ހިޔާ ފްލެޓަށް މަހުން މަހަށް ދައްކަން ޖެހޭ ކަމަށް އެޗްޑީސީ އިން ކަނޑައެޅި އަގަކީ ވިޔަފާރީގެ ގޮތުން ރަނގަޅު އަދި ކުންފުންޏަށް ގެއްލުމެއް ނުވާނެ އަގެއް ކަމަށް އޮޑިޓަރ ޖެނެރަލް ހުސައިން ނިޔާޒީ ވިދާޅުވެއްޖެއެވެ.

ހިޔާ ފްލެޓަށް މަހުން މަހަށް ދައްކަން ޖެހޭ ކަމަށް އެޗްޑީސީ އިން ކަނޑައެޅީ 11،000 ރުފިޔާއެވެ. އެހެންނަމަވެސް ރައްޔިތުންގެ ކަން ބޮޑުވުމާއެކު އެ އަގު ރިވިއުކޮށް އެތަނަށް މަހުން މަހަށް ދައްކަން ޖެހޭނީ 8500 ރުފިޔާ ކަމަށް ސަރުކާރުން ކަނޑައެޅިއެވެ.

މާލިއްޔަތު ކޮމިޓީއަށް މައުލޫމާތު ދެއްވަމުން އޮޑިޓަރ ޖެނެރަލް ވިދާޅުވީ، ސިޓީ ކައުންސިލްއާއި، ކުރީގެ ސަރުކާރުން ހަދާފައިވާ ހިސާބުވެސް ގޯސް ކަމަށެވެ.

އެޗްޑީސީން ހުށައެޅި އަގަކީ ވިޔަފާރީގެ ގޮތުން ސައްޓެއިނަބްލް އަގެއް ނަމަވެސް އެ ފްލެޓަށް ފައިސާ ދައްކާ މުޅި މުއްދަތުގެ ތެރޭގައި 2.4 ބިލިއަން ރުފިޔާގެ ފައިނޭންސިންގ ފެސިލިޓީއެއް އެ ކުންފުންޏަށް ބޭނުންވާނެ ކަމަށެވެ. މުޅި ޕްރޮޖެކްޓުން ގާތްގަނޑަކަށް 2.1 މިލިއަން ރުފިޔާގެ ޕޮޒިޓިވް ކޭޝް ފްލޯއެއް އަންނާނެ ކަމަށެވެ.

އޮޑިޓަރ ޖެނެރަލް ވިދާޅުވީ، އެޗްޑީސީން ކަނޑައެޅި އަގު ސަރުކާރުން 8،500އަށް ކުޑަކޮށްފައި ވުމުގެ ސަބަބުން 138 މިލިއަން ރުފިޔާގެ ކޭޝް ފްލޯ ޑެފިސިޓެއް މުޅި މަޝްރޫއުގެ މުއްދަތުގައި ކުރިމަތިވާނެކަމަށެވެ. އަދި ކުލީގެ އަދަދު 6،600 ރުފިޔާއަށްކުޑަކޮށްފި ނަމަ، 9.2 ބިލިއަން ރުފިޔާގެ ޑެފިސިޓެއް ކުރިމަތިވާނެކަމަށް އޮޑިޓަރ ޖެނެރަލް ވިދާޅުވިއެވެ.

އެޗްޑީސީން މިހާތަނަށް ނަގާފައިވާ އެންމެ ބޮޑު ލޯނަކީ ހިޔާ މަޝްރޫއަށް ނަގާފައިވާ ލޯނުކަމަށާއި، ރަނގަޅަށް މެނޭޖުނުކުރެވިއްޖެނަމަ ކުންފުންޏަށް މާލީ ބޮޑެތި މައްސަލަތަކެއް ކުރިމަތިވެދާނެ ކަމަށް އޮޑިޓަރ ޖެނެރަލް ވިދާޅުވިއެވެ.

އެ މަޝްރޫއުގެ ލޯނު މިހާރުވެސް 30 އިންސައްތަ ޑީފޯލްޓްވެފައިވާކަން ފާހަގަކުރައްވާ އޮޑިޓަރ ޖެނެރަލް ވިދާޅުވީ، އެޗްޑީސީން ޚާއްސަ ސަމާލުކަމެއް ދީގެން ސްކީމްތަކުގެ ފައިސާ ހޯދުމަށް މަސައްކަތް ކުރަންޖެހޭކަމަށެވެ.

ހިޔާ ފްލެޓްގެ ޔުނިޓަކަށް މަހުން މަހަށް ދައްކަންޖެހޭ އަގު 5600އަށް ކުޑަކުރެވޭނެކަމަށް ކުރީ ސަރުކާރުން ބުނި ނަމަވެސް ފްލެޓުތަކުގެ ކުލީގެ ގޮތުގައި ކުރީ ސަރުކާރުގެ ހައުސިން މިނިސްޓްރީން ކަނޑައެޅި އަގަކީ ގޯސް ހިސާބެއް ކަމަށް އޮޑިޓުން މިވަނީ ދައްކާފައެވެ.

