ރައްޔިތުންނަށް ނޭނގޭގޮތަށް ޓެކްސީތަކުގެ އަގު މިނިސްޓްރީން ފާސްކޮށްފައި ފިލީ؟

ތެޔޮ އަގުބޮޑުވެއްޖެކަމަށް ބުނެ, އެކަމުގެ ފައިދާ އެންމެ ބޮޑަށް ހިފި އެއް ބަޔަކީ ޓެކްސީ ޑްރައިވަރުންނެވެ. މީގެ ކުރިން ތެލުގެ އަގު ވަކިލާރިން ގަނެވޭ ވަރަށް ހުރިއިރު, ޓެކްސީކުރާ އަގު ކުޑަނުކުރެވުނު ފަރާތްތަކުން އެކައްޗެއް ކިޔައިގެން ޓެކްސީ ފީގެ އަގު ބޮޑުކޮށް, ގަދަ ދެއްކީ އާންމުންނަށް އެނޫން ގޮތެއް ނޯންނާނެކަން އެނގިތިބެއެވެ.

އަމިއްލައަށް އަގު ކަނޑައަޅައިގެން ވަކި ސަރުކާރެއް ހިންގުމަކީ, އިއްޔެއަކު މިއަދަކު ޓެކްސީ ޑްރައިވަރުން ކުރާ ކަމެއް ނޫނެވެ. މިއީ އަބަދުވެސް ތެލުގެ އަގު ބޮޑުވާ ކޮންމެ ފަހަރަކު ޓެކްސީ ޑްރައިވަރުންނާއި ސެންޓަރުތަކުން ކުރަމުން އަންނަ ކަމެކެވެ. އާންމު ޚިދުމަތް ދިނުމަށް ވަކި އަގެއް ކަނޑައަޅާފައި އޮތަސް, ކަން އޮތީ އެހެންނެއް ނޫނެވެ.

ކަން މިހެން އޮއްވައި އާންމުން ރުޅިގަދަވެ, ކަމާބެހޭ ފަރާތްތަކަށް އެކަން ހުއްޓުވުމަށް ގޮވާލުމުން ޒިންމާދާރުކަމާއެކު ނެރުނީ ބަޔާނެކެވެ. އެވެސް ޓެކްސީ ސެންޓަރުތަކުން އަގު ކަނޑައަޅައި ޓެކްސީތަކުން ރައްޔިތުން "ފެލަން ފެށިތާ" 3 ދުވަސް ވީފަހުންނެވެ. ނެރުނީ ހަމައެކަނި ބަޔާނެކެވެ. މި މައްސަލާގައި ޓްރާންސްޕޯޓް މިނިސްޓްރީން ނެރުނު ނޫސްބަޔާނުގައި ބުނެފައިވަނީ, ޓެކްސީގެ ޚިދުމަތަކީ ރައްޔިތުންނާ ގުޅުންހުރި އަސާސީ ޚިދުމަތަކަށްވެފައި, ދުނިޔޭގެ ހުރިހާ ގައުމެއްގައިވެސް އަދި ދިވެހިރާއްޖޭގައި ވެސް މި ޚިދުމަތަކީ ރެގިއުލޭޓް ކުރެވިގެން ދެވޭ ޚިދުމަތަކަށްވާތީ، ޓެކްސީ ރަޖިސްޓަރީކުރުމާއި, ޓެކްސީތަކަށް ހުއްދަ ދިނުމާއި, ޓެކްސީ ދަތުރުތަކުގެ އަގު ކަނޑައެޅުމަކީ ޚިދުމަތް ހޯދާ ފަރާތާއި އަދި ޚިދުމަތް ލިބިގަންނަ ފަރާތުގެ ހައްގުތައް ހިމާޔަތްކުރެވޭގޮތަށް ކަނޑައަޅާފައިވާ ކަމެއް ކަމަށެވެ.

އަދި ގަވާއިދުން ބާރުލިބިގެން ކަނޑައަޅާފައިވާ އަގަށް ވުރެ ބޮޑުއަގު ނަގާ ޓެކްސީ ޑްރައިވަރުންނާއި އަދި ޓެކްސީ ސެންޓަރުތަކާމެދު ޓެކްސީ ގަވާއިދުގެ 20 ވަނަމާއްދާގެ ދަށުން ފިޔަވަޅު އަޅާނެ ކަމަށެވެ. ނަމަވެސް މަސް ދުވަސް ވެގެން ދިޔައިރުވެސް މިނިސްޓަރާއި, އަދި ޒިންމާވާ ފަރާތްތައް އަދިވެސް ތިބީ ނިދާފައެވެ. އެޅި ފިޔަވަޅެއް ވެސް ނެތެވެ. ކުރެވުނު އެއްކަމެއްވެސް ނެތެވެ.

ދުވަސްތަކެއް ފަހުން އާންމުން ހަނދާން ނެތޭހާ ހިސާބަށް ކަންކަން ދިޔައިރުވެސް މިނިސްޓްރީން އަޅައިވެސްނުލައެވެ. އަދި ކިއެއްހެއްޔެވެ؟ ނޫސްވެރިން ބަރިބަރިއަށް ކުރާ ސުވާލުތަކަށް އެއްވެސް ޖަވާބެއްވެސް ނުދެއެވެ. ގުޅީމައި ފޯނު ނުނަގާތާނގައި ކުރާ މެސެޖަކަށް ޖަވާބެއްވެސް ނުދެއެވެ. ޒިންމާ އަދާކުރުމަށް ހަވާލުކުރެވުނު މީހުންގެ ކަންކަން ހުރި ހިސާބަކީ މިއެވެ. އާންމުން ސުވާލު އުފައްދަން ފަށައިފިއެވެ. ސުވާލަކީ އާންމުންނަށް ނޭނގޭގޮތަށް, މިނިސްޓްރީން އެތެރެއެތެރެއިން ޓެކްސީ ސެންޓަރުތަކާ ގުޅިގެން އެމީހުން ނަގަން ފެށި އަގަށް އެއްބަސްވެ, އެ އަގު ފައިނަލްކުރީތޯއެވެ.

