ހަނގުރާމަވެރި ސަރަހައްދުން ރާއްޖެ ގެނައި އާއިލާ އިތުރު 8 މަސް ދުވަހަށް ބަންދުކޮށްފި
އިދާރީ ބަންދެއްގައި 30 ދުވަހަށް ބޭތިއްބުމަށް އަމުރުކުރީ މާޗު 12 ވަނަ ދުވަހު
ކްރިމިނަލް ކޯޓް
ހަނގުރާމަވެރި ސަރަހައްދުން ރާއްޖެ ގެނައި އާއިލާ އިތުރު 8 މަސް ދުވަހަށް އިދާރީ ބަންދެއްގައި ބޭތިއްބުމަށް ކްރިމިނަލް ކޯޓުން އަމުރުކޮށްފިއެވެ.
ހަނގުރާމަވެރި ސަރަހައްދުގައި ހާލުގައި ޖެހިގެން ރާއްޖެ ގެނައި ފުރަތަމަ ދިވެހި އާއިލާ ރާއްޖެ ގެނެސްފައިވަނީ މާޗް މަހުގެތެރޭގައެވެ. އެ އާއިލާ އިދާރީ ބަންދުގައި ބަހައްޓަނީ ކ.ހިންމަފުށީގައި ހުންނަ ރީއިންޓެގްރޭޝަން ސެންޓަރުގައެވެ.
ހަނގުރާމައިގައި ހާލުގައި ޖެހުނު 31 އަހަރުގެ އަންހެނަކާއި އޭނާގެ 18 އަހަރު ނުފުރޭ ހަތަރު ދަރިން އަނބުރާ ރާއްޖެ ގެނައީ މިދިޔަ މާޗް މަހުގެ 11 ވަނަ ދުވަހުއެވެ. އޭގެ ތެރެއިން ދެ ކުދިންނަކީ ހަނގުރާމައަށް ދިޔައިރު ގޮވައިގެންދިޔަ ދެ ކުދިންނެވެ. ދެން ތިބި ދެ ކުދިންނަކީ ރާއްޖެ އައި އިރު އޭނާ ގޮވައިގެން އައި ދެ ކުދިންނެވެ. އެ ކުދިން ގެނައީ ޑީއެންއޭ ޓެސްޓް ހެދުމަށްފަހު އެއީ އޭނާގެ ދަރިންކަން ކަށަވަރުކުރުމަށް ފަހުގައެވެ. އެ ދެކުދިންނަށް މިހާރުވަނީ ރާއްޖޭގެ ރަށްވެހިކަންވެސް ދީފައެވެ.
އެއާއިލާ އަނބުރާ ރާއްޖެ ގެނައުމާއެކު، ކްރިމިނަލް ކޯޓުންވަނީ އެއާއިލާ އިދާރީ ބަންދެއްގައި 30 ދުވަހަށް ބޭތިއްބުމަށް މާޗު 12 ވަނަ ދުވަހު އަމުރުކޮށްފައެވެ.
ހޯމް މިނިސްޓްރީން ބުނެފައިވަނީ އެ އާއިލާ މުޖުތަމައުއަށް އަނބުރާ ނެރޭނީ ރިހެބިލިޓޭޝަން ޕްރޮގްރާމް ފުރިހަމަކުރުމަށް ފަހުގައި ކަމަށެވެ.
ކުޑަކުދިންނާއި އަނިޔާއަށް ހުށަހެޅިފައިވާ އަންހެނުންނަކީ ދިވެހިރާއްޖޭގެ ގާނޫނުތަކާއި ދިވެހިރާއްޖެ ބައިވެރިވާ ބައިނަލްއަގުވާމީ މުއާހަދާތަކުން ޚާއްސަ ސަލާމަތާއި ރައްކާތެރިކަން ދީފައިވާ ބަޔަކަށް ވާހިނދު، އެފަދަ ފަރާތްތަކުގެ އައިޑެންޓިޓީ ހާމަކޮށް ޒާތީ މައުލޫމާތު އާންމުކޮށް ފެތުރުމަކީ އެފަދަ ފަރާތްތަކުގެ އިންސާނީ ކަރާމަތަށް އުނިކަން ލިބޭ، ގާނޫނީ ގޮތުން މަނާކުރެވިފައިވާ، އަދި އެފަރާތްތައް އަލުން އަނބުރާ މުޖުތަމައުއަށް ގެނައުމަށް ކުރެވޭ މަސައްކަތަށް ހުރަސް އެޅޭ ކަމެއްކަމުގައި ވާތީ، ޒިންމާދާރުކަމާއެކު މިކަމަށް ސަމާލުކަން ދިނުމަށް ވަނީ އިލްތިމާސް ކޮށްފައެވެ.
މިއީ މިގޮތަށް ރާއްޖެ ގެނައި ފުރަތަމަ އާއިލާއެވެ. ޓެރަރިޒަމް މަނާ ކުރުމުގެ ގާނޫނުގައި ބުނާ ގޮތުން ހަނގުރާމަވެރި ސަރަހައްދަކުން ރާއްޖެ އަންނަ މީހުން ރިހެބިލިޓޭޝަން ޕްރޮގްރާމެއްގައި ބައިވެރިވުން ލާޒިމެވެ.
އަދި މި ގޮތަށް ބަންދުކުރެވޭ ފަރާތްތައް ޓެރަރިޒަމްގެ އަމަލުތަކަށް ހުށަހެޅިފައިވާ މިންވަރަކީ ކޮބައިތޯ ބެލުމަށާއި، އެއިން ފަރާތެއްގެ ކިބައިން މުޖުތަމައަށް ކުރިމަތިވެދާނެ ނުރައްކަލަކީ ކޮބައިތޯ ދެނެގަތުމަށްޓަކައި، ޓެރަރިޒަމް މަނާ ކުރުމުގެ ގާނޫނުގެ ދަށުން ހަދާ ގަވާއިދުގައިވާ ގޮތުގެމަތިން އެމީހުންގެ ރިސްކް އެސެސްމަންޓެއް ބަންދު ކުރެވޭތާ 30 ދުވަހުގެ ތެރޭގައި ހަދަން ޖެހެއެވެ.