ހިޔާ ފްލެޓުތަކުން ކުލީގެ ގޮތުގައި މިހާރު ނަގަނީ 8،500 ރުފިޔާއެވެ. އެއީ ކުއްޔަށްވާ 7500 ރުފިޔާއާއި ފްލެޓްގެ މެއިންޓަނަންސްއަށް ނަގާ 1،000 ރުފިޔާއެވެ.

ސަރުކާރުން ޔުނިޓަކަށް ޖެހޭ އަގު ކަނޑައަޅާފައިވަނީ، ޕްރޮޖެކްޓް މެނޭޖްމެންޓް ކޮސްޓް، ބިމުގެ އަގު، ސަޕްލިމެންޓަރީ ޑިވެލޮޕްމެންޓް ކޮސްޓް އުނިކުރުމަށްފަހުގައެވެ. އެއީ ސަރުކާރުން މިހާރުވެސް ސަބްސިޑައިޒް ކޮށްފައިވާ ބައިތަކެވެ.

މަޝްރޫއުގެ އަގުގެ ގޮތުގައި ހިމަނާފައި ނުވާ އެހެނިހެން ޚަރަދުތަކުގެ ތެރޭގައި ހިމެނޭ، ޕްރޮޖެންޓް މެނޭޖްމެންޓް ކޮސްޓް، ބިމުގެ އަގު، ސަޕްލިމެންޓަރީ ޑިވެލޮޕްމެންޓް ކޮސްޓް ސަބްސިޑައިޒްކޮށް ވިއްކުމުން އެޗްޑީސީއަށް މާލީ ގޮތުން ގޮންޖެހުންތަކެއް ކުރިމަތިވެ، އެ ގެއްލުން ފޫބެއްދުމަށް ދައުލަތުގެ ބަޖެޓުން ސަބްސިޑީއެއް ދޭން ޖެހިދާނެތީ، މިއީ ދައުލަތުގެ ބަޖެޓުން ދެވިދާނެ ސަބްސިޑީއެއްތޯ ބެލުމަށް އޮޑިޓް ރިޕޯޓްގައި ފާހަގަކޮށްފައިވެއެވެ.

އަދި މިފަދަ ހައުސިން މަޝްރޫއުތައް ހިންގުމަށް ނަގާ ލޯންތަކާ އެއް ހަމައެއްގައި އާމްދަނީ ނުހިފެހެއްޓޭ ނަމަ މިފަދަ ލޯނުތައް އަދާކުރުމަށް ދަތިވެ ކުންފުންޏަށް މާލީ ގޮތުން ގޮންޖެހުންތަކެއް ކުރިމަތިވެ، ވިޔަފާރީގެ އުސޫލުން ކުންފުނި ހިންގަން ދަތިވެ އެފަދަ ލޯނުތައް އަނބުރާ ދެއްކުމަށް ދައުލަތަށް ބަރޯސާ ވުމަކީ އެކަށީގެންވާ ކަމެއް ކަމަށް ވުމުން، މިގޮތަށް ސަބްސިޑައިޒް ކޮށްގެން ހިންގާ މަޝްރޫއުތަކުން ދައުލަތުން އުފުލަން ޖެހޭ މާލީ ބުރަ ސަބްސިޑައިޒް ކުރެވޭނެ ނިސްބަތް ބަލައި މަޝްރޫއުތައް ދެމެހެއްޓެނިވި ގޮތެއްގައި ފައިނޭންސް ކޮށްގެން ހިންގޭނެ ގޮތަށް މަޝްރޫއުތައް ރާވައި ހިންގުމާއި، މިފަދަ މަޝްރޫއުތައް ފެށުމުގެ ކުރިން ފައިނޭންޝިއަލް ފީސިބިލިޓީ ހަދައި އެއަށް ރިއާޔަތް ކޮށްގެން ނިންމުންތައް ނިންމުމަށްވަނީ ލަފާ ދީފައެވެ.

ހިޔާ މަޝްރޫއުގައި ހައުސިންގ ޔުނިޓަކަށް ޖެހޭ ޖުމްލަ އަގާއި މަހުންމަހަށް ދައްކަންޖެހޭ އަދަދު ހިސާބުކޮށް ކަނޑައަޅާފައިވާގޮތް ރިވިއު ކުރުމަށް އެޗްޑީސީން އެދުމުން، އެއަގު ހިސާބުކޮށްފައިވާ ގޮތް ބެލުމަށްފަހު، އޮޑިޓަރ ޖެނެރަލްގެ އޮފީހުން ރިޕޯޓްވެސް އާންމުކުރިއެވެ. އޭގައިވާގޮތުން ކުރީ ސަރުކާރުން ކަނޑައެޅިގޮތަށް މަހަކު 5،600 ރުފިޔާއަށް ހައުސިންގ ޔުނިޓެއް ވިއްކައިފިނަމަ، އެޗްޑީސީއަށާއި ސަރުކާރަށް ލިބޭ މާލީ ގެއްލުން ބޮޑުވާނެއެވެ.