ފުލުހުން ވެސް އެބަތިއްބެވެ. ރިޕޯޓް ކުރަން އެންގިއެވެ. ނިކަން ފޯރީގައި ސޯޝަލް މީޑިއާގައި ވަރުވަރުން ޕޯސްޓް ޖަހައި އެކަންވެސް ކުރިއެވެ. ފިޔަވަޅުވެސް އަޅާނެ ކަމަށެވެ. މީގެ އެއްމަސް ކުރިން, ޚުދު އަޅުގަނޑު ކުރި ރިޕޯޓަށް އަދިވެސް ޖަވާބެއް ނުލިބެއެވެ. އެ ޓެކްސީ ޑްރައިވަރު މިހާރު އަގު ނަގަނީ އިހުނަށްވުރެ ބޮޑުކޮށެވެ.

ޓެކްސީތަކުން މިހާރު އެ ނަގާ އަގުތަކަށް މިނިސްޓްރީން ރުހޭކަމަށް ބުނެވޭނެ އަނެއް ވާހަކައަކީ, އަވަސް ރައިޑް އެޕްގައި ނަގާ އަގުތައް ބަދަލުކޮށް, އެ އަގުތައް ދެއްކުމަށް އާންމުންނަށް އިލްތިމާސްކުރުމެވެ. އެޕްގައިވާ އަގަށްވުރެ ބޮޑު އަގު ނުދެއްކުމަށް އެދުމުން އަވަހަށް އެޕް ހުޅުވާލިއިރު ކަމަކުދާކަށް ނެތެވެ. އަގުތައް ބޭނުންވަރަކަށް ޖަހާލާފައި އެ އަގަށްވުރެ ބޮޑުކޮށް ނުދިނުމަށް ބުނެ އާންމުންނަށް މަލާމާތެއް ކޮށްލިފަދައެވެ.

އަވަސް ރައިޑުން ކުރި ޓްވީޓެއްގައި ވަނީ އެޕްލިކޭޝަނުން ދައްކާ އަގު އެކަނި ދެއްކުމަށް ކަސްޓަމަރުންނަށް ނަސޭހަތްތެރިވެފައިކަމަށެވެ. އަދި ޓްރާންސްޕޯޓް މިނިސްޓްރީ ކަނޑައަޅާފައިވާ އަގަށްވުރެ ބޮޑުކޮށް އަގު ނެގުމަށް ޑްރައިވަރުންނަށް ހިތްވަރު ނުދޭކަމަށް ވެސް ވަނީ ބުނެފައެވެ.

ޓެކްސީ ޑްރައިވަރުން ކަނޑައަޅާފައިވާ އަގުތަކަށް ބަލާއިރު, މާލެތެރޭގެ ދަތުރަކަށް 30 ރުފިޔާ، ހުޅުމާލެ ފޭސް އެކެއް އަދި ފޭސް ދޭއްގެ އެތެރޭ ދަތުރަކަށް 25 ރުފިޔާ، ހުޅުމާލެ ފޭސް އެކަކުން ހުޅުމާލެ ފޭސް ދޭކަށް 40 ރުފިޔާ ނެގުމަށް ވަނީ ނިންމާފައެވެ. އަދި ހުޅުމާލެ ފޭސް ދޭކުން މާލެއަށް, އަދި މާލެއިން ހުޅުމާލެ ފޭސް ދޭކަށް 120 ރުފިޔާ، މާލެއިން ހުޅުމާލެއަށް, އަދި ހުޅުމާލެއިން މާލެއަށް 100 ރުފިޔާ، އެއާޕޯޓުން މާލެއަށް, އަދި މާލެއިން އެއާޕޯޓަށް 80 ރުފިޔާ، ހުޅުމާލެއިން އެއާޕޯޓްގެ ސީޕްލޭން ޓަރމިނަލަށް 100 ރުފިޔާ، މާލެއިން ހުޅުލޭ އެއާޕޯޓްގެ ސީޕްލޭން ޓަރމިނަލަށް 100 ރުފިޔާ, އަދި ހުޅުމާލެ ފޭސް ދޭކުން ހުޅުލޭ ސީޕްލޭން ޓަރމިނަލަށް 120 ރުފިޔާ ނެގުމަށް ވަނީ ނިންމާފައެވެ.

އަދި މިއަށްވުރެ ބޮޑުކޮށްވެސް ނަގަނީއެވެ. މިނިސްޓްރީ އޮތީ ހަމަ ނިދާފައެވެ. ދޭނެ ޖަވާބެއް ވެސް ނެތެވެ. ދައްކާނެ ވާހަކައެއް ވެސް ނެތެވެ. ދިނީ ފިނި އިންޒާރެކެވެ. އެއަށްފަހު ހޮހަޅައަށް ވަދެ ފިލައިފިއެވެ. ފިލުމުގެ ކުރިން, ޓެކްސީ ޑްރައިވަރުންނަށް ބޭނުން އަގެއް ނަގާނެ ފުރުސަތުދީ އެކަން ވެސް ކޮށް ނިންމިކަމަށް ގިނަ ބަޔަކު ގަބޫލުކުރެއެވެ.