސާފައިވަނީ ކުޅުދުއްފުށީ ޕޯޓް ސަރަހައްދުން
ސްޓޭޕްލް ފުޑް ފެކްޓްރީ އެޅުމަށް ކުޅުދުއްފުށިން ބިން ހަމަޖެއްސުން
އެސްޓީއޯއިން ކުޅުދުއްފުށީގައި އެޅުމަށް ނިންމާފައިވާ, ފުށާއި ހަނޑުލުގެ ފެކްޓްރީ ހަދަން ބޭނުންވާ ބިން ހަމަޖައްސައިފިއެވެ.
މިފުޑް ފެކްޓްރީ އެޅުމަށް ބިން ހަމަޖައްސާފައި ވަނީ ކުޅުދުއްފުށީ ޕޯޓް ސަރަހައްދުންނެވެ. އަދި މިއަހަރު މިފެކްޓްރީގެ އަމަލީ މަސައްކަތް ފެށުމަށްވެސް ވަނީ ނިންމާފައެވެ.
މިކަމާ ގުޅޭގޮތުން ކުޅުދުއްފުށީ ސިޓީ ކައުންސިލްގެ މޭޔަރު މުހައްމަދު އާތިފް ފޭސްބުކްގައި ކުރެއްވި ޕޯސްޓެއްގައި ވިދާޅުވީ, ރާއްޖޭގެ ސްޓޭޕްލް ފުޑް ފެކްޓްރީ ކުޅުދުއްފުށި ސިޓީގައި އެޅުމަކީ ކުޅުދުއްފުއްޓަށް މިވަގުތު ބޭނުންވެފައި އޮތް އިކޮނޮމިކް ޖަމްޕް ޖެހުމަށް ނުހަނުބޮޑު ފުރުސަތަކަށް ވެގެންދާނެކަމަށް ގަބޫލުކުރައްވާކަމަށެވެ.
މޭޔަރު ވިދާޅުވީ މިފަދަ ފެކްޓްރީއެއް އެސިޓީގައި ގާއިމުވެގެން ހިނގައްޖެނަމަ, އިގުތިސާދީ އިތުރު ދޮރުތަކެއް ރަށުގެ ރަައްޔިތުންނަށް ހުޅުވިގެންދާނެކަމަށާއި, މުޅިރާއްޖެއަށް ބޭނުންވާ ފުށާއި ހަނޑޫ ކުޅުދުއްފުށިން ސަޕްލައިކުރަން ފެށުމުން (ސީދާ ގޮތުންނާއި ނުސީދާގޮތުން) ރަށުގައި ހިންގާ ވިޔަފާރިތަކަށް ހެޔޮ ބަދަލެއް އަންނާނެ ކަމަށް ދެކެވަޑައިގަންނަވާކަމަށެވެ
އަދި މިއީ ކާނާގެ ރައްކާތެރިކަން ކަށަވަރުކުރުމަށް ކުރެވިގެންދާ މުހިންމު މަސައްކަތެއް ކަމަށާއި, އެސްޓީއޯއިން މި ފެކްޓްރީ ގާއިމުކުރުމަށް ކުޅުދުއްފުށި ޚިޔާރުކުރުމަކީ މި ސިޓީ ވިޔަފާރީގެ ހަބެއްގެ ގޮތުގައި ތަރައްގީވުމަށް ކުރާ މަސައްކަތަށް ލިބުނު ބޮޑު އުންމީދެއްކަމަށް މޭޔަރު ވިދާޅުވިއެވެ.
މިކަމާގުޅޭގޮތުން މަޝްވަރާކުރުމަށް, ކުޅުދުއްފުށި ސިޓީކައުންސިލާއި އެސްޓީއޯއާއި އެމްޕީއެލްގެ އިސްވެރިންގެ އިތުރުން ދެ ދާއިރާގެ މަޖްލިސް މެންބަރުންނާއެކު ވަނީ ބައްދަލުވުމެއް ބާއްވާއެވެ.
